Mauaina o le Malosi e ala i le Usiusitai

E ui ina leai se punavai mo le olaga talavou tatou te ono sailia ma le poto, ae o loo i ai se isi punavai o loo i ai le vai e sili atu ona taua, o le vai lea o le ola e faavavau. O le punavai lea o le upumoni.

Na maua lelei e le fatusolo le taua moni o le sailiga mo le upumoni ina ua ia tusia nei upu e faavavau:

I se faaaliga na tuuina mai e ala i le Perofeta o Iosefa Samita i Katelani, Ohaio, ia Me o le 1833, na fetalai mai ai le Alii:

“O le upu moni o le malamalama foi lea o mea e pei ona i ai nei, e pei ona sa i ai, ma e pei ona o le a oo mai; …

“O le Agaga o le upu moni e ō le Atua. … Ua Ia [Iesu] maua le atoatoaga o le upu moni … ;

“E leai foi sē maua le atoatoaga sei vagana e tausia e ia ana poloaiga.

“O lē tausia ana poloaiga e maua le upu moni ma le malamalama, seia faamamaluina o ia i le upu moni ma iloa mea uma lava.”²

E tau le manaomia e oe ma au i lenei vaitau o le malamalama, lea ua toefuataiina mai ai le atoaga o le talalelei, ona folau i ogasami e le’i asaina pe malaga i auala e le’i faailogaina e saili ai le punavai o le upu moni. Aua ua uma ona faataatia e se Tama Faalelagi alofa lo tatou auala ma tuuina mai se faafanua faatuatuaina—o le usiusitai!

O lana afioga ua faaalia mai ua faamatala manino mai ai faamanuiaga e aumaia e le usiusitai ma le lototiga masani ma le faanoanoa lea e o mai faatasi ma le tagata malaga o lē ui atu i auala faasaina o le agasala ma mea sese. Na folafola manino atu e Samuelu, i se augatupulaga na matele i le aganuu masani o le osi o taulaga i manu, “O le faalogo e sili lea i le taulaga, ma le usiusitai e sili lea i le ga’o o le mamoe poa.”³

Ua silafia e perofeta, o anamua ma aso nei, le malosiaga lea e oo mai e ala i le usiusitai. Mafaufau ia Nifae: “Ou te alu atu ma fai ia mea ua poloaiina e le Atua.”⁴ Po o le faamatalaga manaia a Mamona e uiga i le malosi na i ai i atalii o Mosaea:

“Ua tutupu malolosi i latou i le malamalama o le upu moni; aua o i latou o tagata mafaufau lelei, ma ua latou suesueina tusi paia ma le filifiliga, ina ia latou iloa ai le afioga a le Atua.

“A e peitai ua le gata i lea, a ua latou tatalo faatauanau, ma ua anapogi; o le mea lea ua i ai ia te i latou le agaga o le perofetaga, ma le agaga o le faaaliga, a latou aoao atu foi, latou te aoao atu i le mana ma le pule mai le Atua.”⁵

Na tuuina mai e Peresitene Tavita O. MaKei (1873–1970), i se tasi o ana saunoaga amata i tagata o le Ekalesia i se konafesi aoao, ni faatonuga mo o tatou taimi e ese le faigofie ae ese foi le mamana: “Tausi poloaiga a le Atua.”⁶

Na faapena foi le mamafa o le fetalaiga a le Faaola ina ua Ia fetalai, “Aua o i latou uma o e maua se faamanuiaga mai ia te a’u e ao ina tausia tulafono na atofaina mo lena faamanuiaga, atoa ma ona tulaga, e pei ona faatuina mai a o lei faavaeina le lalolagi.”⁷

O gaoioiga lava a le Matai e aumaia ai le tulaga tauleleia i Ana afioga. Na Ia faaalia le alofa moni o le Atua e ala i le ola i se olaga atoatoa, e ala i le faamamaluina o Lana misiona paia. Sa le’i faasausili lava o Ia. Sa le’i faafefeteina lava o Ia i le faamaualuga. E leai se taimi na lē faatuatuaina ai o Ia. Ae sa lotomaualalo o Ia i taimi uma. Sa faamaoni o Ia i taimi uma. Sa amio sa’o o Ia i taimi uma.

E ui ina sa faaosoosoina o Ia e le matai o pepelo uma, o le tiapolo lava lea; e ui ina sa vaivai faaletino o Ia mai le anapogi i ao e 40 ma po e 40 ma na “mulimuli ane ona fia taumafa ai lea o ia”; ae ina ua ofoina atu e le tiapolo ia Iesu ni folafolaga taufaasese ma le faatosina, na Ia tuuina mai ia i tatou se faataitaiga faalelagi o le usiusitai e ala i le musu e alu ese mai le mea na Ia silafia e sa’o.⁸

Ina ua feagai o Ia ma tiga i Ketesemane, lea sa Ia onosaia ai ni tiga na tafe mai ai Lona afu na peiseai o le toto na sisina ifo i le eleele, sa fai o Ia ma faataitaiga o le Alo usiusitai i le fetalai atu, “Le Tama e, a e finagalo i ai, ia e ave ese lenei ipu ia te au: a e aua le faia lo’u loto, a o lou finagalo.”⁹

Ia Peteru i Kalilaia, na fetalai atu i ai Iesu, “Ina mulimuli mai ia ia te a’u.” Ia Filipo na oo atu i ai lea lava faatonuga, “Mulimuli mai ia te a’u.” Ma i le ao lafoga o Levi, o lē sa nofo i le fale e tali ai taulaga, na oo atu i ai le valaau faatauanau, “Mulimuli mai ia te au.” Na oo lava i le tagata o lē na momo’e mai ia te ia, o le sa i ai ni ana oa se tele, na oo mai ai upu, “Mulimuli mai ia te a’u.”¹⁰ Ma ia te oe ma a’u na fetalai mai i ai lenei lava Iesu e tasi, “Mulimuli mai ia te a’u.” Pe o tatou naunau ea e usitai?

O le usiusitai o se uiga iloga o perofeta, peitai e tatau ona iloa o lenei puna o le malosi o loo i ai mo i tatou i aso nei.

O se ua na aoaoina lelei le lesona o le usiusitai, o se ua na maua le punavai o le upu moni, o se tamalii agalelei ma faamaoni e faatauvaa mea sana maua ma ona tulaga. Sa auai o ia i le Ekalesia i Europa ma, o le filiga na ia sefeina ai [ni tupe] ma ositaulaga ai, ma na malaga mai ai i Amerika i Matu—i se atunuu fou, i se gagana ese, aganuu ese, ae o le Ekalesia lava e tasi i lalo o le taitaiga a le Alii lava e tasi, o lē na ia faatuatuaina ma usitai i ai. Na avea o ia ma peresitene o le paranesi a se Au Paia toagaogao o e sa tauivi lava i se nuu sa fai si mata’ese o tagata. Sa mulimuli o ia i polokalama a le Ekalesia, e ui lava ina sa toalaiti le au paia ae na tele tiute fai. Sa ia faia se faataitaiga mo tagata auai o lana paranesi lea sa faapei moni lava o Keriso, ma sa latou tali atu i se alofa lea sa seasea ona vaaia.

Sa ia maua ni tupe e tausi ai o ia mai ona lava lima i le avea ai o se tagata faatauoloa. Sa utiuti mea sa ia maua, ae sa ia totogiina e le aunoa se sefuluai atoa ma foai atu ni tupe se tele atu. Sa ia amataina se tupe mo faifeautalai i lana paranesi laitiiti, ma mo ni masina, sa na o ia lava le tagata na fai saofaga ai. Ina ua i ai ni faifeautalai i lona nuu, sa ia fafagaina i latou, ma sa le mafai ona latou tuua lona fale e aunoa ma le tuuina atu o se foai mo la latou galuega ma le tausiga. O tagata o le Ekalesia mai nuu mamao o e na ui ane i lona nuu ma asiasi atu i lana paranesi, latou te mauaina i taimi uma lona agaga talimalo ma lona agaga alofa, ma a toe faaauau a latou malaga latou te iloa sa latou feiloai ma se tamalii maoae, o se tasi o auauna usiusitai a le Alii.

O i latou na pulefaamalumalu ia te ia na latou mauaina lona faaaloalo loloto ma lana tausiga na sili atu ona faapitoa. I lona lagona, o i latou ia o sui o le Alii; sa ia auauna atu i o latou manaoga faaletino ma sa faapitoa le magafagafa i ana tatalo—lea sa fai soo—mo lo latou manuia. I se tasi aso Sapati na latou auai ai ma nisi o taitai o e na asiasi atu i lana paranesi i ni tatalo sa le itiiti ifo ma le sefululua i ni fonotaga eseese ma i ni asiasiga i tagata o le au paia. Sa tuua o ia e taitai i le faaiuga o le aso ma se lagona o le fiafia ma le siitia faaleagaga lea sa tumau ai lo latou olioli i se malaga e fa itula i le taavale i se taumalulu ma o lenei, i le mavae ai o le tele o tausaga, na faamafanafanaina ai le agaga ma faafouina ai le loto a o manatuaina lena aso.

Sa saili atu e le au faitofa, ma tagata atamamai ia lenei tamalii lotomaualalo o le Atua, ma sa le’i lelei foi ni ana aoga, ma faitaulia ai i latou o ni tagata faamanuiaina pe a latou faaaluina se itula faatasi ma ia. O ona foliga sa o se tagata masani lava; o lana tautala faaPeretania sa tautoai ma e fai si faigata ona malamalama i ai; o lona maota sa tauagafau. Sa le’i i ai sana taavale po o se televise. Na te le’i tusia ni tusi ma lauga atu i ni saunoaga tau teuteu ma na te le’i faia foi se mea e tasi o mea ia e masani ona gauai atu i ai le lalolagi. Ae peitai, sa taina e le au faatuatua se auala e agai atu i lona faitotoa. Aisea? Aua sa latou mananao e feinu mai lana punavai o le upu moni. E le o le tele o mea na ia fai atu ai sa latou talisapaia ae o mea na ia faia, e le o le aano o lauga na ia aoao atu ai ae o le malosi o le olaga na ia ola ai.

O le iloa e faapea, sa tuuina atu e le aunoa ma le fiafia e lena tamalii mativa le faaluaina o le tasi vaesefulu i le Alii, e tuuina atu ai i se tagata se vaaiga manino atu i le uiga moni o le sefuluai. O le vaai atu ia te ia o auauna atu i e fiaaai ma agalelei i se tagata ese, e iloa ai e se tagata, sa ia faia e pei ona faia ai e le Matai. O le tatalo faatasi ma ia ma tofo i lona talitonuga loloto i le fesoasoani faalelagi, o le iloa lea o se auala fou o fesootaiga.

Ia pe mafai la ona faapea sa ia tausia le poloaiga muamua ma le sili e faapena foi lona lua,¹¹ na tumu lona loto i le alofa atu i tagata uma, na teuteuina ona manatu i le mama e le aunoa ma, o lea, na malosi ai lona faatuatua fai ifo i luma o le Atua.¹²

Sa iloagofie lava le lelei ma le amiotonu o lenei tamalii. O lona malosi na maua mai le usiusitai.

O le malosi lea tatou te sailia ma le naunautai i le aso e fetaiai ai ma luitau o se lalolagi faigata ma fesuisuiai, e mafai ona fai ma tatou pe afai, tatou te tutu atu ma le malosi ma le lototele, ma tautino atu faatasi ma Iosua, “A o a’u nei ma lo’u aiga, matou te auauna ia Ieova.”¹³