O Malumalu o Meaalofa mai le Tama Faalelagi

I ni nai tausaga ua mavae atu, sa i ai sou tofiga i le konafesi faalesiteki i Kalefonia. I la’u malaga toe foi mai i Iuta, sa nofo ai i ou autafa se tamaitai aulelei e i le ogatotonu o le 70 ona tausaga. O lona igoa o Patti, ma sa fiafia o ia e talanoa.

Sa ta’u mai e Patti ia te a’u mea uma e uiga i lona aiga—e uiga i lona toalua ma lana tama tama ua maliliu. Sa faaauau pea le ma talanoaga seia oo ina lata tulaueleele le vaalele. Sa ou fai atu, “Patti, sa e tautala i le tele o le taimi o le malaga. Ae ta te lei tulaueleele i le Aai o Sate Leki, ou te fia fesili atu ia te oe ni nai fesili.”

Sa ou fesili atu ma le faamaoni ia te ia, “Patti, e te iloa o le a e toe vaai i lou toalua ua maliu?”

Sa fai mai o ia, “Oi, e mafai lena mea?”

Ona ou toe fesili atu lea, “E te iloa o le a e toe vaai foi i lau tama tama o Matt, lea sa oti a o pepe?”

Sa amata ona tagi, ma tetete lona leo. Sa pai atu le Agaga o le Alii ia te ia. Sa matua misia e ia i laua.

Ona ou fesili atu lea ia te ia ma le agaga tatalo, “Patti, e te iloaina e i ai sou Tama Faalelagi agaalofa ma agalelei, e matua alofa faapelepele ia te oe?”

Sa ia faapea mai, “E i ai?”

Sa ou fesili atu, “Patti, e te iloaina e i ai se fuafuaga faapitoa a lou Tama Faalelagi mo oe ma e mafai ona faavavau lou aiga?”

“E mafai?” sa ia tali mai.

“Na e faalogo muamua i le fuafuaga?” o lau fesili lea.

Sa fai mai o ia, “E leai.”

I le agaga faaaloalo sa ou fesili atu ai ia te ia, “E te manao e te iloaina lena fuafuaga?”

“Ioe, ou te fia iloa,” sa ia tali mai.

Sa loloto le pai atu o le Agaga o le Alii ia te ia.

Sa aoaoina Patti e faifeautalai. O le tolu vaiaso mulimuli ane, a o nofo o ia i Iuta, sa telefoni mai ai Patti ia te au: “Tuagane Kikuchi, o Patti lea. O le a papatisoina a’u. Pe e te fia auai mai i le sauniga o lo’u papatisoga?”

Sa ma o atu ma lo’u toalua i lona papatisoga. Sa toatele le au paia sa latou faaaumeaina ma le agalelei o ia. Oka, o le a le mafai lava ona ou faagaloina le fiafia o ona foliga a o alu ae o ia mai le vai!

O le a le mafai ona ou faagaloina ona loimata o le fiafia i le fata faitaulaga o le Malumalu o Sate Leki i le tausaga mulimuli ane. Ou te manatuaina lona susulu faaselesitila ma le filemu a o faamauina o ia i lona toalua ma lana tama tama ua maliliu ma i lana tama teine o loo soifua, o le ua avea ma se tagata o le Ekalesia.

Sa maua e la’u uo o Patti le Alii o Iesu Keriso. Ona o le faamauga i le malumalu, ua ia iloa nei ua faavavau lona aiga i le Alii.