Uumauina o Aa Malolosi

Ao avea au ma se teineitiiti aoga i Rusia, sa ou faitau ai i se tala taufaafefe e uiga i ni tamaiti se toalua sa fetaui ma se urosa i le togavao. I tausaga mulimuli ane, ina ua avea au o se faiaoga, sa fai mai nisi o a’u uo matou te o e ao mai ni pulouaitu. Sa ou mata fefe lava i le togavao, peitai sa ou ioe matou te o.

I le agai atu i le togavao, sa ou tago ai ma uu mai se fasilaau ina ia mafai ona ou puipuia ai a’u nei te’i ua ma fetaui ma se urosa. E le’i umi ae maua e au uo ia pulouaitu lanueena ia sa latou sailia. Ae o a’u, sa ou sueina ni pulouaitu e lanumumu sesega ia pito i luga, o lea sa ou agai ese ai i le isi itu. Ou te toe iloa ane, ua na o a’u lava.

A o ou sue pulouaitu, sa ou see ma ou pau ai. Sa lelea ese la’u ato o pulouaitu, ae sa ou uumauina pea la’u laau. Ao o’u taumafai e tu i luga, sa ou iloaina ai o le eleele sa palapala ma piipii. Na matua ou fefe i lo’u iloaina ua ou savali i se vaivai! Sa vave ona tutumu i vai ou seevae pau, ma na amata ona ou magoto. Sa ou taumafai e faaminoi ou vae, peitai nai lo le faasaolotoina o a’u, sa atili ai ona ou magoto. Ina ua oo le palapala i ou puimanava, sa faatumuina au i le fefe tele.

Sa ou alaga atu i au uo, ae na pau lava le tali sa ou faalogoina na sau lea mai i le ū ū o seemu ma le fetagisi o lane. Ina ua amata ona ou tagi, sa faafuasei lava ona ou manatuaina lo’u tina. Soo se taimi lava na oo ai o ia i se tulaga le lelei, sa tatalo o ia. Sa tele ni taimi na ia valaauliaina ai a’u e tatalo, peitai o taimi uma lava sa ou musu, ma tali atu, “E leai lava se Atua.”

Peitai i le vaivai lea o le a vave ona avea ma ou tuugamau, sa leai lava se isi mea na mafai ona ou faia ae na o le tatalo ma valaau atu i le Atua mo se fesoasoani. “Afai o soifua Oe, faamolemole fesoasoani mai ia te au!” Sa ou tagi.

Na toetoe o le taimi lava lena na ou faalogoina ai se leo agalelei o faapea mai ia te au, “Talitonu mai ma aua e te fefe. Uumau i le aa malosi o le laau.”

A o ou tilotilo solo, sa ou iloa atu se aa laau lapoa i ou tua. O le faaaogaina o la’u laau, na mafai ai ona ou faalaveina i le aa. Ona tuu mai lea e se mea le malosi e toso ese ai a’u i fafo mai le vaivai.

A o o’u lilofia i le palapala, sa ou faapau ai i lalo ma faafetai atu i le Atua mo le taliina mai o la’u tatalo. Ua ou talitonu nei o loo soifua o Ia. Sa ou lagonaina Lona auai mai ma faalogoina Lona siufofoga, ma sa Ia tuuina mai ia te au le malosi e toso ese mai ai au ina ia ou sao ai.

I se taimi e le’i mamao mulimuli ane, ina ua aoaoina a’u e faifeautalai e faapea sa maua e le Perofeta o Iosefa Samita se tali o lana tatalo i le Togavao Paia, sa ou talitonu ia i laua. Aua o le mea lava ia, sa taliina mai e le Atua la’u tatalo i le togavao. Sa ou pipii atu i aa malolosi o le talalelei, ma sa le’i umi ae papatisoina loa a’u, ma ou auauna atu i le asō i le Paranesi o Gyumri i Aramenia.

Ou te iloa e alofa le Tama Faalelagi i Ana fanau uma, ma ou te faafetai i le avea ai ma se tagata o le Ekalesia a Iesu Keriso o le Au Paia o Aso e Gata Ai. Ou te faafetai foi mo le tele o isi faamanuiaga sa ou mauaina mai le Tama Faalelagi, ae maise lava i Lona tali mai i se tatalo a se tagata le talitonu i le Atua, i le togavao i le tele o tausaga ua mavae.