Ua Matou O Mai e Vaai i le Malumalu

I se tasi aso i le tautoulu i le taimi o la’u sifi o se tagata e faigaluega i le Malumalu o Sate Leki, sa taunuu mai ai se alii talavou ma ni ana uo, na manino lava sa le’i laei mai i latou e tapuai i le malumalu.

“Ua matou o mai e vaai i le malumalu,” o le tala lea a le alii talavou.

“O i ai sau pepa faataga?” o lau fesili lea.

Sa mafaufau le alii talavou mo sina taimi. Ona ia faapea mai lea, “Ioe. O lo’u tina e i ai lana uo Mamona i Minesota. Sa ia fautua mai matou te o mai e vaai i le malumalu.”

Sa ou lagonaina le uunaiga e faasee ese atu i autafa nei tagata talavou ma ia ou talanoa atu i ai. O le igoa o le alii talavou o Lars. Sa ou faamalamalama atu ia te ia e le gata ina mafai ona sau o ia i le malumalu ae e finagalo foi le Tama Faalelagi e sau o ia. Sa ou ta’u atu ia Lars e tatau ona ia saunia muamua, ma sa ou faamalamalama atu i ai le auala [e saunia ai].

I lea taimi, e lei leva foi ona ou toe malosi mai i le Ekalesia. Sa ou auauna atu i se misiona ae mulimuli ane na ou aluese mai le Ekalesia ona na maua au i faatosinaga o faafiafiaga ma le faaaogaina o fualaau oona ma le ava malosi. Sa ou manatu o le a fiafia lo’u aiga i la’u galuega ma tamaoaiga, peitai sa le popole lava lo’u tina i se mea o na mea. Nai lo lena, sa ia tuuina i taimi uma lo’u igoa i le lisi o igoa mo talosaga a le malumalu, lea sa ou ita tele ai.

Na alu ese mai foi le Ekalesia le tamaitai sa ou faaipoipo i ai. E oo ane i le taimi na amata ai ona fesilisili le ma tama teine e valu tausaga le matua o Tori, e uiga ia Iesu Keriso, ua matua leai lava se ma tulaga faaleagaga. E ui lava i lau auaunaga faamisiona, ae na leai ma se mea na ou manatuaina e uiga i le Faaola.

“E i ai tagata ua agavaa e aoao atu ia te oe e uiga ia Iesu,” sa ou tau atu ia Tori. “Aisea e te le talanoa atu ai ia i latou?”

I ni nai aso mulimuli ane, sa tuitui mai ai ni faifeautalai tamaitai se toalua i le matou fale. Sa valaaulia i laua e Tori i totonu ma amata ai ona fai [ana] lesona. I lo’u faalogologo nanā mai i le isi potu, sa ou lagonaina mai le aoao atu e tamaitai faifeautalai o mataupu faavae ia sa ou iloaina e moni.

“E te fia papatiso?” sa fesili atu ai le tasi o tamaitai faifeautalai ia Tori ina ua uma le lesona lona tolu.

“Ioe,” sa ia tali atu ai.

“Mata e mafai ona papatiso oe e lou tama?”

Ua 20 tausaga talu ona ou le toe alu i le lotu, ae na ou iloaina o le a i ai se suiga i lou olaga. Sa ou i ai i le faiga o isi lesona mulimuli ane, sa amata ona matou auai atu i le lotu, ma sa ma feiloai atu ma lo’u toalua i le epikopo. Ina ua ou salamo, sa tonu ia te a’u e tatau ona ou faia mea uma ou te mafaia e totogi ai le tele o tausaga sa ou maumauina. Sa suia la’u matata, faalauteleina ou valaauga i le Ekalesia, ma faamauina i lo’u toalua ma lo’u afafine, ma avea ai ma se tagata faigaluega o le malumalu. O le auala lena na ou iloa ai e mafai e se vaega fiailoa o tagata talavou ona avea ma ni tagata agavaa mo le malumalu.

O le tautotogo na sosoo ai, sa tusi mai ai Lars ia te a’u, e faafetai mai mo le faamalamalamaina o le uiga moni o se pepa faataga o le malumalu. “Sa ou aoaoina ni mea se tele e uiga i se pepa faataga o le malumalu,” sa ia tusia ai. “O le mea moni lava, sa ou papatiso ma maua so’u lava pepa faataga ia Ianuari lea na te’a atu!” Sa ou tagi a o ou tilotilo atu i le ata sa ia aumaia faatasi ma le tusi, o ia i ona ofu papae o le papatisoga ma faifeautalai na aoaoina o ia.

O la’u malaga toe foi atu i le malumalu sa tulaga ese, ma o le iloaina foi o le malaga a Lars sa avea o se faamanuiaga matagofie lea na toe faamanatu mai ai ia te au le auala e mafai ai e i tatou uma ona pai atu i olaga mo le lelei.