Siitiaina O Isi ma A’u Lava

O le Aso Faafetai o le 1990. Na faatoa uma lava ona ou faia se teteaga faigata, ma sa ou i ai i lo’u tausaga muamua o se tagata aoga faaloia i se aai sa ou le masani ai. Sa i ai la’u fanau i le fale o le la’ua tamā mo le aso malolo, ma o le taimi muamua lea i lo’u olaga, o le a na o a’u ai i se Aso Faafetai.

I le taimi muamua sa ou manao ou te faanoanoa mo a’u lava ma ia ou faia ai se tagisa tele. Peitai sa amata ona ou faitauina ou faamanuiaga. Sa i ai sa’u fanau matagofie e toalua, o se fale manaia, o se avanoa e maua ai le poto, ma le talalelei a Iesu Keriso e taialaina lo’u olaga. Sa matua faamanuiaina a’u i mea e tele.

A o latalata mai le Aso Faafetai, sa ou iloa ai o loo i ai se fuafuaga a se vaega o tamaiti aoga faaloia e o i se misiona lata ane e fesoasoani i le laulauina o se taumafataga mo le Aso Faafetai mo i latou e leai ni aiga. Sa tonu ia te a’u o le fesoasoani atu i le misiona e sili atu nai lo le nofonofo i le fale ma lagona ai le tuua toatasi ma le lototiga, o lea sa ou faatasi atu ai i a’u uo aoga.

I ni nai aso mulimuli ane sa ou i ai i le asuina o ni paluga pateta vevela i luga o ipu mafolafola mo tagata fiaaai, loto faafetai, ma fesouaiina olaga. O loimata na faaputuputu i ou mata sa le mo le faanoanoa lea sa ou lagonaina mo a’u lava; ae, o loimata o le alofa mo fanau uma a le Atua, e tusa lava pe o a o latou tulaga.

O le a le ta’ua le Aso Faafetai o se Aso Faafetai pe a leai se pīpī i totonu o le ogaumu. Peitai o se pīpī e 14 pauna (6-kg) o le a matua telē lea mo a’u, o lea sa ou valaauliaina ai nisi tamaiti aoga o e sa omai mai isi atunuu ma setete mamao ia matou auai faatasi. Sa ou manao e faasoa atu se taumafataga masani o le Aso Faafetai a Amerika, peitai sa ou valaaulia i latou e aumai ni a latou taitai. Sa ou fai i ai e tofu mai le tagata ma se meaai e sili ona fiafia i ai mai lona atunuu. O la matou taumafataga o le Aso Faafetai sa iu ina avea ma se aiga matagofie ma le lē mafagaloina—o fuamoa ma isi lava mea.

Na folafola mai e le Tupu o Peniamina, “Faauta foi, ou te fai atu nei mea ia te outou ina ia outou a’oa’o i le poto; ina ia outou iloa lenei mea, pe a i ai outou i le galuega a o outou uso ua na ona i ai outou i le galuega a le Atua” (Mosaea 2:17).

Sa ou aoaoina le poto i lena Aso Faafetai. Sa ou mauaina le fiafia, e ala i le tuuina atu o se auaunaga e ui lava sa faigofie le na o le nofonofo solo ma matanana. O le auauna atu o le ki lea i le fiafia e le na o taimi o aso malolo, po o taimi e faigofie ona maileia ai i mea o loo misi mai o tatou olaga, ae faapea foi i soo se vaitau o le tausaga. E tusa lava pe o a o tatou tulaga, e mafai lava ona tatou maua se tasi e fesoasoani atu i ai. O le siitiaina o o tatou uso ma tuagane, tatou te siitiaina ai foi i tatou lava.