Fakamatala Fakavitiō: ʻOku ʻi ai Haʻaku Taumuʻa
Ko e fakamatala ʻeni ʻo ha vitiō ne huluʻi lolotonga e fakataha lahi ʻa e Kau Finemuí ʻa ia ne fai ʻi he ʻaho 27 ʻo Māʻasi 2010.
Palesiteni Thomas S. Monson: “Siʻoku tuofāfine kei talavou, neongo kuo ʻi ai maʻu pē ha ngaahi faingataʻa ʻi he māmaní, ka ʻoku makehe ange ʻa e ngaahi faingataʻa ʻoku mou fehangahangai mo ia he taimi ní.”1
Elaine S. Dalton, Palesiteni Lahi ‘o e Kau Finemuí: “Kuo pau ke ke tauhi moʻoni ki ho ʻulungāanga faka-ʻOtuá pea fokotuʻu ha ngaahi sīpinga ʻo e fakakaukaú mo e ʻulungāangá ʻa ia ʻoku makatuʻunga ʻi ha ngaahi tuʻunga angamaʻa ʻoku māʻolungá, kae lava ke te kei angamaʻa mo anga-māʻoniʻoni.”2
Palesiteni Henry B. Eyring, Tokoni ʻUluaki ʻi he Kau Palesitenisī ʻUluakí: “ ʻOku ou lotua ʻaki hoku lotó kotoa ʻe tupulaki ʻa hoʻomou tui ko e ʻofefine koe ʻo ha ʻOtua ʻofa.”3
Mary N. Cook, tokoni ʻuluaki ʻi he kau palesitenisī lahi ʻo e Kau Finemuí: “Siʻi kau finemui ʻofeina, kuo mou ʻosi fai ha ngaahi fili ʻoku lelei. Ka kuo pau ke mou fokotuʻu ha ngaahi sīpinga ʻo e angamaʻá ke mou nofo ai ʻi he hala ko ʻení pea ʻi he kotoa hoʻomou moʻuí.”4
Palesiteni Dieter F. Uchtdorf, Tokoni Ua ʻi he Kau Palesitenisī ʻUluakí: “ ʻE ngaahi tuofāfine, tui mo falala ki he Laumālié. ʻI hoʻo toʻo ʻa e ngaahi faingamālie angamaheni ʻo e moʻui fakaʻahó peá [ke] faʻu pe fakatupu ai ha meʻa ʻoku fakaʻofoʻofa mo ʻaongá, ʻoku ʻikai ngata pē ʻi hoʻo fakaleleiʻi ʻa e māmani ʻokú ne ʻākilotoa kitautolú, ka ko e māmani foki ko ia ʻi ho lotó.”5
Ann M. Dibb, tokoni ua ʻi he kau palesitenisī lahi ʻo e Kau Finemuí: “Ko e fanga kiʻi meʻa iiki mo faingofua ko ia ʻoku mou fili ki ai he ʻaho ní, ʻe lava ke hoko ia ko ha tāpuaki lahi mo nāunauʻia ʻapongipongi.”6
Elaine S. Dalton, palesiteni lahi ʻo e Kau Finemuí: “ ʻE lava nai ʻe ha finemui angatonu ʻe taha ʻo liliu ʻa e māmani? Ko e tali leʻo lahi ki aí ko e ʻʻio!’ … Ko e ngaahi meʻa ʻokú ke fai fakaʻahó te ne fakamālohia koe ke ke hoko ko ha taki mo ha faʻifaʻitakiʻanga—ʻa e lotu fakaʻahó, ako fakaʻaho ʻa e folofolá, talangofua fakaʻahó, tokoni fakaʻaho ki he niʻihi kehé. ʻI hoʻo fai ʻení, te ke ofi ange ai ki he Fakamoʻuí pea hoko ʻo hangē ko Iá.”7
Palesiteni Thomas S. Monson: “Siʻoku ngaahi kaumeʻa kei talavou, mou tuʻu ke mālohi… . ʻOku mou ʻilo ʻa e meʻa ʻoku totonú mo ia ʻoku halá, pea ne ʻikai ha fakapuli te ne lava ʻo liliu [ʻa e moʻoni ko iá]. Kapau ʻe fakalotoʻi kimoutolu ʻe homou kaungāmeʻá ke fai ha meʻa ʻoku mou ʻilo ʻoku hala, tuʻu hake koe ʻo taukaveʻi ʻa e totonú, neongo kapau te ke tuʻu toko taha ai.”8