“E Le Uma Le Alofa”: O Se Felafolafoaiga i le Aualofa

Sister Holland: Ua sili atu ona manaomia le Aualofa i le taimi nei nai lo se isi lava taimi muamua ona o luitau tatou te feagai ai i le lalolagi i aso nei. Ua sili atu le manaomia o tamaitai o le Ekalesia ina ia amiotonu, ia ina ola vavalalata ma le Agaga, ma ina ia faatuatua. Ma e manaomia foi e tamaitai taitasi le isi tamaitai, ina ia mafai ai ona tausia ma faatumauina lo latou faatuatua.

Elder Holland: O mea o loo faia e le Aualofa o le fesoasoani lea i le aoaoina o le talalelei i se auala malosi tulagaese, faatasi ai ma se siufofoga o se tamaitai faapitoa. “O le Aualofa o se tasi o auala e aumaia ai mataupu faavae o le talalelei ma tulaga faatauaina i olaga o tamaitai. Ae ui i lea, ia manatua, o mataupu faavae o le talalelei ua le faatatau i le na o se itupa. O le agaalofa, alofa, ma le loto alofa faapea le malosi, taitaiga ma faaiuga o ni uiga taua uma o le talalelei. E tatau ona tatou opoina mai ia anoanoai i lo tatou mafai nei uiga taua, e tutusa lava alii ma tamaitai.

O soo se tasi o i tatou o loo ola e tusa ai ma le fuafuaga o le talalelei, o se tagata—o se afafine po o se atalii o le Atua. I le avea ai ma ni tagata taitoatasi ua tatau ona tatou mausali a’ia’i. E leai se faalapotopotoga o le a sili atu sona malosi nai lo ona tagata, leai se aiga e malosi atu nai lo lona faavae.

Sister Holland: A ou manatu i faamanuiaga uma ua tatou fetufaai ai i o tatou malumalu, a tatou uarota ma paranesi, a tatou faaipoipoga ma o tatou aiga, ona o tatou o le Au Paia o Aso e Gata Ai, ou te iloa e faalagolago uma lava i ala o galulue faatasi ai le au perisitua ma le Aualofa—alii ma tamaitai—i se aiga faapea i totonu o le Ekalesia.

Elder Holland: E o tamaitai i o latou aiga mai le Aualofa i vaiaso taitasi ma faasoa atu i alii i o latou ola mea na latou te aoaoina. Faapea foi ona faamanuiaina lau soa ma ou afafine i faagasologa o tausaga e ala i aoaoga faaleperisitua lea matou te mauaina ma faasoaina atu faatasi ma ou atalii.

Sister Holland: Ou te manatu e mafai ona faapea, o le manatunatu i luitau o loo feagai ma tamaitai ma aiga, e leai se isi faalapotopotoga i le lalolagi o le a sili atu le fesoasoaniga i le lumanai nai lo le Aualofa.” Ua onomea ona tatou logotasia le valaauga o tamaitai o le Ekalesia ia avea ma “taitai” mo le manuia o fanau, aemaise i le taimi nei lea ua tatou vaaia le malepelepe o aiga. E ao ona tatou savavali faatasi, uulima faatasi, ina ia mafai ona faataunuuina le galuega.

Sister Holland: O le faatosinaga o au i le Aualofa na tupu ae ae ou te lei fanau mai ona o lou tina ma lou tina matua sa galulue uma i le Aualofa. Sa ou aoao mai ia i laua a o ou laiititi. Sa ou manao ia faapei o i laua. Sa laua faamatala mai ia te au tala e uiga i lou tina matua o Elizabeth Schmutz Barlocker, o le sa galue o se peresitene o le aualofa mo le 40 tausaga. Sa na ia avatu mea uma sa ia te ia, e aofia ai ana lava meaai ma lavalava, mo ona uso i le talalelei. Sa ia faatuatua o le a puipuia o ia e le Atua ma faamanuia o ia i lana auaunaga, ma sa na Ia faia. O faataitaiga a nei tamaitai e toatolu ma la latou auaunaga i le aualofa o loo uunaia pea au i nei aso.

Elder Holland: Ou te lei auai i le Aualofa, peitai sa ou ola ae ai ma fausia ai lou olaga. Sa galue lou tina i le au peresitene o le Aualofa i la matou uarota mo le tele o tausaga o lou talavou. O se mea silisili mo se tama talavou e mataituina. E mautinoa le mafai ona oo mai o na faamanuiaga ia i tatou mai o tatou tuaa ma faamanuiaina a tatou fanau ma fanau a fanau.

Peitai o lau molimau i le Aualofa sa ala mai foi i lou toalua. Ou te mitamita i le faaipoipo i se sa avea o se peresitene o le Aualofa. Ua ala tonu mai lou faamanuiaina ona o lana tuuto. Sa ou iloa le ituaiga e i ai Patricia Terry ina ua ou faaipoipo ia te ia aua sa ou iloa lana auaunaga i le Alii. Sa taliaina e ia ma tauave i ona luga le tiutetauave o le malo. Ia te au, e sili atu o ia nai lo le ola. O na mea tulaga faatauaina ma uiga lelei ua faamanuiaina ai nei la ma mafutaga ma a ma fanau. O lea, ua faamanuiaina ea au i le Aualofa? Ioe!

Sister Holland: Sa faavaeina le Aualofa e faatatau i le mamanu o le perisitua. Ua faaalia i i se fesagaiga manaia i le va o le perisitua ma le aualofa ma faamalosia ai le manatu e faapea o alii ma tamaitai e limalima malolosi i le amiotonu ua i totonu ia i latou. E manaomia e alii faamanuiaga o tamaitai, ma e manaomia e tamaitai faamanuiaga o alii. Tatou te aoaoina malosi lena mea i totonu o le malumalu. O le tele o le galulue faatasi o le perisitua ma taitai ausilali o le a malolosi ai uarota ma paranesi. Ua tatou vaaia le mamana o fonotaga a aufono a uarota i soo se nofoaga tatou te nonofo ai.

O alii ma tamaitai uma o le tino ma itu tino taitoatasi o Keriso, ma e maeu lea auaiga maoae! Ua tatou aoaoina mai tusitusiga paia e faapea “afai e le tasi outou e le a au outou” (MFF 38:27) ma “e le mafai foi i le mata ona fai ane i le lima, E leai sou aoga ia te au” (1 Korinito 12:21).

Elder Holland: Faatasi ai ma le felefele o manatu o le aso, ua manaomia le galulue faatasi o taitai o uarota ma paranesi. O loo umia e le epikopo ki o le perisitua e taitai ai le uarota. O fonotaga a aufono a le uarota po o le paranesi o le nofoaga tatau lea e faataunuu ai nei faatasiga. O le lelei o le faafoeina o nei fonotaga, o le lelei foi lea ona faatino galuega a le Ekalesia. E moni lenei mea i uarota ma paranesi taitasi.

Ia manatua o popolega o se tina e le mafai ona tuu eseesea ma manaoga o lana fanau ma lana tane. E vaaia e le peresitene o le Aualofa, e ala i faiaoga asiasi, manaoga o le aiga atoa faapea ma tagata taitoatasi. O se auala matua malosi lena e ao ona lagaia i totonu o fonotaga a le aufono a le uarota.

Elder Holland: O le fenumiai ma le vevesi i le tamaoaiga o loo ufitia ai le kelope atoa ua toe mamanuina ai foliga o le lalolagi i mea tau tupe. Peitai o le aoao atu o mataupu faavae o le toafilemu ma le ola fuafua mo le lumanai ua avea pea ma se vaega o le Aualofa. Atonu e manatu le lalolagi o se tu tuai le tuu fagu o fualaau aina ma le lalagaina o ie moega mafanafana i le seneturi lona 21. Peitai i le taimi nei o loo i ai tagata fia aai ma maluluina. Ia i latou, o ni nai fualaau tuu fagu ma ie mafanafana ua na o ni meaalofa mai le Atua. O le ola fuafua mo le lumanai e le mafai ona taua o aga ua tuai. E le o se aga lenei o le toe foi i tua i le seneturi lona sefulu iva ae o se faasinoga tatou te manaomia e uia a o agai atu i le seneturi lona luasefulu ma le tasi. O nei lava tomai ma manatu ua mausali ma tumau ona lagolagoina e le Aualofa i le tele o tali atu i luitau o loo tatou faafeagai ai i le lalolagi atoa.

“E Le Uma le Alofa” o le fu’a lea ua mafai ona tuu faatasi ai le aiga atoa. E le o se polokalama—o se valaau o le pu o le talalelei, (tagai i le 1 Korinito 14:8–10). E le mafai ona toilalo le talalelei, o le mea lea ua tatau ai le fai ma tautinoga a le Aualofa le “E Le Uma Le Alofa” (1 Korinito 3:8). Ua toe faamalosia ai le mea moni faapea o alii ma tamaitai o le Au Paia o Aso e Gata Ai, o loo galulue agai i le sini lava e tasi—taumafai ia avea ma ni soo o Keriso.

Ma e afai e agi le matagi, e agi le matagi. Afai e oo mai ia afa, e oo mai ia afa. O le talalelei o le tali lava lea, po o le a lava le fesili. O le a ia manumalo pea. Ua faavaeina i tatou i luga o le papa o Iesu Keriso lava lea, ma o Lana talalelei e mausali pei o le papa lea o le a sao ai tatou i taimi faigata.

Sister Holland: Ou te manatu o le naunautaiga i loto o tamaitai o le auauna atu lea i manaoga o isi. E le afaina pe o se tamaitai talavou pe matua, faaipoipo pe nofofua. Ua saunia e le Aualofa le avanoa talafeagai mo ia e auauna atu ai aua o loo i ai pea isi o loo i ai manaoga. E faapea foi, o soo se tamaitai po o se isi foi i nisi taimi e manaomia se auaunaga. E moni “E Le Uma Le Alofa” o se mataupu faavae faavavau o loo faatasi ai ma se savali malosi lea mafai e soo se tasi ona ola ai.

Elder Holland: Ia manatua o le auaunaga a le Aualofa e le faatapulaaina i le auauna atu i na o tagata o le Ekalesia. Tatou te taumafai uma e tausia i tatou lava, peitai o le usoga maoae o le Aualofa—ma e patino lava i auaunaga agaalofa—e leai ni tuaoi. E fesoasoani lena ia i tatou e feosiai ma le aiga tuaoi e le auai i le tatou lotu po o le faatasi i se gaoioiga fesoasoani i se aoga i totonu o le aai pe lagolago le faatumauina o le mama o lo tatou siosiomaga saogalemu ma o tatou tuaoi ma alalafaga.

Sister Holland: E manino lava, o le aualofa o le a faatinoina se matafaioi taua i le lumanai. O le pouliuli atili o le lalolagi, o le faateleina lea o le susulu o le malamalama o le talalelei. O le Aualofa o le ki lea i le aoaoina atu o mataupu faavae o le talalelei i o tatou uso. O le mea e aupito sili ona taua i na aoaoga o le faapea atu lea, na auina mai e le Atua lo tatou Tama Faalelagi, Lona Alo Pele e Toatasi, o Iesu Keriso, i le lalolagi. O Lana Togiola, Toetu, ma faataitaiga ua aoao ai i tatou ia maua le faatuatua ia te Ia, salamo, osia feagaiga, ma alofa le tasi i le isi. O Iesu Keriso o le malamalama e le mafai ona iuvale—o le malamalama susulu e ati i le pogisa.

Elder Holland: Na faapea mai le Mataio 7:16, “Tou te iloa i latou i o latou fua.” Mo se faataitaiga, e oo lava a o laiti la ma fanau, sa mafai ona latou matauina le tuuto o lo latou tina i le talalelei ma le matafaioi lea e faia ai e se tamaitai. E masani ona latou faatasi ma ia a o auauna i ona uso a Aualofa. O nisi o taimi latou te tatalo ai ina ia mafai ona ola la matou taavale tuai. Sa latou vaai ia te ia a o asa atu i le kiona e vaaia uso a Aualofa i Egelani Fou. Sa na o i latou o ni tamaiti laiti ae le mafai ona galo ia i latou lena mea. Na latou vaai i osigataulaga ma le faatuatua a lo latou tina ma o le taunuuga, o la ma afafine o se tamaitai o le Au Paia o Aso e Gata Ai ua matua tuuto i le auaunaga, ma o o ma atalii ua matua faaaloalogia ma le faagaeetia o le loto mo le tautinoga ma le tuuto o a ma afafine faale-tulafono. Ua manino mai le faataitaiga a lo latou tina, ua iloa ai e la ma fanau le matua maualuga o le taua o le tulaga o tamaitai i o latou olaga ma le malo o le Atua.

O isi foi, o le a faapea ona tulimataia ia faataitaiga o “fua” i olaga o Au Paia o Aso e Gata Ai—o fua ia e oo mai a o tatou galulue ia avea ma soo o le Atua soifua. O le malamalama lea e le mafai lava ona faapouliuligia. O le lumanai o le Aualofa e malamalama aua e malamalama le talalelei. O le malamalama o le malo o le Atua o le a le mafai ona mate. Ma a o faatupulaia manaoga faaletagata, o le a ilia moni lava le leo o le valaau o le talalelei. E taimua i e tauavea lena savali ma sauniunia lo latou saofaga alofa ia alii e umia le perisitua ma tamaitai Aualofa amiotonu o le Ekalesia.