Na Iu Lava Ina Ou Mauaina se Ekalesia

Sa ou lagonaina i le tele o lou olaga se lagona gaogao ma faanaunau atu i se faalagolagomaga malosi e pipii atu i ai. Sa ou masalosalo atonu ou te maua lea mea i se ekalesia, o le mea lea mai le taimi o lou laiitiiti lava, sa ou sailiili ai i le tele o tapuaiga faalelotu ma le poto faafilosofia. O le tele e lelei ma na faatumulia i tagata lelei. O isi e ese lava ma ou te le o maua ai le mea sa ou sailia.

Ina ua mavae le tele o tausaga o sailiga, na ou fiu ma le toe i ai se naunauga, ma tuu loa. Na tonu ia te au e fausia la ma sootaga ma le Atua ma aloese mai lotu ua faatulagaina.

I se taimi i le uma ai ona faia o lea faaiuga, sa ou matamata i se polokalama o le televise e taulai i le faaleagaga. Sa faatalanoaina e le sa faatautaia le polokalama se aiga o le Au Paia o Aso e Gata Ai. Sa ou lagona le alofa ma le faatuatua mausali ua leva ona ou saili i ai, a o ou faalogologo i lenei aiga. Sa matua faagaeetia foi au ina ua ou iloa e matua maualuga le faataua e le Au Paia o Aso e Gata Ai o le aiga. Atonu e toe tasi lava la le ekalesia o le a ou sailiili i ai.

I le pito i lalo o le televise, sa i ai le numera o le telefoni mo le Ekalesia a Iesu Keriso o le Au Paia o Aso e Gata Ai i le eria o Milan. Sa ou viliina ma talanoa i ni tagata i le nofoaga autu o le siteki, lea na latou taupule ma faifeautalai ia valaau mai au.

O se taimi sili lea ona pisi mo au, ma ina ua valaau mai faifeautalai e fuafua se taimi talafeagai, sa ou fesiligia pe mafai ona ou toe valaau atu i ni nai vaiaso pe a tulaga lelei ma toafimalie. Sa la malilie ma tau mai le numera o le telefoni a le peresitene o le Aualofa i le lotoifale, o le sa valaau mai ma valaaulia au ou te auai atu i le lotu i le Aso Sa. Sa ou alu, ma sa ou matua fiafia i mea uma iina; o lesona, o tagata, ma le agaga. Na ou alu ese o lagonaina le matua fiafia.

Sa ou alu i le lotu i Aso Sa uma mo le lua masina na sosoo ai. Ae ia Oketopa i le 2008, na ou papatiso ai. O lau sailiga, e le na ona ua gata; ae ua faamaeaina. Ua ou le toe lagona le galala, ma le momoo sa ou i ai.

Ua matua faatumulia au i le agaga faafetai tele ona ua ou maua le upu moni, peitai ou te faanoanoa ona o le leva faatoa ou maua le talalelei a Iesu Keriso. E ui i lea ou te faafetai mo le aafiaga na ou maua i lau sailiga. Talu ai ona o le tele o isi nofoaga na ou vaaia, ua faamalieina ai au i lou iloa ua maua le nofoaga sao—o le nofoaga tonu mo au.