Vaavaai mo le Lelei

A o sueina so latou fale fou, sa talanoa atu ai se ulugalii talavou o le Au Paia o Aso e Gata Ai i tagata o le a faamoemoe e avea ma o latou tuaoi e uiga i le pitonuu ma a’oga i le eria.

Fai mai se tasi o tina sa la talanoa atu i ai e uiga i le aoga na aooga ai lana fanau: “O le nofoaga aupito manaia lava lenei! O le puleaoga o se alii e tamalii ma lelei; o faiaoga e agavaa uma, agalelei ma amiolelei. Ua ou fiafia lava ua mafai ona auai la ma fanau i lenei aoga manaia. O le a outou fiafia iinei!”

Na fai mai se isi tina e uiga i le aoga a lana fanau: “O se nofoaga e ese le leaga. O le puleaoga e faamaualuga; e leai ma se faiaoga e agavaa, e le mafaufau, ma e paū. Ana mafai ona ou aluese ma lenei nofoaga, semanu ou te aluese nei lava!”

O le mea e malie ai, o nei tina uma e toalua, sa talanoa e uiga i le puleaoga lava e tasi, faiaoga lava ia e tasi, ma le aoga lava lea e tasi.

Ua e matauina, e masani lava ona maua e tagata le mea o loo latou sueina? Vaavaai lelei lava, o le a e maua le lelei ma le leaga i le toetoe lava i soo se tasi ma soo se mea. E faapena foi le mea ua faia e tagata i Le Ekalesia a Iesu Keriso o le Au Paia o Aso e Gata Ai talu mai lona amataga. O i latou e vaavaai mo le lelei o le a latou maua ni tagata agalelei ma agaalofa—ni tagata e alolofa i le Alii ma mananao e auauna ia te Ia ma faamanuia olaga o o latou uso a tagata. Ae e moni foi, o i latou o e vaavaai mo le leaga o le a mautinoa lava lo latou maua o ni mea e le manaia tele.

O le mea e faanoanoa ai, e i ai taimi e tupu ai lenei mea i totonu o le Ekalesia. E leai se mutaaga i fatufatuga, atamamai, ma le finafinau o i latou o loo vaavaai mo mafuaaga e faitio ai. E foliga mai e le mafai ona latou faamamuluina la latou uumau i mea faaletonu. Latou te faitatala ma saili masei i isi. E umi lava ona latou taofiofi i lagona le lelei, ma faaaoga avanoa uma e toso ai i lalo ma ta’ufaatauvaa ai isi. E le o se mea lea e fiafia i ai le Alii, “aua o le mea e i ai le mataua ma le misa, o i ai le feavaua’i ma mea leaga uma” (Iakopo 3:16).

Sa masani lelei Peresitene George Q. Cannon (1827–1901) ia Peresitene Polika Iaga (1801–77), sa la galulue vaavaalua mo le tele o tausaga, o ni sui o le Korama a Aposetolo e Toasefululua, ma sa avea ma ona fesoasoani i le Au Peresitene Sili. Ina ua maliu Peresitene Iaga, sa tusia e Peresitene Cannon i lana api o talaaga: “Ou te le’i faitioina pe saili masei i le amio a [Polika Iaga], i ana fautuaga po o ana aoaoga i soo se taimi i lo’u loto, pe o a’u upu foi po o amioga. O se fiafiaga lea ia te a’u i le taimi lenei. O le manatu sa i ai lava ia te a’u e faapea: Afai ou te faitio pe saili masei, pe faamasino ia Uso Polika, o le a se mamao ou te alu ai; afai ou te amata faia na uiga, o fea ou te gata mai ai? Ou te lei talitonuina a’u lava i se faiga faapena. Na ou iloaina, o le liliuese e masani ona iu i ai mai le matele i le agaga o le faitio ma le saili masei. O isi tagata, e malolosi atu, atamamai, ma popoto atu nai lo a’u, latou te ono faia le tele o mea ma sao mai taunuuga leaga ia e le mafai ona ou faia.”¹

O le fautuaga mamana a Peresitene Cannon o se mea lea e tatau ia i tatou o tagata o le Ekalesia ona mafaufau loloto i ai. Ua apoapoai mai le afioga a le Atua i soo o Keriso ina ia “mama, … ua filemu, e agamalu, e ganagofie, e tumu i le alofa ma fua lelei, e le alofa faapito, e le faataga fai.” Aua o i latou e faatupuina le filemu, “ua luluina foi le fua o le amiotonu ma le filemu” (Iakopo 3:17, 18).

O loo i ai sa tatou filifiliga. E mafai ona tatou saili mo le leaga i isi tagata. Po o le, e mafai ona tatou faatupu le filemu ma galulue e faasafua atu i isi le malamalama, amiotonu, ma le faamagaloga lea tatou te matuai mananao i ai mo i tatou lava. O la tatou filifiliga lava; aua po o le a lava le mea tatou te sailia, o le a tatou maua moni lava.