Sa Ou Tu Atu i Lau Aufaigaluega

I le galuega i se tasi taeao, na tau mai e le pule o le fale faigaluega i tagata faigaluega uma, e ese mai o matou totogi faaleitula, o le a amata ona maua se totogi mo soo se mea e gaosia. O le tele o mea e fai o le tele foi lea o le totogi. E fa masina o tupu lenei mea ae ou te lei alu i lau misiona, ma o le taimi nei ua sili atu tupe e fesoasoani e totogi ai.

Na matua maualuga le aofai o mea na gaosia, faapea foi o matou totogi. Sa ou galue o se tasi o tagata e toatolu i le mea e tatau ona faamalo ai ia pa’u, ma e soo se taimi lava ou te vaai ai i se molo ua sau i fafo ma taia ai le masini lea e otometi ona faitauina le aofaiga o mea ua gaosia, ou te mafaufau ua faateleina lau paleni i le faletupe.

E ui i lea, o le faaopoopoga fou o totogi, ua aliae ai ma le le faamaoni. E masani ona alu faalilolilo se tagata faigaluega i tafatafa o le masini ma taia ma toe foi i le mea e faigaluega ai. Ina ua ou vaaia lea mea na tupu, sa lulu lou ulu ma ou ataata, ma faaauau lau galuega. Sa ou lagona afai ou te le lotea fua le masini, o le a le afaina lava lou faamaoni.

Ae peitai e lei leva ae ou matauina o loo tutusa pea le aofai o lou totogi e pei o isi o lau vaega, ma sa leai se afaina tele po o ai o loo tosoina le masini. Sa ou lagona le nofo sala i le gaoi mai le kamupani e pei lava o isi. Po o le a ou faatupeina lau misiona mai tupe gaoi?

Sa ou matua popole lava i le mea e tatau ona fai. E le o se mea tele le faaopoopoga o o matou totogi. O le a faapea nisi o le toatele e le o se mea e ono faapopoleina ai, peitai sa ou popole. Sa ou iloa e tatau ona ou faafetauia au uo faigaluega.

“E te mo’i lava?” na fesili mai ai Bob (ua suia igoa), o se tagata sinia o le vaega. “Soo se tagata lava e le faamaoni. E oo lava i le pulega. Latou te talia lava.”

E na te lei iloa le mafuaaga e manaomia ai se suiga. O le a se isi mea e mafai ona ou faia? E tusa lava pe le faateleina le fuainumera o a matou gaosiga, o la matou lolomiga sa sili ona faamanuiaina i le taimi matou te faigaluega ai. E masani ona ou faalogo i isi tagata faigaluega i isi taimi faigaluega e moomoo i le fia faigaluega i la matou vaega.

Sa ou fai ia Bob, “e mafai ona ma fesuiai ma Siaki i le isi lolomiga.”

Sa ia fai mai ia te au, “Ou te manatu ua e valea, peitai e mafai ona ma galulue ma Siaki.”

Ina ua mavae ona fesuiai a ma vaega ma Siaki, e masani ona faamanatu mai e Bob le sili o ana tupe maua nai lo au. Na oo mai i lou mafaufau upu o le pese “Le Faavae Malosi” “Ia aua le fefe, ou te i ai ia te oe.” O na upu na fesoasoani ia te au ia ou le amanaia ai le ula mai o Bob.

E lei leva lava ae sau Bob ia te au. Fai mai o ia e le fetaui le galue a Siaki, ma sa mananao lau vaega ou te toe foi atu. Sa faateia au. Sa ou fai atu ia Bob o le a ou foi atu, peitai e le mafai ona toe i ai ni mea taufaasese. Sa ioe o ia. Sa toe faafeiloai fiafia au e lau vaega, ma faagata ai ma le taufaasese.

Sa ou iloa o le a tofotofoina au ae ou te lei alu i lau misiona, ae ou te lei iloa o le a tofotofoina lou faamaoni ma lou lototoa. Ou te lagona le agaga faafetai i le faatuina o au e le Alii i Ona “Aao amiotonu” i le taimi na ou manaomia ai le malosi e faia le mea sao.¹