Ae a Lau Matata?

Ua amata ona sologa manuia mea uma. Ua maea lou faauuga mai le Iunivesite o Oxford ma le faailoga i mea tau musika, ma amata galue mo se faili faapolofesa i Edinburgh, Sikotilani. Sa siisiitia lau matata, ma sa ou maua ni uo se tele.

Ona o le aoga, sa ou filifili ai e faatuai le faia o sau misiona. Ma na oo ina mamao lou manatu mai le faia o se misiona. O le popole i le tele o mea, aemaise le popole i le motusia o lau galuega, ma sa ou manatu ai e faaesea au ma e le manaomia ona ou auauna atu. Na foliga mai e matua maoae lava osigataulaga na aofia ai.

Ae ui i lea, o uo lelei ma aafiaga mafanafana ma le Agaga, na amata suia ai lou loto. O le popole alofa ma le mataala o le epikopo sa fesoasoani i lou mauaina o se molimau malosi ma le loloto o le talalelei toefuataina. Sa vave ona ou iloa ua tatau ona ou talia se valaauga e auauna atu. Ou te le iloa pe faapefea ona ou toe maua lau galuega i se siosiomaga faatautava i le alu ese ai mo le lua tausaga, peitai sa ou talitonu o le a faamanuia au e le Alii i lau filifiliga. Na ou tuua lau galuega ma le le iloa pe faapefea le sologa o mea uma.

Sa valaauina au ou te auauna atu i le Misiona i West Indies, lea e tautatala faaFarani. Sa faigata luitau, peitai sa ou fiafia e auauna i tagata ma vaaia le suia o o latou olaga. I lena lua tausaga sa ou taulai atoa i le sailia o le finagalo o lou Tama i le Lagi. O le auauna atu i isi ma le le manatu faapito na ou maua ai le olioli sili nai lo soo se isi lava ou aafiaga.

Ina ua ou toe foi i lou aiga, sa ou vaai i le lalolagi mai se vaaiga o ni faavasegaga fou ma tulaga faataua, ma na ou saili ia faatumauina pea le totonugalemu o lou olaga i le talalelei a Iesu Keriso. Sa ou saili vave mo se galuega, peitai sa utiuti avanoa. Ina ua maea le anoanoai o faatalanoaga le faamanuiaina, sa ou mautinoa ai o le lua tausaga sa ou i ai i se galuega e le fesootai ma lau matata ua mafua ai ona teena au e le tele o pule o fale faigaluega. Faamata o lau misiona ua aafia ai lau matata?

Ou te faafetai o le tali e leai. Toeitiiti tolu masina mulimuli ane ae ou iloa ai se avanoa e fetaui tonu lava ma au. Sa ia te au tomai tonu mo le ituaiga o galuega o loo aafia. E le gata i lea, ae o tagata na manaomia e tautala i le gagana faaFarani! Sa tatalaina e lau misiona le faitotoa mo lenei avanoa. Na ofoina mai le galuega ia te au i le maea o faatalanoaga e tolu. O lau galuega foi ua sili atu nai lo le tulaga semanu e oo i ai pe ana ou le faamisiona. Sa ou lagona le alofa mutimutivale ma le alofa o le Alii. Ua ou iloa e Na te saunia faamanuiaga mo tatou pe a faia la tatou vaega.

E moni mea ua aoao mai e le Perofeta o Iosefa Samita: “O lea, uso pele e, sei tatou faia ma le fiafia mea uma o loo i ai i lo tatou mana; ona mafai ai lea i tatou ona tumau lava ma le mautinoa mausali, e vaavaai atu i le faaolataga o le Atua, ma le faaalia o lona aao” (MFF123:17).