O Le Teineitiiti ma Ona Laumata Fiafia

Sa ma sauni ma lo’u faiaoga piano mo le tele o masina mo le aso lenei. Sa ou auai i se tauvaga faaletausaga e ta’ua o le Aloaiaina o Musika, lea e faatulaga ai tamaiti aoga musika i soo se mea lava—mai le malamalamaaga i mea tau musika i le faaleoteleina ma le faaitiitia o leo o se pese ua taulotoina. Na iu lava ina oo mai le aso ma na oo faatasi mai ma lou popole.

O le vaega pito i taufaafefe o le tauvaga na aofia ai musika na faatinoina mo faamasino. Na ou iloa lau vaega, ae na tetete ou lima a o ou taina [le pese].

Na maea le faafiafiaga na ou popole tele ai. Ua mafai ona ou malolo aua ua na o lau lipoti tusitusia e tuuina atu e uiga i se fatupese. Sa ou maua se nofoaga sao ma faatali ai i le laina i luma o faitotoa e lua. Ma lou fia iloa tele, na ou tilotilo atu ai i totonu o le faitotoa i le itu tauagavale. Na faamalosiau atu se faiaoga lelei i tamaiti aoga a o latou ulufale atu ma le fefefe ma latou faamasani ai. Na manino lona manao ia aveese lo latou popole.

Ona ou tilotilo lea i totonu o le potu i le itu taumatau. Sa i ai se isi faiaoga piano, e matua atu, ae na foliga saua ma na mafua ai le maluluina o ou lima. O le tele o lou iloaina atu o la latou fesootaiga ma tamaiti aoga, o le tele foi lena o lou fefe. Pau lava lou manatu na i ai o le, “Talosia ae ou maua le faamasino muamua.”

Na ou faitau ma toe faitau lau lipoti. Ina ua ou oo i le pito i luma o le laina, na ou talotalo ia muamua uma le tagata i le itu tauagavale. Sa ou te’i, na amata ona savali mai le tamaitiiti aoga mai le itu taumatau i le faitotoa. E leai ma se auala e mafai ai ona ou alu iina. Ona oo mai lea o se manatu ia te au, “Na o le faaali lava o se ataata lapoa.”

Na ou savali i totonu ma se tuuoso i la’u laa ma se ataata lapoa ou te le’i faaalia muamua lava. E pei ona latou fai mai, o le faaalia o uiga fiafia, e te lagona ai le fiafia. Na ou ataata a o ou faatalofa atu i le faamasino. Ona faitauina lea o lau lipoti i se leo manino, ma fai ma taofi i lea taimi e ataata atu ia te ia. I le faaiuga o lau lipoti, na ou faafetai ai ia te ia mo lona taimi. E le’i toe foliga taufaafefe o ia. A o ou savali i fafo mai le potu, na ou lagona le mafanafana ma le fiafia.

I nai masina mulimuli ane na ou faalogo ai a o faitauina e lo’u faiaoga piano faamatalaga mai i faamasino. I le faamatalaga mulimuli na ia faapea mai, “Oka, na e matua faafiafiaina lava lenei faamasino. Na ia tusia, ‘Michelle, o le teineitiiti ma ona laumata fiafia.’” Ou te le’i tau fesili ia te ia po o ai na tusia lena mea.

O le suia o lau amio na fesoasoani lea ia te au e faia le mea silisili. Soo se taimi lava e i ai se mea faigata ou te faia, nai lo le faaalia o lou le naunau, ou te filifili e faia ina ia faamanuiaina ma faafiafiaina. Ou te iloa o lau amio e aafia ai ou aafiaga. E ala i le tumau ai ma se amio lelei, ua ou aoao ai e fiafia i ou luitau.