Na suatia e Peresitene Thomas S. Monson le eleele mo le Malumalu o Roma i Italia i le aso 23 o Oketopa, 2010. Sa faasilasila mai i le lua tausaga na muamua atu, o le malumalu e fogafale tolu, 40,000 futu faatafafa (3,700 mita faatafafa), o le a avea ma malumalu lona sefululua i Europa ma o le malumalu muamua i Italia. A faamaeaina, o le a tautuaina ai le au paia i Italia ma atunuu tuaoi. O le tulaga e 15-eka (6 ha) o le a avea ma se nofoaga autu faalelotu ma faaleaganuu o le a aofia ai ni falelotu e mafai ona faaaoga i ni fuafuaga eseese, o se nofoaga autu mo tagata maimoa, o se nofoaga autu mo talafaasolopito o aiga, ma se nofoaga e faamautu ai le au paia e malaga atu i ai.

Sa suatia e Elder Neil L. Andersen o le Korama a Aposetolo e Toasefululua le eleele mo se malumalu i Córdoba, Atenitina, i le aso 30 o Oketopa, 2010. O le tulaga sa tu ai se tasi o falelotu muamua lava o le Ekalesia i Atenitina. “O se mea matagofie ona o lona faamoemoega mulimuli lava o le faaaoga lea mo le maota o le Alii,” na saunoa ai Elder Andersen. O le a avea ma malumalu lona lua i Atenitina. O loo i ai foi se malumalu i Buenos Aires.

O le Susuga ia Elder Claudio R. M. Costa o le Au Peresitene o Fitugafulu sa suatia le eleele mo le Malumalu o Gilbert Arisona, i le aso 13 o Novema, 2010. O Malumalu o Gila Valley Arisona ma Gilbert Arisona, sa fofogaina mai i le aso 26 o Aperila, 2008, o malumalu muamua ia na fofogaina e Peresitene Thomas S. Monson ina ua avea o ia ma peresitene o le Ekalesia. O le Malumalu o Gilbert Arisona o le a fa i ai malumalu o Arisona. O le malumalu lona lima, le Malumalu o Phoenix Arisona, o loo i ai lava i ona tulaga o le fuafuaina.