O Le Itu Lelei o le Ū a se Taifau

I le taumafanafana o le 2009, sa ‘ai ai o’u foliga e le taifau a la’u uo. O le mea na leaga ai, na u e le taifau lo’u laugutu ma masae ai, ma sa manaomia ai ona suiina.

Ina ua mavae le faalavelave, sa matuai ou faanoanoa lava. Sa ou faatagaina le faafitauli e pulea ou mafaufauga, ma na ou lagona ai le pei na matuai faaleagaina atoa lo’u olaga. Sa ou mā ona o lo’u laugutu ma ou te le’i fia alu i nofoaga tumutumu. I lo’u mafaufau o au fuafuaga mo le piano, volipolo, lotu, aau, ma le aoga na olopalaina e lo’u manua.

Ae o taimi uma lava ou te tatalo ai, maua faamanuiaga faaleperisitua, talanoa ma o’u matua, ma asiasi mai lo’u aiga ma uo, sa siitia ai lo’u agaga ma ou lagonaina ai le fiafia i le taimi o le faanoanoa. Sa le’i pine ae ou iloaina, afai sa mafaufau tagata i lo’u manuaga, sa latou lagonaina le agalelei.

O lenei aafiaga sa fesoasoani e fausia ai lo’u tagata, ma sa ou aoaoina ai e aua nei ou popole i manatu o isi tagata e uiga ia te a’u. Sa faamanuiaina foi au aua na fesoasoani lo’u manuaga ou te iloa ai e tatau ona faaitiitia lo’u mafaufau ia te a’u lava ia ae amata ona faateleina lo’u manatu alofa mo isi. Sa matuai faamalosia lo’u agaga i lenei taimi.

Sa ou aoaoina o faigata o se vaega o le fuafuaga a le Tama Faalelagi mo i tatou. Afai tatou te vaavaai mo le lelei ae le o le leaga, e mafai ona tatou faatoilaloina mea faigata, avea ma se tagata lelei atu, ma faatagaina le aafiaga e faamalosia a tatou molimau.