Pe Tatau Ona Ou Alu pe Nofo?

Na ou mauaina se avanoa lelei ina ia faamasani atu ai i Le Ekalesia a Iesu Keriso o le Au Paia o Aso e Gata Ai e ala mai i se uo. Na aoaoina au e faifeautalai o e na valaauina e le Atua e aumaia le malamalama o le talalelei i le lalolagi. E lua tausaga talu ona mavae lo’u papatisoga na valaauina ai au e auauna atu i le Misiona a Italia Milan. Ae ou te le’i alu, na ou mauaina se aafiaga maoae faaleagaga.

Sa le’i fiafia ou matua, o e le auai i le Ekalesia, i lenei avanoa faafaifeautalai. O a matou feupuaiga le lelei na mafua ai ona tele lou pagatia.

E lua aso ae ou alu i lau misiona, na faafuasei ai ona matua mamai uma ou matua. Sa i ai se faaletonu faalesoifua maloloina a lou tina lea na faataotolia ai i le falemai. Na foliga mai ua siliga taumafaiga a fomai. Na aafia lou tama i se faamai o le ate, lea na fai mai fomai e faigata ona toe manuia.

I lena afiafi na ou tootuli ai ma tatalo i lou Tama Faalelagi, ma faapea atu, “Tama, fesoasoani mai ia te au. Ua mama’i lou aiga, ma e le mafai ona ou tuua i laua i nei tulaga. Ou te tatalo atu, Tama e, ia fesoasoani mai ia ou iloa pe talafeagai le alu po o le nofo.”

Na ou mafaufau i lou tulaga mo ni nai minute. Ona ou faalogoina lea o se leo itiiti ae mautinoa o loo faapea mai, “Ia faatuatua, ma o le a sologa lelei mea uma lava.”

E ui lava i lou lagona faanoanoa i le vaai atu i le tulaga le manuia o le soifua maloloina a lou aiga, ae na ou filifili lava ou te oso i le vaalele e aveina au i Roma ona sosoo lea ma le Iunaite Setete, lea ou te auai ai i le nofoaga autu mo aoaoga a faifeautalai. E le’i fiafia ou po i le NAAF. Na ou mafaufau pea lava pea e uiga i ou matua. Mulimuli ane, ma se faatagaga mai le peresitene o le NAAF, na mafai ona ou vili e siaki po o a mai i laua.

Na tau mai e lou tina i luga o le telefoni ma le fiafia tele na la maua ma lou tama se vavega mai le Alii—o ni upu ou te le’i faamoemoe e faalogoina mai se fafine e le tele se faatuatua. Fai mai o ia ia te au ina ua ou alu, na faaleleia lo la soifua maloloina, ma na le mafai ona faamatalaina e fomai. Na manuia ma fiafia ou matua. Na faatumulia lou olioli.

Mai lenei aafiaga, na tuputupu ae lau molimau i le mana o le faatuatua, tatalo, ma le usiusitai. Ou te faafetai na tausia e le Alii lou aiga i le taimi o lau misiona.