E Fetalai mai le Tama Faalelagi ia i Tatou e ala mai i Ana Perofeta

Afai e te manaomia ona talosagaina se tasi e tuuina atu se savali taua i tagata e te alofa i ai, o le a le ituaiga o tagata e te talosagaina? Atonu o le a e filifilia se tasi e faamaoni, faamoemoeina, ma faatuatuaina.

E tuuina mai e le Tama Faalelagi Ana savali i Ana fanau i le lalolagi e auala mai i perofeta. E Na te silafia e faamaoni, faamoemoeina, faatuatuaina, ma amiotonu Ana perofeta.

I totonu o tusitusiga paia tatou te faitau ai i tusitusiga a le tele o perofeta o e na tusia savali musuia na tuuina mai e le Tama Faalelagi i Ana fanau. Ia tatou aoao e uiga i nisi o tusitusiga a perofeta i totonu o tusitusiga paia.

Na auina atu e Malaki i tagata le savali a le Alii e uiga i le totogiina o sefuluai ma taulaga (tagai i leMalaki 3:8–10).

Na tuua e Alema le Itiiti lona tofiga o se faamasino sili ina ia avea o se faifeautalai i le nuu (tagai i leAlema 4:15–20). Na ia faasoaina atu le savali a le Atua i le toatele o tagata.

Na tuuina mai e Moronae le savali a le Tama Faalelagi ia i tatou uma lava ina ua ia tuuina mai lenei folafolaga e uiga i le faitauina o le Tusi a Mamona: “Pe a maua e outou nei mea, ou te apoapoai atu ia te outou, ia outou ole atu i le Atua, le Tama Faavavau, i le suafa o Iesu Keriso, pe le moni ea nei mea; afai tou te ole atu ai ma le loto faamaoni, ma le manatu tonu i ai, ma le faatuatua ia Keriso, na te faaalia le tonu i ai ia te outou i le mana o le Agaga Paia” (Moronae 10:4).

Na tuuina atu ia Iosefa Samita se savali faapitoa mai le Tama Faalelagi ma Iesu Keriso (tagai i leTalafaasolopito a—Iosefa Samita 2:11–20). Na faaaluina le olaga o Iosefa Samita e folafola atu ai lena savali i tagata uma.

Ua faamanuiaina i tatou i le i ai o se perofeta i le taimi nei. Ua mafai ona tatou faalogo i savali mai le Tama Faalelagi a o tatou faalogo atu i le perofeta.