“Na Veika Kece Oqo sa Vakalougatataki Au”

Kevaka e siga Vakarauwai, o na raici Elvira Guagliarello ni na osooso sara tiko e valenikuro e nodratou mai Puerto Madryn, ka tiko ena Toba o Nuevo ena baravi kei Argentina ena ceva ni yasana o Chubut.

Ena vakarautaka eso na valawa kei na wai ka wakia vata kei na so tale na kena gacagaca. E sega ni dau vosa vakalevu ni cakacaka tiko, ka sa na kilai ga ena cakacaka e vakayacora tiko. Ni o koya e dua na italai ni Turaga.

“Au yalo vakacegu niu kila niu cakava tiko e dua na cakacaka vinaka,” e kaya o Sister Guagliarello ni sa ulia vata tiko na gacagaca kece o ya. E dau vakasamataka na iVakabula ni cakacaka tiko, ka yalo marau ni sa kila tiko ni vua ni nona veiqaravi oqo ena vukei ira na lewe tale eso ni Lotu mera nanumi Koya.

Sa yabaki 82 o Sister Guagliarello, ka taleitaka na nona ilesilesi ni dauveisiko, veivuke ena kena liutaki na sere ena nona tabanalevu, ka dau vavia na madrai me laki vakayagataki ena cakacaka vakalotu ni sakaramede—ka sa voleka ni 10 na yabaki na nona gumatuataka tiko vakalevu na veikacivi oqo. Ena itekivu ni macawa e dau vavia rawa e dua na kena ibuli madrai, ia ena siga Vakarauwai kece ena tiko na nona gauna me vavi madrai kina “me baleta sara ga na Lotu,” e kaya o koya. “Au dau tukuna, ‘O au meu vavi madrai, kau meu gole ki lotu.’ Meu kua ni guce.”

Ni tu vinaka na yagona, e dau curu ki valetabu—o ya ena veiyabaki me vodo basi me 20 taucoko na auwa ki na vualiku me yacova na Valetabu e Buenos Aires Argentina.

“E dau marautaka voli o Sister Guagliarello me veiqaravi ena sala cava ga e rawata,” e kaya o nona bisopi, o Jesús Santos Gumiel. “Era sa nuitaki koya tikoga na lewe ni nona tabanalevu. Se cava ga na yabaki ni nona bula, e yalodina tikoga ki na kena vakarautaki na madrai ena vei-Siga Vakarauwai kei na nona gole ki lotu ena vei-Siga Tabu. E ivakaraitaki vinaka sara o koya.”

A sotavi rau na daukaulotu o Sister Guagliarello ena 1962 mai Mar del Plata, ena ceva kei Buenos Aires, ni a cakacaka tiko ena bure ni vulagi rau tiko kina. Ena gauna sa kilai rau kina ni rau tukituki ena veikatuba ni oti e 15 na yabaki, ni sa laki vakaitikotiko e Puerto Madryn, a taura sara na lesoni, papitaisotaki, ka tekivu sara ena dua na bula veiqaravi ena Lotu.

Nikua sa mai tiko ga vakataki koya, ia e sega ni galili. Sa tu ga vua na nona ivolanikalou kei na nona matavuvale ni tabanalevu, ka dau veivosaki kei na Tamana Vakalomalagi ena masumasu. Me kena ikuri, e dau taleitaka na veitokani kei na Yalotabu, sa yalataka tu na Turaga vei ira era na qaravi Koya ni ra veiqaravi vei ira na tamata.¹

“Na veika kece oqo sa vakalougatataki au,” e matadredredre ni cavuta oqo o Sister Guagliarello. “Na Lotu e solia vei keda na cakacaka, kau marautaka. E reki na yaloqu niu qarava tiko na Tamada mai Lomalagi.”