J. Reuben Clark Jr.: E Dua na Turaga e Vakaisolisoli Cecere

A sucu o Joshua Reuben Clark Jr. e Grantsville, mai Utah, ena 1 ni Sepiteba, 1871. E dina ga ni sega sara ni vuli vinaka ka sega ni rawa ni laki vuli torocake, a vakavulici koya ga kina o tinana, ka taleitaka sara o koya na vuli. A taura o koya na imatai ni icocovi ena nona kalasi ena Univesiti o Utah ena koroi ni vakadidike (science degree) ka laki taura sara nona koroi ni lawa (law degree) ena koronivuli ni lawa mai na Univesiti o Columbia ena Siti o Niu Yoka.

A vakamau o Brother Clark vata kei Luacine Annetta Savage ena Valetabu e Salt Lake ena 1898, ka rau itubutubu ni va na gone.

Ena nona sa mai vakaiyaragitaki koya tu ena koroi ni lawa kei na vuku sa tu vua, sa laki vakacagau sara na nona cakacaka ni veika vakalawa kei na ilesilesi vakamatanitu o J. Reuben Clark Jr. me yacova sara ni sa laki mata kei Amerika ki na vanua o Mexico ena 1930. Sa mai tini na cakacaka kece oqori ena gauna sa mai tokoni kina o Brother Clark me iKarua ni Daunivakasala vei Peresitedi Heber J. Grant ena Mataveiliutaki Taumada ena ika 6 ni Epereli, 1933. E dina ga ni sa bete levu tiko ena gauna o ya o koya, e sega ga ni Vakaitutu Raraba. A tabaki o koya me iApositolo ka laki tokoni sara me imatai ni Daunivakasala vei Peresitedi Grant ena Okotova ni 1934. A yaco sara o Peresitedi Clark me laki daunivakasala vei Peresitedi George Albert Smith kei Peresitedi David O. McKay.

E dua vei ira na vuqa na nona cau ki na Lotu, na kena e totoka duadua o ya na nona ivakaraitaki ni yalomalumalumu ena gauna sa kacivi kina o David O. McKay me Peresitedi ni Lotu. A kacivi Peresitedi Clark kina me nona iKarua ni Daunivakasala. Ena vuku ga ni sa veiqaravi tu mai vaka iMatai ni Daunivakasala o Peresitedi Clark ena vica na Mataveiliutaki Taumada, eso era nanuma ni sega soti ni vinaka o koya, ia a qai vakamacalataka o Peresitedi Clark: “Na veiqaravi vua na Turaga, e sega ni baleta na vanua o na veiqaravi kina ia o na cakava vakacava. Ena loma ni Lotu i Jisu Karisito ni Yalododonu Edaidai, ena taura na tamata yadua na vanua sa kacivi kina, na vanua oqori e sega ni digitaka se vakasuka o koya.”¹

A mate o Peresitedi Clark ena ika 6 ni Okotova, 1961.