Na Nona Rarawa sa Mamada kina na Noda

Me vaka niu nasi ena vanua ni veiqaravi bibi vei ira na gone, au dau qaravi ira na gonelalai tauvimate, ka so na gauna eso na gone somidi sara. Ena dua na bogi au a lesi vua e dua na cauravou ka a sucu ni se vo tu e 17 na macawa mai na gauna me qai lako mai kina ka sivia ga vakalailai na dua na paudi na kena bibi (0.5 kg). E somidi na ligana, na temo ni yavana lalai e vaka beka ga na ilevu ni noqu iqaqalo, kei na yavana e vaka beka ga na ilevu ni noqu idovi ni kakana. Ena bibi ni kena ituvaki era sega kina ni namaka na vuniwai me na yacova na mataka ka tarava.

E dau lutuka na taba ni veiqaravi oqo e dua na vakadigagalu ni saga tiko e dua na gone sucuvou me bula. E levu cake na nodra lomaocaoca na tamata kece, vakabibi na nona nasi na gonelailai, ia ena bogi nikua o au oya. Erau a tiko ga vata kei koya na nona itubutubu ena siga taucoko; ia erau sa oca. Sa lesu tale o tinana ki na nona rumu me laki vakacegu kina ni gadreva sara vakalevu.

E tu ena nona rumu na gonelailai e dua na kato iloilo, na sikirini, sala ni cagi, kei na ipamu ni IV ka ra vakabulai koya tiko. Baleta ni sa rui tauvimate bibi ka gadreva na veiqaravi vakatabakidua, a sega ni lesi vei au e dua tale na tauvimate ena bogi ko ya. Au na tiko ga e yasana ena bogi taucoko, ka na osooso tiko ena soli wainimate, vakadikeva tiko na toso, veiqaravi kei na vakatovotovo.

Ni toso na bogi, au tovolea meu raitayaloyalotaka se na vakacava na lomaqu kevaka au tinana. Au na sega beka ni taura rawa na mosi ni yaloqu.

Au savata vakamalua na matana, tara na ligana lalai kei na yavana, veisautaki koya ka vakadavori koya ena dua na itutuvi vou malumu. Au vakataroga se cava tale au rawa ni cakava vua na noqu tauvimate lailai. Na cava beka ena cakava na tinana? Na cava ena vinakata na Tamaqu Vakalomalagi meu cakava?

Ena sega ni dede sa na lesu tale vei Tamana mai Lomalagi na yalo talei ka savasava oqo. Au taroga de na rere tu beka. Au vakasamataki iratou na luvequ. Ena gauna eratou se gone kina ka dau rere, au dau lagasere vei iratou. “Au Luve ni Kalou” na nodratou sere taleitaki. Au vosota na noqu via tagi, ka lagasere vua na gonelailai.

Me vaka niu dua na nasi au raica na paipo lalai kei na dra, wilika na cere kei na lutu ni serena na gonelailai, rogoca na tatuki ni nona uto, ka wanonova na matanivika ena sikirini. Me vaka niu Yalododonu Edaidai au raica e dua na yalo vakasilesitieli ka qoroya na ituvatuva ni veivakabulai.

Ni toso na bogi, sa lutu sobu na nona bula. Sa yaco e dua na ituvaki ka vakavuna na kena drodro na dra ki na nona yatevuso.

Ena mataka a curu galugalu yani ena maliwa ni ilati na noqu tauvimate lailai. A biuta na ligai tinana ka “kau yani ki vua na Kalou ka a buli [koya]” (Alama 40:11).

Au a toro voleka vua na iVakabula kei na Tamada Vakalomalagi ena bogi ko ya. A tarai cake kina e dua na kila ka levu cake me baleta na nona lomani ira na kawatamata na Turaga—kei na Nona lomani au. A vakananumi vei au, kau kurabui kina, ena titobu ni loloma au vakila me baleti Koya. Kau vakila na noqu gadreva meu dau yalovinaka cake, dau ivalavala malua cake, dau veivosoti cake, dau yalololoma cake—me vakataki Koya cake—dua na siga ka dua na tatuki ni uto ena dua na gauna.