Macawa ni Siganimate
E rawa ni o vakavakarau ki na Siganimate ena nomu vulica na veika a yaco ena macawa ni bera na Nona Vakamatei ena Kauveilatai ko Jisu Karisito kei na nona Vakaturi Tale mai na mate. A tekivu ni se vo e walu na siga ni bera na Siganimate, wilika na ka a yaco kei na tiki ni ivolanikalou sa tuvai tu me baleta na veisiga yadua.
Vakarauwai
Sa vo ga e ono na siga ki na dua na siga ni vakacagicagi bibi ka vakatokai na Lakosivia. E vuqa na tamata era lako tiko mai ki Jerusalemi me ra mai vakacabo isoro ena valetabu ena siga ko ya. A taubale ko Jisu ki Pecani, e dua na koro volekati Jerusalemi. Me na tiko e kea me lima na bogi kei iratou na Nona itokani o Lasarusa, Meri, kei Marica. A lumuta na yavana ena waiwai ko Meri.
Raica na Joni 12:1–3.
Sigatabu
A taubale mai Pecani ki Jerusalemi o Jisu. A vodo yani ena dua na asa ena loma ni siti, me vaka a tukuna na Veiyalayalati Makawa. Era a kila na tamata ni sa i Koya na nodra Tui ka ra kailavaka, “Osana,” ka ra biuta na drau ni niu ena vanua e lakova yani na asa me kakua kina ni tara na iVakabula e dua na kuvu ni qele. A lako ko Jisu ki na valetabu ka lesu tale ki Pecani.
Raica na Sakaraia 9:9; Maciu 21:1–11; Marika 11:1–11.
Moniti
Raica ko Jisu ni ra volivolitaki tiko ena valetabu. Baleta ni vinakata ko Koya me “vale ni masumasu na valetabu,” A vakavuna me ra lako tani mai kina. Qai vakabulai ira na gera kei na mataboko. Era a cudruvi Koya na bete loma ca.
Raica na Maciu 21:12–17; Marika 11:15–19.
Tusiti
A vakavulici ira na tamata ko Jisu ena valetabu ka vakakina ena dua na delana voleka ka vakatokai na Ulunivanua ni Veiolive.
Era a nakita na bete me ra vakamatei Jisu. E dua vei ira na Nona tisaipeli, o Jutasa Isikarioti, a vakadonuya me soli Jisu yani vei ira na bete me kena isau e 30 na tikinisiliva.
Raica na Maciu 25:31–46; 26:14–16.
Vukelulu
E sega ni tukuni ena ivolanikalou na ka a cakava ena siga oqo ko Jisu. A rairai tiko ga vata kei iratou na Nona tisaipeli ena siga oqo. E rawa ni o wilika na vosa vakatautauvata ni tini na goneyalewa, e dua na italanoa a vakavuvulitaka ko Jisu vei ratou na Nona tisaipeli me vukei iratou ena nodratou vakavakarau ki na iKarua ni Nona Lako Mai.
Raica na Maciu 25:1–13.
Lotulevu
Eratou vakavakarau na tisaipeli nei Jisu ki na kana ni Lakosivia. Ena gauna ni kana, a tukuna kina o Jisu vei iratou na tisaipeli ni dua vei iratou ena soli Koya yani. Ia, me vukei iratou me ratou dau nanumi Koya tikoga, a solia kina vei iratou ena imatai ni gauna na sakaramede. A lako yani ko Jisu ki na Were ko Kecisemani me vakararawataki ena vuku ni noda ivalavala ca ka masu vua na Kalou. Era lako mai na tamata vakaiseleiwau ka vesuki Koya. Era a dro yani na tisaipeli ena rere.
Raica na Maciu 26:17–29, 36–56.
Vakaraubuka
A kau ko Jisu vua na bete levu ko Kaiafa. Sa cakitaka ko Pita na tisaipeli nei Jisu na nona kilai Koya. A vakatarogi ko Jisu mai vua na kovana ko Pailate, kei Eroti. Sa vakacacani me mate ena kauveilatai. Sa vakamatei ena kauveilatai ko Jisu. E dua na tamata vutuniyau ka yacana ko Josefa a vakadavora na yagoi Jisu ena nona ibulubulu. Eratou a sikova yani na ibulubulu o Meri na tinai Jisu, kei Meri Makitalena.
Raica na Maciu 26:57–72; 27:1–2, 27–37; Luke 23:44–46, 50–56.
Vakarauwai
Ni sa vakadavori na yagoi Jisu ena ibulubulu. A vaqiqici e dua na vatu levu ena katuba. Eratou kerei Pailate na bete dau caka ca me ra tu na yadra ena mata ni ibulubulu me ra raica me kakua ni dua e lako ki loma.
Raica na Maciu 27:57–66.
Sigatabu ni Siganimate
Sa vakaturi cake tale ko Jisu! A lako mai lomalagi e dua na agilosi ka vaqiqica tani na vatu.
E tukuna ko Jisu vei iratou na Nona tisaipeli me ratou vakavulici ira ka papitaisotaki ira na tamata ka yalataka me ra tikoga vata kei ira.
Raica na Maciu 11:28.
iTaba ai vei Matthew Reier; e cake, mai na imawi: Sa Lako Yani ki Pecani ena Bogi ko Jisu, mai vei James Tissot; Curu Vakatui ki Jerusalemi na Karisito, mai vei Harry Anderson © IRI; Vakabulai na Tamata Mataboko, mai vei Harry Anderson, iloloma mai na Pacific Press Publishing, Inc., me kakua ni lavetaki; Na Domo mai Loamalagi, mai vei James Tissot; matailalai mai na E lima Vei Ira e Vuku, mai vei Walter Rane, iloloma mai na Church History Museum; Karisito e Kecisemani, mai vei Harry Anderson © IRI; matailalai mai naNa Vakamatei ena Kauveilatai, mai vei Harry Anderson © IRI; Na Bulu i Karisito, mai vei Carl Heinrich Bloch, vakayagataki ena veivakadonui ni National Historic Museum e Frederiksborg mai Hillerød, Denmark, me kakua ni lavetaki; e ra: Sa Tucake Tale ko Koya, mai vei Del Parson