Sau ni Veivakavoui

Me vaka niu vakaitikotiko e Shanghai, Jaina, A noqu na madigi meu lako vata kei ira e dua na ilawalawa gonevuli ki na Yasana ko Sichuan ena cevaira kei Jaina me veivuke ena tara vale me baleti ira na vakaleqai ena uneune ka a vakacaca ena vanua ko ya ena vica na yabaki sa oti. Keimami cakacaka vakaukauwa ena kena tuvai na buloko, sivi simede, bili bara ka sinai tu ena buloko, ka soli buloko yani vei ira ena “laini ni tuva buloko.” Ena ikarua ni siga sa mosi na dakuqu, ka sa qaqara na noqu qaniliga. Ia e sega ni guilecavi rawa na ilakolako ko ya ka vaqaqacotaka na noqu ivakadinadina me baleta na kequ yaga kei ira na tamata yadua, e dua na yavunilewa ni Goneyalewa.

Niu cakacaka tiko vakaukauwa e veisiga yadua, au raica na kena tubu cake na noqu vakabauta na kequ yaga. Au marautaka na noqu rai me baleti au niu cakava tiko eso na ka me vinaka cake kina na nodra ituvaki ni bula o ira era sega soti ni kalougata vakalevu me vakataki au.

A basika talega e dua na madigi me keimami sikova e dua na koronivuli ena vanua ko ya. Ni keimami yaco yani, era cicivi keimami mai e dua na ilala gonelalai matavinaka. Niu raici ira na gonelalai vakasakiti oqo, au kila talega na kedra dui yaga yadua. Era luvena totoka yadua na Kalou, kau vakila vakaukauwa sara ni lomani ira o Koya ka kilai ira yadua.

Ni voleka me cava na ilakolako ko ya keimami a lako ki na dua na otela, me keimami laki vakasigalevu kina. Ni keimami yaco yani, keimami qai kila ni sa vakarusai ena uneune. Oqo na vakacaca levu duadua au se qai bau raica. E voleka meu tagi. Era kasura na siligi kei na lalaga ni veivale, era babale na veivunikau era tu voleka, ka tu ena veivanua kecega na icaca ni vale. E dua na vatu levu e qiqi mai na ulunivanua ka mai tao ena yasa ni dua na vale, ka vakavuna na kena kasauru ki loma na siligi kei na lalaga. E dua na ivava e davo koto ena dua vei ira na matanikatuba.

Niu vakasamataka na tikina oqo kei na nodra sa mate na tamata ena leqa oqo, e dredre na noqu tovolea meu ciqoma na nona vakatara na Tamada Vakalomalagi me yaco na ka oqo. E sega beka ni lomani ira? Au qai vakasamataka lesu na veika keimami a veivosakitaka ena kalasi ni Goneyalewa kau qai kila ni io, e lomani ira dina o Koya. E kilai ira yadudua ka lomani ira. O ira era a mate ena siga ko ya era luvena kece na Kalou. Taumada, a vakararawataki au vakalevu tale na noqu vakasamataka tiko oqori. Ia au qai kila ni o ira oqo era a tu mai na vuravura ni yalo ka rawa ni ra lesu tale vei Tamada Vakalomalagi. Na vakasama oqori e kauta mai na vakacegu ka solia vei au na yalo ni sautu.

Au kila niu luvena na Kalou, ka levu sara na kequ yaga. O keda kece eda luvena na Tamada Vakalomalagi, ka kilai keda yadua. E lomani keda ena dua na loloma e titobu cake ka kaukauwa cake mai na ivakarau eda rawa ni vakasamataka. Na kila ka oqo a tei vakatitobu sara e yaloqu ena noqu cakacaka vata ka veiqaravi ena kedra maliwa na tamata era a kune rarawa vakaca sara ena uneune mai Sichuan.