Au Sega ni Taleitaka na Lotu

Au sega ni vinakata meu kila e dua na ka me baleta na Lotu ena gauna e tarogi au kina na watiqu kevaka e rawa ni rau vakavulica na luvei keirau tagane na daukaulotu. Ia au sega ni tukuna na sega baleta ni sa lewenilotu rawa tiko o koya.

Ni rau sa tekivu lako mai vakarua ki vale ena dua na macawa na daukaulotu, au na lako ki na nona vale na noqu itokani e taravi keitou. Na noqu itokani e lewena kaukauwa sara e dua tale na vakabauta Vakarisito. Ena veigauna kece au dau gade kina vua, e dau vinakata me keirau veitalanoataka na iVolatabu. Au tukuna vua niu sega soti ni dau kauwai ena veika vakaoqori kau sega ni via vulica na veika e baleta na lotu. Ia a tovolea tikoga me veisautaka na noqu vakasama, kau sa mani vakaio. O koya au sa mani vulica tu kina ena dua na gauna balavu vata kei na noqu itokani na iVolatabu ena gauna erau vakavulici rau tiko kina na luvequ tagane na daukaulotu.

Ena dua na siga sa gauna me rau lako mai kina ki neitou vale na daukaulotu. Au mani sega ni lako, ia au nanuma meu tiko ga ena rumu ka tarava. Ni rau sa tekivu vakavulici rau na luvei keirau na daukaulotu, au vakila ni vaka meu via rogoca tikoga eso tale na ka. Au sa toso voleka sara yani ki katuba me rawa niu rogoca vakavinaka. Erau vakavulica tiko vei rau na luvequ tagane me baleti ira na iapositolo kei na parofita.

E muri au qai kila niu vinakata meu vulica eso tale na ka. Au veitalanoa kei ira na daukaulotu ka nanuma meu sa taura na lesoni mai vei rau—o keitou ga. E dau tiko kina e veigauna na watiqu, ia e sega tale ni dua e kila.

Ni rau dau lako mai na daukaulotu me rau mai vakavulici rau na luvei keirau tagane vakarua e veimacawa, au na lako ki nona vale na noqu itokani. Ena dua tale na siga, erau na qai vakavulici au.

Ena dua na siga ni tukuna na noqu itokani e dua na ka ca me baleta na Lotu, au a taqomaka na Lotu. Me vakataki ira e lewe vuqa ena Yatu Masela, e sega ni kila o koya e levu na ka me baleta na Lotu ka sega ni kila vinaka eso na ka era vakabauta na Yalododonu Edaidai. Ni tukuna eso tale na ka ca, au a taqomaka tale na Lotu.

A vaka tu oqori na kena itosotoso ena vitu na vula. Ena dua na siga au qai vakila ni sa vakadeitaka tiko vei au na Yalo Tabu ni veika kece erau vakavulica tiko vei au na daukaulotu e dina. Au kila ni dodonu meu sa papitaiso, e dina ga ni se lailai sara na ka au kila me baleta na kosipeli.

Ni oti na noqu papitaiso ena 2007, sa dua na ka na noqu marau. Sa tekivu me keitou maroroi ilavo me keitou lako ki na valetabu mai Awai, na vanua keitou a laki vauci kina kei na watiqu, kei iratou na luvei keirau e lewe tolu ena Tiseba ni 2008.

Na noqu lewena na Lotu sa vakaimawe sara vakalevu ena noqu bula. Au sa nanuma meu sa biuta na ikarua ni noqu cakacaka na veivakamarautaki ena dua na valenikana baleta niu dau qai yaco bera mai ki vale ka sa sinai tu ena noqu qameni na iboi ni tavako. E dina ni sa mai kau tani na ivurevure ni ilavo koya, sa vukei keitou tiko na Turaga.

Au kila ni dina na Lotu ka parofita ni Kalou o Josefa Simici baleta na Yalotabu au sa vakila kei na veivakalougatataki au sa ciqoma.