E Vakamatatataki ena Veituberi ni iVoladusidusi Na Cakacaka ni Veivakabulai

Ena nona vakatoka na soqoni me “ikarua ni madigi oqo me ra kila na ivakarau me ra vakayagataka vakavinaka cake kina na ivoladusidusi,” a vakauqeti ira kina na iliuliu o Peresitedi Eyring me ra vakatorocaketaka na nodra rawa ni ciqoma na ivakatakila.

“Ena veivuke ga ni Yalotabu e rawa ni o kila kina na ivakarau mo vakayagataka kina na veika o wilika ena ivoladusidusi,” a kaya. “… Ena sega beka ni vakaibalebale vei iko mo namaka se vakanuinui ki na kena drodro mai na ivakatakila o gadreva ena nomu veiqaravi ni veisiga. Ena sega ni yaco mai ke sega na vakabauta kei na cakacaka vakaukauwa, ia e rawa.”

A yalataka o Peresitedi Eyring ni gauna era na cakacakataka ka masulaka kina na iliuliu me ra “kila ka muria na vosa ni bula” sa soli vei ira, ena rawa ni vukei ira na Turaga me ra na veiqaravi yani ka veiliutaki ena nodra kaukauwa e levu cake sara.

“E vakaivunau na ivoladusidusi oqo,” e kaya o Elder Oaks, “ka lekaleka cake mai na ivoladusidusi taumada ena vuku ga ni levu ni ulutaga era sa sega ni veivakaroti tiko se veidusimaki kina. Sa yaco ga, me solia na ivakavuvuli era na rawa ni vakayagataka na iliuliu vakauqeti vakayalo … me veisotari kei na kena ena nodra vanua.”

Rau a vakaroti ira na iliuliu o Elder Bednar kei Elder Christofferson me ra kakua ni kalawaca na itekitekivu ni wase ni iVoladusidusi 2 ka gole sara ki na lawatu era tiko ena wase e tarava. Na itekitekivu ni wase sa vakadavori tu kina na yavu vakaivunau me kilai vakavinaka ka vakayagataki na ivakavuvuli kei na lawatu era tarava mai.

E kaya o Elder Bednar ni kena gadrevi na ivoladusidusi me “yavutaki-vakaivakavuvuli, ka vakamatatataki e vica na kena ivakavakayagataki sa gadrevi kina vei keda kece sara na bula vakayalo kei na cakacaka gugumatua e vinakati kina.”

“Me baleta na veika ni vunau, veiyalayalati, kei na lawatu eratou sa tauyavutaka oqo na Mataveiliutaki Taumada kei na Le Tinikarua, eda na sega ni gole tani mai na ivoladusidusi,” e kaya o Elder Nelson. “E vakatarai na veisau ena so tale na itaviqaravi me veisotari kei na gagadre ni vanua o ya.”

E kaya o Elder Porter, ni wase 17, “Vakaduavatataki ka Vakamatautaki,” a okati talega me vukei ira na iliuliu ni veivanua me ra muria na Yalotabu ka vakadeitaka na gauna dodonu me ra vakamatautaka na veika eso ena so na parokaramu. E vakamacalataka na wase oqo na veika ena sega ni rawa ni veisautaki ka solia kina e lima na ilalavaki me ra na vakayacori ga kina na veivakamatautaki oqo: na ituvaki ni matavuvale, na leqa ni veilakoyaki kei na veitaratara, na lailai ni kuoramu se kalasi, lewe lailai ni iliuliu, kei na ituvaki ni veitaqomaki.

“Na vakamatautaka na veika eso ena sega ni vakamalumalumutaka na Lotu; era na vaqaqacotaka ga,” e kaya o Elder Porter ena dua na vosa a wilika o Elder W. Craig Zwick ena Vitusagavulu. Ena kena vakayacori na vakamatautaki ni veika eso e vakauqeti vakayalo, me ra kakua ni nanuma na iliuliu ni ra sa vakalolovirataka na kena e dodonu. “Sa soli tu ki na veitabanilotu yadua ni Lotu na vunau, na cakacaka vakalotu, na kaukauwa ni matabete, kei na isolisoli ni Yalotabu sa gadrevi tu ki na nodra vakabulai kei na nodra bula vakalagilagi na luve ni Kalou,” a vola vakaoqo o Elder Porter.

Na veisau sa vakayacori taucoko sara ena iVoladusidusi 2 sa baleta tiko na kena vakatorocaketaki na cakacaka ni veivakabulai. E kaya kina o Peresitedi Eyring: “Ena yaco na ivoladusidusi me nomu iyau ni o vakayagataka me vukei iko ena nomu liutaki ira tale eso me ra digitaka na sala ki na bula tawamudu. Oqori na kena inaki.”

Ena ulutaga “Na Cakacaka ni Veivakabulai ena Tabanalevu kei na iTeki” e kauta vata mai kina na wase 5 e vica na ulutaga era a tu ga vakataki ira e liu, oka kina na cakacaka ni kaulotu, nodra maroroi na saumaki mai, vakabulabulataki, cakacaka ni valetabu kei na tuvakawa, kei na vakavulica na kosipeli.

“E kaya kina o Paula ena, itabagauna oqo ni taucoko ni gauna, ni na vakasoqoni vata mai na ka kecega ka duavata ena Karisito,” e kaya o Elder Bednar (raica na Efeso 1:10). “E dua ga na cakacaka.”

Me kena ivakaraitaki, na veika era nanuma taumada eso ni ilesilesi vakatikitiki ni Lotu era sa “ikoya tikoga na cakacaka o ya ena dua tale na ituvaki,” a kaya. Na cakacaka ni kaulotu sai koya na kena kaburaki na kosipeli ka sureti ira na tamata me ra mai ciqoma na cakacaka tabu vakalotu ka vakayacora na kena veiyalayalati. Vakacokotaki ni Yalododonu—e oka kina na veimaroroi, veivakabulabulataki, kei na veivakavulici—ni sai koya na cakacaka ni nodra sureti mai na tamata me ra mai doka na cakacaka vakalotu kei na veiyalayalati. Na nodra vakabulai o ira na mate ena cakacaka ni tuvakawa kei na valetabu sa madigi tiko me ciqomi kina na cakacaka vakalotu ka vakayacori na veiyalayalati vei ira era sa mate.

E kaya o Elder Holland vakararaba ni veisau oqo ena ivoladusidusi eda na kila kina vakavinaka ni nodra mai lewena tiko na matabose ni tabanalevu o ira na iliuliu ni kuoramu kei na mataisoqosoqo e sega walega me ra na mai veivosakitaki ira ga na nodra lewe ni kuoramu kei na mataisoqosoqo, ia sa tiko na nodra ilesilesi me baleta na nodra bula vakayalo na lewenilotu kece sara.

A veivuke o Elder Cook ena kena vakamatatataki na sala e veivukei kina na veisau eso ni lawatu ena iVoladusidusi 2 ki na cakacaka ni veivakabulai.

A vakamatatataka na bibi ni nodratou veivuke tiko o bisopi kei na matabose ni tabanalevu me baleta na gagadre ni bula raraba ena gauna oqo ka ni sa mai bokoci toka na bose ni welefea. E vakamacalataka na kena sa toso cake na nodra itavi na iliuliu ni Matabete i Melikiseteki me ra vakasalataki ira na lewe ni kuoramu. A vakamatatataka talega na veisau sa mai vakadonui vei ira na tama era se sega ni taucoko na nodra bula kilikili ni valetabu me ra sa na vakaitavi ena cakacaka vakalotu kei na veivakalougatataki ni nodra lewe ni matavuvale ena ituvaki eso.

“Eda sega ni caka bisinisi tiko ni cicivaki ni dua na parokaramu se liutaki tiko ni dua na isoqosoqo,” e kaya o Elder Bednar. “E gadrevi oqori, ia e sega ni veirauti. Oqo na cakacaka ni veivakabulai. Kei na gauna eda tekivu vakasamataka kina na cakacaka vakalotu kei na veiyalayalati, era na qai taroga vakadodonu mai o ira na iliuliu ni matabete, na cava beka na cakacaka vakalotu sa gadrevi dina ena bula ni tamata oqo se matavuvale oqo, kei na sala cava e rawa ni keimami veivuke kina ena kena vakarautaki?”

E vakaraitaka kina vakabibi o Elder Scott ni so na vanua, era guilecava kina na iliuliu me ra okati ira na marama ena gauna ni veivosaki. “Ena gauna era rawa ni vakauqeti kina na [marama] me ra vakaitavi ena galala ena matabose ni tabanalevu, e dau veivukei ka veivakauqeti vakayalo na nodra nanuma,” a kaya.

Sa rawa vei ira na iliuliu me ra vakauqeta na vakaitavi ena nodra dau cavuta na yacadra na marama ka dau vakavinavinakataka na nodra vakasama kei na vakatutu, e vakamacalataka o Elder Scott.

“Ena yaco mai e dua na veivakalougatataki soli wale ki na nodra itikotiko na iliuliu ni matabete” era vakamuria na idusidusi oqo o ya ni “sa rawa vei ira na turaga oqo me ra vakavinavinakataka cake vakalevu na nodra itavi na watidra ena nodra itikotiko,” a tomana.

A vakavulica o koya na bibi ni lomavata ena kedra maliwa na lewe ni matabose. Ni laurai ni sa tiko na yalo vakaoqo, sa rawa vua e dua na iliuliu me vakaraitaka ka kaciva e dua na veitokoni ena laveliga. Ena so na gauna ena duidui na vakasama, me ra qai vakasaqara na ivakasala na iliuliu mai vei ira yadua na lewe ni matabose ni tabanalevu, vakavinavinakataka na veinanuma sa mai wasei, vakayacora e dua na vakatulewa, ka kerei ira na lewe ni matabose me ra duavata mai ena kena tokoni na lewa sa tau. E vakamatatataka o Elder Scott na bibi ni kena maroroi na veika e veivosakitaki ena matabose ni tabanalevu.

A tinia na veituberi oqo o Elder Nelson ena nona vakamacalataka e tolu na inuinui: ni veika rawarawa ena solia na gauna kei na nodra ivurevure na lewenilotu me na vakayagataki ena kena vinaka duadua e levu cake, ka na tubu cake na kaukauwa ni matabete vei ira yadua na lewe ni matabete me ra na vakalougatataki ira kina na tamata yadua kei na matavuvale yadua ena Lotu, ka me ra na vakila vakalevu cake kina na lewenilotu yadua na yalodina kei na cakacaka vakatisaipeli.