Ia e Sega Eke na Lotu

Ena dua na ilakolako ki na Mediterranean, au dau gumatuataka meu lako ki Lotu ena veivanua e rawa kina. Mai Seville e Spain, au kerea na nona veivuke na dau tauri talevoni ni dua na otela, na ivola ni talevoni ni vanua ko ya, kei na dua na mape ni siti ko ya me vukei au ena noqu kunea na valenilotu ni Yalododonu Edaidai e kea. Au vola na yaca ni gaunisala kei na yaca ni Lotu vaka-Sipeni. Ena yakavi ni Vakarauwai au masu meu kila na gauna e tekivu kina na soqoni, kau vakila e dua na veivakauqeti kaukauwa meu tiko mai kea ni bera na 10 ena mataka.

Ni bera niu biubiu ki lotu ena 9:30 ena mataka ni Sigatabu, au masulaka tale meu kunea na valenilotu. Niu vakamuria na noqu mape, sa tekivu meu vakamuria eso na gaunisala qiqo ka vereverea. Oqo e dua na mataka vinaka. Au lako sivita na veivalenikana kei na dua na makete ni manumanu vuka ka sinai ena manumanu kosakosa.

Au yaco yani ki na itikotiko au nakita meu yaco kina kau sega ni kunea kina e dua na ka e vaka na valenilotu. Au yabeta cake ka yabeta sobu na gaunisala ka sega niu kunea. Au veilecayaki ka nanamaki, ka sa voleka sara na 10 ena mataka.

Oti, au sa qai masu vei Tamaqu mai Lomalagi: “Ko ni sa vakaroti au meu lako ki lotu, kau sa tu kina oqo, ia e sega ni dua na valenilotu eke.”

Ena gauna vata oqori a basika mai kina e dua na turaga vakasutu. E rairai me vaka e dua na lewenilotu, kau vakauqeti meu tarova. Au veimamayaka na noqu vosa, ena noqu tukuna vua niu vaqara tiko e dua na valenilotu. E tukuna e dua na ka kau sega ni taura rawa, ka veilecayaki na kequ irairai. A dolava na nona katotuberi, kau raica e rua na ivola waqa leca ka vaka na ivolanikalou na kena irairai. Au solia vua na noqu tikinipepa kau sa vola tu kina na “La Iglesia de Jesucristo” (Na Lotu i Jisau Karisito). E matadredredre ka dusi lesu ki na vanua au lako mai kina, keirau mai taubale vata yani ki lotu. E duatani na vanua e tiko kina na valenilotu e vica ga na miniti mai na vanua oya ka na rawarawa na nomu calata kevaka o sega ni kila ni tu e kea. E toka yani e loma ena dua na sikuwea lailai, ka vakamatamata levu.

Mai valenilotu au qai kila kina ni o koya na turaga a vukei au sai koya sara ga na bisopi ni tabanalevu ka tekivu na lotu ena 10:30 ena mataka. Au yaco mai ni se vo toka na gauna.

Ena soqoni ni lolo kei na soli ivakadinadina ni tabanalevu, au a vakauqeti meu wasea na noqu ivakadinadina. Ni vakadewataka na noqu vosa e dua na daukaulotu mai na vosa vakavalagi ki na vosa vakasipeni, au wasea na noqu ivakadinadina ka vakamacalataka na nona vukei au na Turaga meu lako mai ki lotu. A qai wasea na bisopi na nona ivakadinadina ka vakamacalataka ni a kele vakayawa vakalailai ena mataka oya, sa berata toka na gauna e dau yaco mai kina. Ni raici au e nanuma niu vaka na irairai ni lewe ni Lotu, a vukei au kina. A qai vosa me baleti ira na lewenilotu era sa lakosese voli vakayalo ka kaya me da vukei ira me ra raica na Lotu.

Ni toso na veiyabaki sa seyavu yani ena noqu vakanananu na irairai kei Seville, ia e sega ni vakakina na noqu vakanananu ena noqu a kunea na valenilotu mai kea. Na vakanananu oqori sa ivakadinadina vei au ni nona loloma cecere na Tamada mai Lomalagi vei keda ka sa vakaimawe tu ena noqu bula na ligana kevaka au vakasaqara ga na veika era “cokoti vata [meu] vinaka kina” (Roma 8:28).