Faitāpuekina ʻe he Ngaahi Fakataha Alēleá

Lolotonga ʻeku hoko ko e pīsope ʻi he ngaahi taʻu lahi kuo hilí, ne hoko ha faingataʻa ki ha fāmili ʻi homau uōtí ʻi he mole e ngāue ʻa e tamaí. Ne u hohaʻa pe naʻa nau fēfē pea ne u ʻaʻahi ai ki honau ʻapí ke talanoa mo kinautolu mo fai ha tokoni mei he Siasí. Naʻe ʻikai ke nau fie tali ʻa e tokoni fakataimi ne u fakahoko angé, ko ia ne u ʻave e meʻá ni ki he fakataha alēlea fakauōtí. Ne u vahevahe mo kinautolu ʻeku hohaʻa ki he fāmili leleí ni ʻi he laumālie ʻo e ʻofa mo fūfūnaki pea kole ke ʻomi haʻanau ngaahi fakakaukau ki ha founga ʻe lava ke mau tokoniʻi ai kinautolu.

Ne loto fiemālie ʻemau palesiteni Fineʻofá ke talanoa mo e faʻeé ke fakapapauʻi ʻenau ngaahi fie maʻu fakatuʻasinó pea ngāue mo kinautolu ke kumi mai e ngaahi meʻa ʻe ʻaonga kiate kinautolú—pea fakatatau ki he polokalama ʻa e Siasí, ko e fatongia ia ʻoʻona. Naʻá ne fakakakato e meʻa naʻe ʻikai ke u lavá ʻi ha ngaahi ʻaho siʻi pē, pea naʻe tali ʻe he fāmilí ʻa e tokoní ʻi he loto fakatōkilalo mo e fakamālō. Ne talanoa e palesiteni ʻo e kōlomu ʻo e kaumātuʻá mo e tamai ʻa e fāmilí—pea ko hono fatongia totonu pē foki ia—peá na ngāue ʻi ha ngaahi founga ke maʻu ai haʻane ngāue. Naʻe fakatokangaʻi ʻe he palesiteni ʻo ʻemau Kau Talavoú hono fuʻu fie maʻu ke vali honau falé, peá ne aleaʻi mo ʻene kau taulaʻeikí ke nau ngāue fakataha mo e kau taulaʻeiki lahí ke vali e falé.

Ne u ʻiloʻi heʻeku talanoa mo e ongomātuʻá naʻe lahi hona moʻuá pea tōmui mo ʻena totongi mōkesí. Hili haʻaku muimui ki he fakahinohino kuo fakangofua fekauʻaki mo e uelofeá, ne u fakaʻekeʻeke fekauʻaki mo ha lava ke maʻu ha tokoni mei hona kāinga ofí ka naʻe siʻisiʻi pē ha fakamatala ne u maʻu. Neongo iá, naʻe lava ke ʻiloʻi ʻe heʻemau palesiteni Fineʻofá naʻe ʻi ai ha tuongaʻane tuʻumālie ʻo e faʻeé.

Naʻe pehē ʻe he faʻeé, “ʻOku ʻikai ha ʻuhinga ia ke fetuʻutaki ai kiate ia. Kuo taʻu lahi mo e ʻikai ke ma toe feleaʻaki.”

Naʻe mahino kiate au ʻene ʻuhingá, ka ne u kei ongoʻi pē naʻe mahuʻinga ke muimui ʻi he founga ʻa e Siasí. Ko ia ne u talanoa mo ia pea faifai pē ʻo ne fakangofua au ke u fetuʻutaki mo hono tuongaʻané ʻa ia naʻe nofo ʻi ha kolo mamaʻo. Ne u telefoni ki ai ʻo fakamatalaʻi ange ʻa e ngaahi tūkunga faingataʻa ʻi he moʻui ʻa hono tuofefiné. ʻI he ʻaho pē ʻe tolu kuó ne aʻu ange ki Sōleki Siti ʻo fakaleleiʻi e ngaahi meʻa fakapaʻanga ʻa hono tuofefiné. Lolotonga ko iá, naʻe tokoni e palesiteni ʻo e kōlomu kaumātuʻá ki hono kumi ha ngāue tuʻumaʻu hono husepānití naʻe totongi leleí.

Neongo iá, ko e meʻa naʻe mahuʻinga angé ko ʻena toe vāofi ange mo fāitaha ko e fāmilí. ʻOku ʻikai te u tui ʻe ʻi ai ha taimi ʻe toe ngalo ai ʻiate au ʻa e momeniti fakaʻofoʻofa ko ʻeni ʻo e toe fakataha ʻa e faʻeé mo hono tuongaʻané hili ia ha ngaahi taʻu lahi ʻena vātamakí. Neongo ne mavahe hono tuongaʻané mei he Siasí, ka naʻe ʻi ai ʻa e feongoʻaki hona laumālié. Ne tupu mei ai ha toe foki ʻa e tuongaʻané ʻo mālohi kakato ʻi he Siasí pea fakafoʻou hono vā mo hono fāmilí.

Ne hoko kotoa ʻeni tupu mei he ngāue ʻa ha fakataha alēlea fakauooti faivelenga ʻi hono ueʻi ʻe he laumālié ʻo fakatatau mo e polokalama kuo fakahā ʻe he ʻOtuá maʻa ʻEne fānaú ʻo fakafou mai ʻi Heʻene kau tamaioʻeikí.