Ngaahi Fakakaukau Maʻá e Efiafi Fakafāmili ʻi ʻApí

Ko e pīsope au ʻo homau uōtí, naʻá ku poupouʻi e ngaahi mātuʻá ke ʻoange ha ngaahi faingamālie ki heʻenau fānaú ke nau faiako ai ʻi he efiafi fakafāmili ʻi ʻapí. Ne ma fakakaukau mo hoku uaifí ke fakahoko e meʻa ne u lea ʻakí.

Ne ʻuluaki faiako homa fohá, pea naʻa mau saiʻia ʻi heʻene lēsoni kau ki he lotú. Naʻe faiako homa ʻofefiné he Mōnite hokó. Ne toki papi pē ia he ngaahi māhina siʻi kuo hilí. Ko ʻene tefitó ko e fakatupu ʻa e ʻOtuá. Naʻá ne fai ha ngaahi fehuʻi, pea mau tali. Hili ko iá naʻe fai ʻene fakamoʻoní pea fakaʻosi ʻene lēsoní.

Ne pehē ange ʻe homa fohá, “Kuo teʻeki ai ke ke akoʻi kimautolu; ko e meʻa pē naʻá ke faí ko e fehuʻi.” Ka ne u talaange ki hoku fāmilí naʻe ongo kiate au ʻa e taimi naʻe tali ai ʻe hoku uaifí ha taha ʻo e ngaahi fehuʻí peá ne pehē, ʻokú ne fakamālō ki he ʻOtuá ʻi Heʻene fakatupu e ngaahi ʻiuniti fakafāmilí pea foaki kiate ia ha fāmili fakaʻofoʻofa mo ha husepāniti ʻofa. Ne u talaange ne fonu hoku lotó ʻi he fakafetaʻi ʻi he tali ʻe hoku ʻofefine siʻisiʻi tahá ʻa e fehuʻi “Ko hai naʻá ne fakatupu e māmaní?” ʻaki ʻene kaila, “Ko Sīsū.” Ne u ongoʻi ʻa e lahi ʻo ʻenau ʻiló ʻi heʻenau ngaahi tali kehe naʻe faí.

Ko ia neongo naʻe ʻikai “faiako” hoku ʻofefiné ʻo hangē ko e meʻa naʻe ʻamanaki ki ai hoku fohá, ka ko ʻene lēsoní—mo e ngaahi lēsoni kehe ko ia ne akoʻi ʻe heʻeku fānaú—ko e ngaahi lēsoni ia ʻoku ou manako taha ai ʻi he ngaahi efiafi fakafāmili ʻi ʻapí.