Tokoniʻi ʻi he Founga ʻa e ʻEikí

Ko ha taimi ʻeni naʻe lahi ai e molé he māketí. Naʻe mate ʻa e ngaahi pangikeé mo e ngaahi kautaha paʻanga kehé. Naʻe tokolahi ʻaupito ʻa e taʻemaʻu ngāué. Naʻe mole ʻa e ngaahi ʻapi ʻo e kakaí. Naʻe ngāue fakataha ʻa e ngaahi puleʻangá mo ha ngaahi polokalama totongi mamafa ko e feinga ke fakakake ʻa e tōlalo ko ʻení. Naʻe fakaʻau ke toe tokolahi ange ʻa e kakai naʻe pau ke nau hanga ki he ngaahi kautaha fakapuleʻangá ke maʻu mei ai ha meʻakai mo e ngaahi fie maʻu kehé.

ʻE lava pē ke ʻomai ʻa e fakamatala ko ʻeni ki he ngaahi taʻu ʻo e 1930 ʻo fakaʻaongaʻi ki he ngaahi taʻu kimui maí. Naʻe ʻi ai e palani uelofea ʻa e Siasí ʻi he taimi ko iá—pea pehē pē ki he taimí ni—ke “tokoniʻi ʻa e kakaí ke nau tokoniʻi pē ʻe kinautolu ʻa kinautolu”¹ ʻi he ngaahi taimi ʻoku hoko ai ha fakatamakí, ʻi he mafola ʻa e tōlalo fakapaʻangá, pea ʻi he fanga kiʻi faingataʻa iiki ange ʻe lava ke fehangahangai mo e ngaahi fāmilí pea mo e fakafoʻituituí ʻi ha taimi pē.

Neongo naʻe toki kamata ʻi he 1936 e palani uelofea ʻoku tau ʻilo he ʻaho ní, ka kuo moʻui ʻaki ʻe he Kāingalotu ʻi he kuonga fakakosipeli kotoa pē ʻa e ngaahi tefitoʻi moʻoni ʻo e moʻui fakapotopotó he ko e Fakamoʻui ko Sīsū Kalaisí naʻá Ne fokotuʻu ʻa e palani uelofeá. Naʻe pehē ʻe Palesiteni Tōmasi S. Monisoni: “Naʻe tofa e halá ʻe he ʻEikí ʻi Heʻene folofola ʻo pehē, ‘Pea ʻe tauhi ʻa e fale tukuʻanga koloá ʻaki ʻa e ngaahi koloa fakatapui ʻo e Siasí; pea ʻe tauhi ʻa e kau uitoú mo e kau tamai mo e faʻē maté, kae ʻumaʻā foki mo e kau masivá.’ (T&F 83:6.) Pea hoko mai leva e fakamanatú, ‘Ka kuo pau ke fai ia ʻi heʻeku founga pē ʻaʻakú.’ (T&F 104:16).”²

Ke tau tokoni ʻi he founga ʻa e ʻEikí, kuo pau ke tau kamata moʻui fakafalala pē kiate kitautolu pea tau toki feinga leva ke tokoniʻi e niʻihi kehé ke nau moʻui fakafalala pē kiate kinautolu. Naʻe pehē ʻe Palesiteni Monisoni, “ʻOku tokoni ʻa e kau tangata mo e kau fafine mateakí ke fakahoko ʻa e polokalama lahi mo fakaʻofoʻofá ni.” Ko hono moʻoní, he ʻikai ʻaupito teitei ola lelei ʻa e palaní ʻi he ngāué ʻataʻatā pē, he ʻoku ngāue ʻa e polokalamá ni ia ʻi he tuí ʻi he founga pē ʻa e ʻEikí.” ³

ʻOku ʻomi ʻe he taʻu 75 ʻo e palani uelofeá—ʻa ē ʻoku fakamanatu he taʻu ní—ʻa e faingamālie ki he Kāingalotú ke nau fakakaukau ai ki he ngaahi tefitoʻi moʻoni paú, hangē ko e moʻui fakafalala pē kiate kitá, tokangaʻi ʻo e masivá mo e faingataʻaʻiá, mo e tokoni ki he niʻihi kehé. ʻI heʻetau moʻui ʻaki e ngaahi tefitoʻi moʻoni ko ʻení, ʻoku lava lelei ange ai ke tau fakafiemālieʻi ʻa e mamahí, fakatupulaki e ʻulungāangá, pea paotoloaki ʻa e uouangatahá.