Tangataʻeiki, ʻOku ou Fie Maʻu Koe

Ne u hiki holo e ʻū paipa vai fuʻifuʻi musié ʻi ha konga ʻo ʻemau fāmá ʻi he feituʻu fakatokelau ʻo Kalefōniá, USA. Ko ha ʻaho lelei ʻeni he naʻe ʻi ai ʻe tangataʻeikí ke tokoni mai. ʻI heʻene ʻosí, naʻá ma heka ki heʻema ongo meʻalele ngāué ʻo lele ki ʻapi mo fakakaukau pē ki he houakai efiafí. Naʻe muʻomuʻa e tangataʻeikí.

Naʻe ʻi he tafaʻaki ʻe taha ʻo ʻemau fāmá ʻa e Vaitafe Pití. Naʻá ma lele pē he tapaʻi vaí ke ʻoua naʻa molo e ngaahi fuʻu vaʻe lalahi ʻo ʻema meʻalelé ʻi he mohukú. Naʻe ʻi he tafaʻaki toʻomataʻú ʻa e musié, pea ʻi he toʻohemá ʻa e vaitafé, pea naʻe ngungutu ki lalo. Naʻe ʻikai ke ma lava ʻo sio lelei he naʻe kiʻi kakapu.

Naʻe vave ʻema lelé mo ʻeku sīfā ki he tafaʻakí ʻo tau ʻeku vaʻe mui toʻomataʻú ʻi ha tungaʻiʻakau. Ne pau ai ke u afeʻi lahi fakatoʻohema e meʻalelé ki he vaitafé peá hoholo hifo ai ki lalo. Ne u feinga ke tuʻu e meʻalelé ka naʻe fuʻu tahifo e tafaʻakí pea fuʻu vave foki mo ʻeku lelé. Ne u ʻiloʻi fakapapau te u tō ki he loto vaitafé. Kae meʻamālie naʻe ʻi ai ha fuʻu ʻakau ʻi he meʻa naʻá ku hangatonu hifo ki aí. Ko e meʻa pē hono hoko ne u ʻiloʻí ko ʻeku sio hifo ki he meʻalelé—mei he funga ʻakaú! Kuo teʻeki ai ke u manavahē pehē fau kimuʻa.

Naʻá ku ongoʻi ne u mei mate, ka naʻe ʻikai ke u lavea tuku kehe pē fanga kiʻi mamulumulu mo e makohikohi. ʻI heʻeku ongoʻi fiemālie mo kiʻi mānava leleí, naʻá ku ʻiloʻi he ʻikai ke u lava ʻo ʻohake toko taha pē ʻa e meʻalelé. Ne u nofo pē ʻo ʻamanaki ʻe fakasio hifo ʻeku tamaí mei ʻolunga ko hono kumi au, ka naʻe ʻikai. Ne ʻāsili ai pē ʻeku ongoʻi kovi angé.

Ne u kaka hake ki ʻolunga ka naʻe ʻikai ke u sio ki heʻeku tangataʻeikí. Ne fai ʻeku kiʻi lotu fakalongolongo ki heʻeku Tamai ʻi Hēvaní ʻo kole ange ke Ne talaange muʻa ki he tangataʻeikí ke foki mai ʻo ʻave au. Naʻá ku kamata lue lalo leva. Lolotonga ko iá, kuo mei aʻu e tangataʻeikí ia ki ʻapi mo ʻene fakakaukau naʻá ne ongoʻi ʻeku ui kiate ia. Ko ʻene toki sio ia ki mui talu ʻema mavahe mei he feituʻu ne tō ai e mohukú. Ko ʻene toki fakatokangaʻi pē ia naʻe ʻikai ke u lele mai ʻi mui. Naʻá ne ʻiloʻi naʻe ʻi ai e meʻa naʻe hoko peá ne haʻu ʻo kumi au kae ʻoua kuó ne ʻilo au.

Naʻe toki talamai ʻe he tangataʻeikí kimui ai naʻá ne fanongo ki heʻeku pehē, “Tangataʻeiki, ʻoku ou fie maʻu koe! ʻI he taimi ko ʻení naʻá ne mamaʻo ʻaki ʻe ia ʻa e maile ʻe ua (km ʻe 3) meiate au. Ne u ʻiloʻi leva naʻe fanongo mai ha Tamai ʻi Hēvani ʻofa ki heʻeku lotú peá ne fakahā ke ʻiloʻi ʻe heʻeku tangataʻeikí ʻeku fie maʻu ʻene tokoní.

ʻOku ou fakamālō koeʻuhí ko e Laumālie Māʻoniʻoní mo e ngaahi fanafana ʻo e moʻoní mo e tataki ʻoku tau maʻu meiate Iá. ʻOku ou fakamālō foki ko ha tamai ʻofa kuó ne moʻui ʻi ha founga ʻe lava ke lea ai ʻa e Laumālie Māʻoniʻoní kiate ia peá ne ongoʻi.