Fakautuutu Fakavahaʻapuleʻanga Hono Fie maʻu ʻo ha Fakahokohoko Fakamotuʻalea

‘Oku fekumi ‘a e kakaí ʻi māmani kotoa ki heʻenau ngaahi kuí.

Pea ʻoku tokoni ʻa e kakai kehé ʻi māmani kotoa ke lava ʻo fakahoko ʻa e fekumi ko iá.

Naʻe kamata hono fokotuʻutuʻu ʻo e FamilySearch ʻi he ʻInitanetí ʻi he 2006 pea ʻoku lava ʻeni ʻi he tokoni atu ki ai ʻa e niʻihi ʻoku ngāue taʻetotongi ʻi he māmaní kotoa, pea ko e founga ia hono ʻomai ʻo e ngaahi lekooti totonú (hangē ko ia ʻoku hā ʻi he maikolofilimí) ʻo fakahū leva ʻa e ngaahi fakamatala ʻi aí ki ha polokalama fakakomipiuta ʻi he ʻInitanetí ʻa ia ʻe lava ʻo fai ai ha fakatotolo.

Talu mei he taimi naʻe kamata ai hono fakahokohoko fakamotuʻalea ʻo e FamilySearch mo e ʻiloa ʻene ola leleí, ʻa ia ne fakakakato ai ʻe ha kāingalotu mo ha kakai pē ʻoku ʻikai Siasi ʻe toko 122,000 naʻa nau ngāue ki ha lekooti ʻe 547,978,000. Neongo iá, ʻoku ʻi ai ha taumuʻa foʻou ʻanautolu ʻoku nau fakafekauʻaki ʻa e fakahokohoko fakamotuʻaleá: ke fakahokohoko e ʻū lekōtí ʻi ha ngaahi lea fakafonua kehe, mavahe mei he lea faka-Pilitāniá.

Naʻe pehē ʻe Simi ʻElikisoni, ko e pule fakamāketi maʻá e FamilySearch, “ʻOku fakaʻau pē ke toe lahi ange ʻa e ngaahi hingoa ʻoku mau fakahokohoko fakamotuʻaleá ʻoku ʻikai ko ha hingoa faka-Pilitānia. ʻOku mau feinga ke fakakau lahi ange mai ha kakai ʻoku nau lea ʻaki ha ngaahi lea kehekehé koeʻuhí ke toe lelei ange ʻemau ngāue ki he ngaahi hingoa ʻoku ʻikai ke faka-Pilitāniá.”

Neongo ʻoku kei hokohoko atu pē ʻa e lahi ange hono fakahokohoko fakamotuʻalea ʻo e ngaahi lekooti faka-Pilitāniá, ka ʻoku toe laka mamaʻo e tupu lahi ange ʻa e ngaahi lekooti fakavahaʻapuleʻangá. Naʻe pehē ʻe Misa ʻElikisoni ʻoku maʻu e ngaahi ngāue mei he ngaahi fonua kehekehe ʻi hono iloʻi ko ia ʻe he ngaahi puleʻanga lahi ange mo kinautolu ʻoku nau tauhi e ngaahi lekōtí ʻa e ngāue ʻoku fai ʻe he FamilySearch.

ʻOku kamata ʻaki pē hono toʻo ʻe he kau ngāue ʻa e FamilySearch ʻa e ngaahi lekooti mei he ngaahi puleʻanga, laipelí, mo e ngaahi maʻuʻanga fakamatala peheé ʻo faitaaʻi hanau ngaahi tatau. ʻOku fakatahatahaʻi leva e ngaahi tatau ko ʻení ki ha ngaahi kulupu iiki ʻo ui ko e “batches,” ʻa ia ʻoku lava ke maʻu ia ʻi he ʻInitanetí ʻe he kau ngāue taʻetotongí. ʻOku hū leva e kau ngāue taʻetotongi ko ʻení ki he FamilySearch, download ha batch ʻe taha, pea fakahū ʻa e fakamatala ʻoku nau sio ki ai he komipiutá. ʻOku ala maʻu kimui ange ʻa e fakamatala ko iá maʻá e tokolahi ʻoku nau fakatotolo ki he hisitōlia fakafāmilí. ʻOku pehē ʻe Keiti Keli, ko e Kouʻotineita ʻo e Ngāue Fakahokohoko Fakamotuʻalea ki he FamilySearch, ko e batch takitaha, ko hono fakatahatahaʻi ia ʻo e ngāue ʻoku lava ke fakakakato ʻe ha tokotaha ngāue ʻi ha miniti nai ʻe 30.

ʻOku ala kau ʻi he kau ngāue taʻetotongi ki hono fakahokohoko fakamotuʻalea ʻo e FamilySearch ha kakai ʻoku ʻikai ko ʻenau lea fakafonuá ʻa e lea faka-Pilitāniá (ʻoku lolotonga ngāue ʻaki ʻi he saití ha lea fakafonua ʻe fitu), ka ʻoku lava pē foki ke kau ki ai ha kakai ʻoku ʻi ai haʻanau pōtoʻi lea fakafonua mei heʻenau ngāue fakafaifekaú, akó, pe ha toe faʻahinga ako kehe.

Neongo ʻoku ʻikai fakahoko ha ngaahi ngāue ʻi ha fonua ʻokú ke nofo pe ngāue aí, ka ʻe lava pē ke maʻu ia mei he ngaahi fonua ʻoku lea ʻaki ai ʻa e lea fakafonua tataú.

ʻI he taimi naʻe langa ai e Temipale Kaivi ʻIukuleiní, naʻe kamata kau atu ʻa e Kāingalotu ʻIukuleiní ki hono kumi mo fakahokohoko fakamotuʻalea ʻo e ngaahi hingoa ke ʻave ki he temipalé ʻi ha ʻosi hono langá. ʻI he taimi naʻe fakatapui ai e temipalé, naʻe ngāue ha toko 401 mei ʻIukuleini, Lūsia, ʻAmelika Noate mo Saute, mo ʻIulope ki hono fakahokohoko fakamotuʻalea ʻo e ngāue maʻa Kaiví, ʻo lava ke ʻomi ai ha ʻū hingoa ʻIukuleini ʻe 200,000 ki he temipalé.

ʻI he fakaʻau ʻo lahi ange hono fakahoko ʻo e ngāue ki he fakahokohoko fakamotuʻalea ʻi he ʻēliá, ʻe ʻiloʻi leva ʻe kinautolu ʻi he FamilySearch ʻoku nau ʻomai ʻa e ʻū batches ʻa e ngaahi feituʻu ʻoku fakaʻau ke lahi e ngāue aí, pea te nau tuku atu ke vave ange ʻa e ngaahi ngāue fekauʻaki mo e vahe ko iá ʻo ka lava.

ʻI he vave ʻoku lolotonga fakahoko ai ʻa e fakahokohoko fakamotuʻaleá, ʻe aʻu pē ki ha taʻu ʻe hongofulu pea toki kakato ʻa e ngaahi batches kuo tuku atu ki ha ngaahi fonua ʻe niʻihi—ko ia ʻoku fie maʻu ai ha niʻihi tokolahi ange ke fai ʻa e fakahokohoko fakamotuʻaleá. ʻOku fakaʻavalisi ki he taʻu ʻe ua ki he ono ke fakakakato ʻa e ngaahi batches ʻi he ngaahi fonua ʻoku lea fakafonua mavahe mei he faka-Pilitāniá.

ʻOku pehē ʻe Paula Sitoake, Pule Ngāue ki he Fakahokohoko Fakamotuʻaleá ʻi he FamilySearch, “Kapau ʻe pehepehē atu ai pē ʻa e ngāué, ʻe ʻikai mahuʻinga ia ki ha taha. Ko e taumuʻa ʻo e fakahokohoko fakamotuʻaleá ke maʻu e ngaahi lekooti ko ʻení (fakaʻilekitulōnika) koeʻuhí ke lava ʻe he kakaí ʻo maʻu ʻenau ngaahi kuí. ʻOku mau feinga ke vave hono fai ʻo e ngaahi ngāué.”

ʻOku maʻu ʻe he Siasí ha ngaahi takainga maikolofilimi ʻe 2.4 miliona nai ʻoku ʻi ai e ngaahi lekooti fakatohihohoko ʻa ia ʻoku tauhi ʻi he Tauhiʻanga Lekooti he Moʻunga Kalānité (Granite Mountain Record Vault). ʻOku feʻunga ʻeni mo ha ngaahi lekooti ʻe 15 piliona ʻoku kei fakatatali ke fakahokohoko fakamotuʻalea. ʻOku taʻefaʻalaua hono lahi ʻo e ngaahi lekooti kehe ʻi ha ngaahi feituʻu ʻi he māmaní kotoa.

Naʻe pehē ʻe Misa ʻElikisoni, “ʻOku hanga ʻe he [fekumi ki ha hingoa mo e ngaahi lekooti fakatāutahá] ʻo liliu e loto ʻo kinautolu ʻoku fai e fekumí ki heʻenau ngaahi tamaí. ʻE lava ke fakaʻaongaʻi ʻe he kāingalotu ʻo e Siasí ʻa e ngaahi fakamatala ko ia kuo ʻosi fakahokohoko fakamotuʻaleá ke hiki e laine ʻo ʻenau ngaahi kuí pea fakahoko e ngaahi ouau fakahaofi ʻo e temipalé.”

Naʻe pehē ʻe Sisitā Keli, neongo ʻoku meimei lava ʻe ha taha pē ʻo fakaʻaongaʻi ha komipiuta ke kau ai ki he ngāue faingofua ko ʻeni ʻo e fakahokohoko fakamotuʻaleá, ka ʻoku ʻikai totonu ke fakasiʻisiʻia ai hono mahuʻingá. Ka [lava] e kakaí ʻo sio ki he fakahokohoko fakamotuʻaleá ko ha ʻata lahi ange ia ʻo e hisitōlia fakafāmilí, ʻe lava ke nau sio ki hono mahuʻingá mo hono fie maʻu ke toe tokolahi ange e kau ngāue taʻetotongí.”

Naʻe pehē ʻe Misa ʻElikisoni, “ʻOku mau fie maʻu ha kakai tokolahi ange ke kau ki hono fai ʻo e fakahokohoko fakamotuʻaleá, pea ʻoku mau kole atu ki he kakaí ke nau talanoa ki honau ngaahi kaungāmeʻá mo e kau mēmipa ʻo e fāmilí ʻo kau ki he polokalamá ni, ʻo tatau ai pē pe ʻoku nau kau ki he Siasí pe ʻikai. ʻOku ʻikai fakangatangata pē ʻeni ki he kāingalotu ʻo e Siasí. ʻOku fakafiefia ʻa e taimi ʻoku fengāueʻaki fakataha ai ʻa e tokotaha kotoa pē ke aʻusia ʻa e taumuʻa tatau.”