Siamane

Neongo naʻe kamata e ngāue fakafaifekaú ʻi Siamane ʻi he ngaahi taʻu ʻo e 1840, ka naʻe toki papitaiso e ongo fuofua papi ului aí ʻi he 1851. ʻI he taʻu tatau pē naʻe ʻalu ai ʻa Palesiteni Sione Teila, heʻene kei ʻi he Kōlomu ʻo e Kau ʻAposetolo ʻe Toko Hongofulu Mā Uá, ki Hemipeeki ke tokoni ʻi hono tokangaʻi e liliu ʻo e Tohi ʻa Molomoná ki he lea faka-Siamané. Naʻe fokotuʻu ha kolo ʻi Hemipeeki ʻi he 1852, ka ne hiki ki ʻIutā ʻa e tokolahi ʻo e kau fuofua papi uluí koeʻuhi ko e fakatangá. Naʻe kau ai ʻa Kā G. Meisa, ʻa ē ne hoko kimui ko e palesiteni ʻo e ʻUnivēsiti Pilikihami ʻIongí ʻi Polovo, ʻi ʻIutā.

Naʻe tokolahi e papi ului ki he Siasí ʻi Siamane hili ʻa e ʻUluaki Tau Lahi ʻa Māmaní, ʻo tautefito ia mei he 1921 ki he 1925. Ne vahe ua e Misiona Siamané ʻo hoko ko e Misiona Siamane ʻAosituliá mo e Misiona Suisalani-Siamané. Naʻe fokotuʻu e Misiona Siamane Hahaké ʻi he 1937. Naʻe ʻave e kau faifekaú mei Siamane lolotonga e Tau Lahi Hono II ʻa Māmaní. ʻI heʻenau foki ʻi he 1947, kuo ʻosi vahe ua e fonuá ia ʻo hoko ko Siamane Hahake mo Siamane Hihifo. Neongo iá, ne kei hokohoko atu pē ʻa e ngāue fakafaifekaú, pea ʻi he ʻaho 19 ʻo Sune 1985, naʻe fakatapui ai ʻa e Temipale Falaipeeki Siamané ʻi Siamane Hahake—ko e fuofua temipale ia ʻi ha fonua kominiusi. Hili mei ai ha taʻu ʻe ua ne toe fakatapui ha temipale ʻe taha ʻi Felengifeeti, ʻi Siamane Hihifo. Naʻe fakatahaʻi e fonuá ʻi he 1990.