O Se Upu mo le Faifeautalai Faalotolotolua

O se faaupuga ou te fiafia lava i ai e masani lava ona faia ia St. Francis o Assisi e faitauina faapea, “Talai le talalelei i taimi uma, ma a manaomia, faaaoga upu.”¹ O loo i ai i lenei faaupuga le malamalamaaga faapea o le tele lava o lauga sili ona mamana e le o faaupuina i upu.

Pe a tatou mauaina le amiosao ma ola ai i taimi uma i o tatou tulaga faatonuina, o le a iloaina e tagata. Pe a tatou faasusulu atu le olioli ma le fiafia, o le a atili ai ona latou iloaina.

E mananao tagata uma ina ia fiafia. Pe a faasusulu atu e i tatou o tagata o le Ekalesia le malamalama o le talalelei, o le a vaai tagata i lo tatou fiafia ma lagonaina le alofa o le Atua ua faatumulia ai o tatou olaga. Latou te fia iloa le mafuaaga. Latou te fia malamalama i la tatou mealilo.

Ma o le a taitaiina atu ai i latou i le faia o ni fesili e pei o le “Aisea tou te matua fiafia ai lava?” po o le “Aisea tou te mauaina ai se lagona lelei i taimi uma?” Ioe, o tali o nei fesili o le a taitai tonu atu ai lava i se talanoaga e uiga i le talalelei toefuataiina a Iesu Keriso.

O le tauina atu o le mataupu e uiga i le lotu—aemaise lava i a tatou uo ma e pele ia i tatou—e mafai ona faafoliga taufaafefe ma luitauina. E le tatau ona faapena. O le ta’ua o aafiaga faaleagaga po o le talatalanoa e uiga i gaoioiga po o mea na tutupu a le Ekalesia i talanoaga faasamasamanoa e mafai ona faigofie ma fiafia pe afai tatou te mauaina se lototele ma ni manatu lelei.

O lo’u toalua o, Harriet, o se faataitaiga matagofie o lenei mea. Ao matou nonofo ai i Siamani, na te sailia se auala e faatino ai ni mea e faatatau i le Ekalesia i ni ana talanoaga ma ana uo ma e masani. Mo se faataitaiga, pe a fesili atu se tagata pe na a le faaiuga o lona vaiaso, na te faapea atu, “Sa matou maua se aafiaga mataina i la matou lotu i lenei Aso Sa! Sa faia e se alii talavou e 16 tausaga lona matua se lauga matagofie i luma o tagata e 200 o la matou aulotu e uiga i le ola i se olaga mama.” Po o le, “Sa ou aoao e uiga i se tamaitai e 90 tausaga lona matua na koloseina le silia ma le 500 palanikeke ma tuuina atu i le polokalama fesoasoani a la matou Ekalesia ina ia auina atu i tagata e le tagolima i le lalolagi atoa.

O le tele lava o taimi, o tagata na faalogo i lenei mea o le a mananao ina ia iloa atili. Latou te faia ni fesili. Ma o lena mea o le a taitaiina atu ai i avanoa e talanoa ai e uiga i le talalelei i se auala masani, mautinoa, ma e le faamalosia.

Talu mai le amatalia o le Initoneti ma ala faasalalau faaagafesootai, ua sili atu ona faigofie le talanoa e uiga i nei mea i se auala faasamasamanoa nai lo le taimi muamua. O le mea tatou te manaomia o le lototele e faia ai.

O le mea e faanoanoa ai, e matuai faigofie lava le eseese o manatu. E tupu soo lava lo tatou tauaimisa, faitio, ma tautuua’i. Afai tatou te ita, le mafaufau, pe faatiga i tagata, o le mea mulimuli lava latou te mananao e fai o le suesue atili lea e uiga ia i tatou. E faigata ona iloa pe ua toafia ni tagata, a lē o ese atu ma le Ekalesia pe e lei liliu mai ona o se faamatalaga na fai atu e se tasi na faatiga pe na faalumaina ai i latou.

E matua tele lava o le le mafaufau i le lalolagi i le aso. Ona o le mafai e isi tagata on tusitusi i luga o le Initoneti e aunoa ma le iloaina e isi tagata po o ai na tusiaina, o lea ua sili atu ai ona faigofie nai lo le taimi muamua ona faia ni faaupuga faatiga po o le le lelei. Pe le tatau ea ia i tatou, o soo faamoemoeina o lo tatou Keriso faapelepele, ona i ai se tulaga faatonuina maualuga atu pe sili atu ona alofaina. O loo aoao mai tusitusiga paia, “Ia le aunoa a outou upu ma le alofa, ia faamai i le masima, ia iloa e outou ona faifaatatau se tali i tagata taitoatasi uma” (Kolose 4:6).

Ou te fiafia i le manatu faapea o a tatou upu e manino e pei o se lagi e suluia e le la ma ua tumu i le alofa tunoa. Mata e mafai ona e vaai faalemafaufau atu i le tulaga o le a i ai o tatou aiga, uarota, itumalo, ma e oo lava i le lalolagi pe afai e mafai ona tatou faaaogaina lenei mataupu faavae faigofie.

O nisi taimi tatou te faaviivii ai pe tuuaia ai foi i tatou lava pe a oo i le tulaga o le talia e isi o le talalelei. E taua le iloaina e le o faamoemoe mai le Alii ia i tatou e faia le tulaga o le faaliliuina.

E le tupu le liua ona o a tatou upu ae e ala mai i le fesoasoani faalelagi a le Agaga Paia. O nisi taimi e pau lava le mea e manaomia o se fuaiupu e tasi o la tatou molimau pe o se aafiaga ina ia faatupu ai le faamaluluina o le loto po o le tatalaina o se faitotoa lea e taitai atu ai isi ina ia iloaina ia upumoni musuia e ala i uunaiga a le Agaga.

Na saunoa mai Peresitene Polika Iaga (1801–77) na ia iloa e moni le talalelei ina ua ia “vaai i se tagata e le lelei lana tautala, po o se taleni e lauga ai i nofoaga faitele, ae ua na ona faapea mai, ‘Ou te iloa, i le mana o le Agaga Paia, o le Tusi a Mamona e moni, o Iosefa Samita o le Perofeta a le Alii.’” Na saunoa Peresitene Iaga ina ua ia faalogo i lena molimau agamalu, “O le galuega a le Agaga Paia mai lena tagata na faapupulaina ai lo’u iloa, ma le malamalama, mamalu, ma le tino ola pea e pei ona faaali mai ia te au.”²

Uso e ma tuafafine, ia faatuatua. O le a mafai ona faalauaiteleina e le Alii ia upu tou te tautatala atu ai ma faamalolosia. E le o fetalai atu le Atua tou te faaliliuina ae na o le tatala o outou gutu po o fofoga. O le galuega o le faaliliuina e le o sau galuega—o le galuega lena a le tagata o loo faalogologo faapea ma le Agaga Paia.

Au uo pele, ua anoanoai le mau auala i le aso nai lo le taimi muamua e tatalaina ai o tatou gutu ma faasoa atu i isi ia talafou fiafia e uiga i le talalelei a Iesu Keriso. O loo i ai se ala mo tagata uma—e oo lava i le faifeautalai faalotolotolua—ina ia faatino ai i lenei galuega maoae. E mafai e i tatou taitoatasi ona saili se auala e faaaoga ai a tatou lava taleni faapitoa ma mea e fiafia i ai e lagolago ai le galuega maoae o le faatumulia o le lalolagi i le malamalama ma le upumoni. Ao tatou faia lena mea, o le a tatou maua le olioli lea e oo mai ia i latou o e o faamaoni ma lava le lototoa “ma tutu o ni molimau a le Atua i taimi uma” (Mosaea 18:9).