Faaosoosoina e Pepelo

O le falesa ou te lotu ai i Nigeria e latalata i se aoga o lona puleaoga sa le manao lava i se mea e aafia ai le Ekalesia. I se tasi o mea na tupu sa ta’u atu ai e le puleaoga i se faiaoga e aua ne’i toe foi atu i le aoga ina ua ia iloaina o le faiaoga o se Au Paia o Aso e Gata Ai. O se tagata o le Ekalesia o le sa ofo atu e asiasi atu ma faamalamalama le misiona a le Ekalesia sa teenaina foi.

I le avea ai ma se tagata faatauoloa mo masini e faaaoga e falesuetoto ma falemai, sa masani ai ona ou asiasi atu i aoga ma falemai e faatau atu ai nei oloa. Ina ua uma se masina e tasi sa le’i faamanuiaina, sa leai sa’u filifiliga e faia ae ia ou asiasi atu i le aoga lenei. O la’u fuafuaga o le faatau atu lea o la’u oloa ma toe aluese mai, ma le faamoemoe ia le iloa e le puleaoga o a’u o se tagata o le Ekalesia. Ae peitai, sa ta’u mai e le Agaga ia te a’u o le a manao o ia e iloa la’u tapuaiga.

Sa sologa lelei lava la’u mataupu ma le ulu o le vaega faasaienisi a le aoga, ma sa ia aveina atu a’u i le puleaoga mo le totogi [o oloa]. Ina ua uma ona faatumu le siaki, sa amata ona ia fesilisili mai i lona fia faamasani lelei ia te a’u. Ina ua amata ona patino ana fesili, sa amata ona ou le to’a. Ona ia fesili mai lea i le fesili lea sa ou tatalo ia aua ne’i ona fesili mai ai: “O le a le ekalesia e te auai ai?”

Sa faaosoosoina au ina ia ou pepelo, aumai la’u siaki, ma aluese loa aua sa matuai ou manaomia lava lena faatau. Ae sa ou lagonaina e tatau ona ou ta’u atu ia te ia le mea moni. Aua foi, sa oo le uluai Au Paia i tulaga na sili atu ona leaga nai lo lenei tamai tofotofoina o lo’u faatuatua.

Faatasi ai ma le lototele faafouina, sa ou tilotilo sa’o atu ai i ona mata ma faapea atu, “O a’u o se tasi o Le Ekalesia a Iesu Keriso o le Au Paia o Aso e Gata Ai.” Ona ou tuuina atu lea o la’u molimau. O le mea na ou te’i ai, sa ataata o ia ma fai mai, tatou te tapuai uma lava i le Atua e tasi, ma tuu mai ia te a’u le siaki.

A o ou aluese mai, sa oo mai i lo’u mafaufau se mau: “O lenei mea sa avea ma tofotofoga tele ia te i latou o e sa tutu mausali i le faatuatua; e ui i lea sa latou mausali ma le le mafaagaeetia i le tausiga o poloaiga a le Atua, ma sa latou talia ma le onosai sauaga sa faafaulai i o latou luga” (Alema 1:25).

Sa ou fiafia i lo’u le faalefiafiaina o le Tama Faalelagi po o a’u lava. Ona o lenei aafiaga, ua ou faia ai se tautinoga ia avea au i taimi uma ma tagata faatau oloa lelei. Ae o le mea e sili ona taua, sa ou tautino ia avea au i taimi uma ma se tagata lelei o le talalelei a Iesu Keriso.