O Le Avea ma Soo i Taimi Uma, i Mea Uma, ma i Nofoaga Uma

Ua leva ona vaavaai atu Kara Laszczyk o Iuta, ISA i le avea ma soo o se manao e faataitai ma avea atili e faapei o Iesu Keriso ma o se naunautaiga ia ositaulaga ma auauna atu i le faasoaina atu o Lana talalelei. Ae sa ia lagonaina sina faatautau ona o ona uiga matamuli.

“E matele ina ou mafaufau lava na o totonu o lo’u lava lotoifale aua ou te le to’a lelei i lo’u aapa atu mo isi,” o lana tala lea. “Ou te popole tele lava i manatu o isi tagata e uiga ia te a’u nai lo o o’u lava manatu e uiga ia te a’u ma le finagalo o lo’u Faaola ia te a’u.”

Ae fai mai Sister Laszczyk o lona aafiaga i le vaiaso atoa i le suesueina o le Luka 7, lea e talanoaina ai galuega auauna atu a le Faaola i nisi o tagata, sa mafua ai ona ia toe iloiloina ona faamoemoega. Sa ia fesili ifo ia te ia lava: “Pe o faaosofiaina ea a’u amioga e se manao faamaoni ia avea e faapei o le Faaola ma le tausia o isi, pe o na o lo’u kolosi eseina o aitema mai la’u lisi ina ia ou maua ni lagona lelei i le iloaina ua ou faamaeaina le galuega? Pe o sili ea ona o’u popole i le manuia o isi po o manatu o isi tagata e uiga i a’u amioga?”

Fai mai o ia sa oo ina ia iloaina lena vaega o le mulimuli i le Faaola—o le faia o le mea Na te faia i se tulaga e tulai mai—o lona uiga o le alofa atu ma le auauna atu pe a manaomia o ia, ae e le seiloga e talafeagai.

“O le avea ma soo e le tupufua e aunoa ma se taumafaiga,” o lana tala lea. “E le o taimi uma e faigofie ai. O le taimi, malosi ma mea tatou te ositaulagaina i auaunaga alofa faamaoni i isi o le a fesoasoani tatou te latalata atili atu ai i le Faaola.” Ma, sa ia faaopoopo mai, na te lagona le mafanafana i le iloaina ua fetalai mai foi le Alii ia aua nei o tatou tamomoe e televave atu nai lo lo tatou malosi (tagai i le Mosaea 4:27) pe fai mea e le mafai ona tatou faia e aunoa ma Lana fesoasoani.

O le iloaina o na mataupu faavae sa fesoasoani ai ia Sister Laszczyk e auai i se anapogi mo tagata o le aiga, e ui o le anapogi sa o se tulaga sa vaivai ai o ia i taimi ua tuanai. O lena foi malamalama ua faaosofia ai o ia e sui i se tulaga e sili atu ona lautele.

“Ou te manao ia ou malolosi atili i le tuuina atu o auaunaga nai lo le na o le faatalitali seiiloga e faasolo mai se pepa e saini ai [mo le faiga o ni auaunaga],” o lana tala lea. “Ou te manao ia avea a’u ma faiaoga asiasi e lelei atu. Ou te fia sailia nisi auala e mafai ona ou auauna atu ai i fafo atu o le Ekalesia i lo matou pitonuu. O le manatu ou te manao ia muamua lava oo mai o le ‘O le a se mea e mafai ona ou faia mo i latou?’ po o le ‘O le a se mea latou te manaomia?’ ae le o le ‘E i ai so’u taimi?’ po o le ‘E faapefea ona aafia au i lenei mea?’

Sa ia faaiu ai e faapea, “Tatou te manaomia lo tatou Faaola, ae e manaomia foi i tatou e lo tatou Faaola. Na te manaomia i tatou e fesoasoani e sii a’e le tasi ma le isi.”

Fai mai Francisco Samuel Cabrera Perez o Chihuahua, o Mekisiko, na te le manatu o ia o se tagata leaga; ua taumafai o ia e usitai i poloaiga ma faataunuu ona tiute i lona aiga ma i ona uso a tagata talu ona papatisoina o ia i le 16 o ona tausaga. Peitai o lena aafiaga na aofia ai le suesue i le soifuaga o le Faaola sa fesoasoani ia te ia e sui ai lona malamalamaaga e uiga i le avea ma soo mai se tulaga faalemafaufau i se tulaga moni.

I le suesueina o le Ioane 6:27–63, le lauga lea sa ta’u ai e le Faaola o Ia lava o le Areto o le Ola, sa oo ina vaaia ai e Brother Cabrera o ia lava i se faiga ua matele ai le toatele: o le vaai muamua lea o lona lava manuia patino.

“Ou te sueina i taimi uma lava se ‘mafuaaga’—’alofaga—se tasi pe sili atu e tolopo ai le faiga o o’u tiute,” o lana tala mai lea. O manatu e pei o le “Sei toeitiiti” po o le “O taeao” po o le “E leai se mea e topetope ai fua” e oo mai i lona mafaufau, na ia fai mai ai, “e faamalumalu mai e pei o ni manualii e punitia ai lo’u alualu i luma faaleaiga, faalealamanuia, faaagafesootai, ma, le mea aupito taua, o le alualu i luma e faavavau.”

O le mulimuli i le Faaola ina ua uma uma mea tatou te mananao i ai e avea ai i tatou o ni [tagata] “ua toeitiiti lava avea ma soo,” e le o ni soo moi, o lana tala lea. O le faitau e uiga i le tautino atu o le Faaola e usiusitai i le finagalo o le Tama ua faateleina ai le agaga tautino o Brother Cabrera lava ia, ma oo ai ina ia malamalama lelei atu i le ala e fesoasoani ai le ‘ai ma inu i le faamanatuaga i vaiaso taitasi e “tuu ese le tagata natura” (Mosaea 3:19).

“Ou te usitai i le uunaiga a le Agaga Paia ma faatagaina le mana o le Togiola e fai ai au ma au paia,” o le tala lea a Brother Cabrera. “Ina ia tupu lenei mea, e tatau ona ou atinaeina ia uiga o Keriso: avea e faapei o se tamaitiiti, e usiusitai, agamalu, lotomaualalo, onosai, alofa, loto ina usitai i le finagalo o le Alii” (tagai i le Mosaea 3:19).

A o taumafai Brother Cabrera e fai se taumafaiga malosi e tuu ese le tagata natura, sa ia maua se alofa faateleina mo le Tama Faalelagi ma Iesu Keriso, lona aiga, ona taitai, ma isi tagata. Sa ia iloa ua faateleina le faatinoga o lana galuega. Ae o le mea sili lava, sa ia iloa sa fiafia o ia—ae le’i mafatia i le—faia o mea e atiina ae ai le malo o le Atua.

“E ui sa masani ona ou vaai i le tulaga o le avea ma se soo o le Faaola o se avega, ae o le taimi lenei ua ou iloa o Lana amo e faigofie ma o Lana avega e mama ia” (tagai i le Mataio 11:30), Fai mai Brother Cabrera. “O le fuafuaga sili lena o le fiafia: ia mulimuli ia Iesu Keriso ma olioli faatasi ma Ia ma i le faavavau.”

Sa suesue e Chioma N., 15 tausaga, o Nigeria, le Ioane 7 ma le 3 Nifae 14 o se vaega o se manao ia usiusitai atili. Ua ia ioeina e faigata ona “fai ni isi o mea ou te le fiafia e fai—ae maise lava o le tapenaina o le umukuka ae o loo ou lē lava.” Peitai o loo i ai foi sona manao ia “alofa i tagata e siomia o ia,” ma sa ia iloaina, o le usiusitai o se tasi lea o auala e faaali atu ai lena alofa (tagai i le Ioane 14:15).

A o suesue Chioma i aoaoga a le Faaola e uiga i le usiusitai ma faitau e uiga i Lona gauai atu i le finagalo o le Tama Faalelagi, sa ia iloa ai, ona sa silafia e le Tama Faalelagi ma Iesu Keriso o le a tatou agasala ma se ese, ua La tuuina mai ai poloaiga e fesoasoani ia i tatou e tumau ai i le ala sa’o ma le vaapiapi. Sa ia aoaoina foi a aunoa ma le usiusitai, e le mafai ona tatou ulu atu i le malo o le Atua.

“Ua ou aoaoina e leai se tasi e atoatoa, ae o le usiusitai, e mafai ai ona tatou taumafai uma agai atu i le atoatoa,” o lana tala lea. “Ma ua ou aoaoina e tatau ona tatou usiusitai ina ia mafai ona faamanuia i tatou e le Tama Faalelagi.”

Sa ia maua se avanoa e faaali ai le usiusitai i le aoga ina ua faatonuina o ia e salu le potu aoga ae e le o lona taimi lea [e salu potu ai].

“Sa ou usiusitai ma le lotomaualalo a o ou faalogo i le Agaga Paia o ta’u mai ia te a’u ia ou usitai ma salu le potuaoga. Sa tete’i tamaiti o lau vasega, faapena foi ma le matou faiaoga. Ona o lenei mea, o lea ua iloa ai e tagata o au o se teine usiusitai ma lotomaualalo. Sa ou lagonaina le fiafia i le vaiaso atoa ona sa ou usiusitai.”

Sa ola ae Michelle Kielmann Hansen i Greenland ma o loo nofo nei i Tenimaka, o ia nofoaga uma e i ai se aganuu o le “faaali atu o le agalelei ma le loto fesoasoani,” o lana tala lea. I le tele o itu, sa ia fai mai ai, o nofoaga sa ia nofo ai sa fesoasoani i le faafaigofieina o le oo atu i se olaga faa-Keriso.

Ae peitai, i isi itu, fai mai o ia e faigata ona fesoasoani atu i tagata ia malamalama o le avea ma se soo o Iesu Keriso e le na o se gaoioiga faavaitaimi ae o se ituaiga o olaga. Fai mai o ia, o lana tupulaga, e aofia ai ni tamaitai se toalua e le lolotu latou te potu, e masani ona faigata ia i laua ona malamalama i se ituaiga olaga e aafia ai “na itula uma i le lotu,” auai i le malumalu, suesueina o tusitusiga paia, ma anapogi faalemasina. O le ola ai i se olaga o se soo [o Keriso] e sili atu le faigata pe a fetaiai o ia ma ala o faasalalauga leaga, gagana mataga, po o isi aafiaga le lelei i fafo. Fai mai a ia, “Faatasi ai ma na uunaiga, e mafai ona matuai luitauina le manatua o a’u moni o se soo o Iesu Keriso.”

E ioe Sister Hansen e faigata le avea ma se talavou matua i se lalolagi o ona amioga lelei ua foliga mai e feosofai solo i taimi uma. I nisi o tulaga, o le filifiliga i le va o le lelei ma le leaga ua manino lelei lava. I nisi o tulaga, e leai. Ae, fai mai a ia, e ui o tulaga e feagai ma ia o nisi taimi e faigata ai, ae o tusitusiga paia e faigofie lava.

“E sili atu ona faigata le avea ma soo o Iesu Keriso pe afai e te le iloa o Ia,” o le tala lea a Sister Hansen. “O tusitusiga paia o mea faigaluega ia mo i tatou e iloa ai o Ia. O taimi uma lava ou te le’i iloa pe faapefea ona faatino, sa otometi lava lo’u liliu atu i mea sa ou suesueina i taeao ma afiafi,” o lana tala lea. “O le suesueina o le soifuaga ma aoaoga [a le Faaola] sa fesoasoani ou te malamalama lelei ai sa Ia faia le mea na Ia faia ona e alofa o Ia ia i tatou uma lava.

“A o ou aoao atili e uiga ia te Ia, sa ou malamalama ai o le avea ma se soo o Iesu Keriso, o lona uiga o le iloaina o ai o Ia. Ma o lena mea sa fesoasoani ia te a’u ou te galue ai i auala sa Ia aoaoina mai. O le avea ma soo o le iloa lea [ma filifili] le mea e ono fai e Iesu Keriso i soo se tulaga lava—o lea, e taua ai le suesue e le aunoa i Ana aoaoga.”

O Stacey White, o se tina e toafa lana fanau mai i Initiana, ISA, sa moomoo lava mo se avanoa e fesoasoani ai i se tuaoi, uo, ia po o se tagata ese foi i le vaiaso sa ia suesueina ai le Mataio 25:35–40, lea o loo aoao mai ai le Faaola e faapea, o le auauna atu “i le tasi o e aupito itiiti o o’u uso nei” o le mea moni, o le auauna atu lea ia te Ia (fuaiupu e 40).

“Ona o a’u o se tina pisi e nofo i le fale ma se fanau laiti e toafa, o nisi taimi ou te lagona ai le le fiafia ona o le le mafai ona ou auauna atu i ni taimi se tele e pei ona ou manao i ai,” o le tala lea a Sister White. “Ou te pisi tele i le vaaiga o mea e mananao ai lo’u lava aiga o lea e tau leai ai se taimi mo se isi lava mea faaopoopo.”

Sa ta’ua e Sister White a o faaauau ona ia suesue, ma fefaasinoa’i i mau, ma mafaufau loloto i nei mau, tatalo mo ni avanoa e auauna atu ai, “e foliga mai e oo atu le vaiaso i se tulaga maualuga atu o le popolevale nai lo le mea e masani ona oo mai faatasi ma le tulaga faaletina”—o le mea mautinoa lava e le o le mea lea sa ia faamoemoe i ai.

“Sa i ai ni galuega faatino a le aoga e fesoasoani i ai, faateleina nai lo le tulaga masani ia gasu e tapena, vaovaoina o misa a tamaiti ma o latou tei, ma se mauga o tagamea lea e foliga mai e toe faaputuina lava e ia ia. O le lisi o mea e fai e foliga mai e le taitai lava ona uma. Sa foliga mai na le taliina la’u tatalo, a o ou moomoo mo le taimi avanoa ma le malosi e auauna atu ai i se tasi e ese mai nai lo la’u tane ma la’u fanau.”

Peitai, e oo ane i le afa o le vaiaso, sa faapea ona iloa ai e Sister White: e le faapea o lona le mauaina o le avanoa e auauna atu ai i fafo atu o lona aiga, ona faapea ai lea ua le taliina mai e le Alii ia lana tatalo, ma e le faapea foi e le’i auauna atu o ia i ni auala anoa.

“Sa tali mai le Alii i la’u tatalo e ala i le tuuina mai ia te au o na avanoa i totonu o lo’u lava aiga,” o lana tala lea. “E i ai taimi ou te lagona ai o le auauna atu i totonu o lo’u lava aiga atonu e le taulia, ma ina ia mafai ona faitaulia o se auaunaga, e tatau ona faia i fafo atu o le aiga, e tuuina atu i se tagata e ese mai nai lo se tagata o le aiga. Ae o lo’u malamalamaaga fou, a o ou teuina moega, fai tagamea, vaaia o tamaiti, ma le faia o o’u tiute uma i aso taitasi o se tina, sa ou faia ai loa ma se agaga fiafia atu. O a’u galuega sa le’i foliga mai o ni mea masani tele, ma sa ou iloaina sa ou faia se eseesega mo lo’u aiga.”

Mo Dima Ivanov o Vladivostok, Rusia, o le valaaulia e faatino le “aafiaga o le avea ma soo” sa oo mai i se taimi pisi ma le le malolo. Sa le’i leva atu ona tuua e Brother Ivanov lana galuega e amata lana lava pisinisi, talu ai e anoanoai ona tiutetauave e mafaufau i ai e faatatau i le galuega, sa ia mafaufau ai pe o le a faigata ia te ia ona faatumauina le avea ma soo i le pito i luma o ona mafaufauga.

Ae, sa malie lava o ia e faatino, ma ona o le avea ma soo o lona uiga ia te ia o le “usitai ma mulimuli i faatonuga po o fautuaga a se faiaoga,” o lea sa ia vailiilia ai le Lauga i luga o le Mauga, o loo maua i le Mataio 5 ma le 3 Nifae 12.

O le mea na iloa e Brother Ivanov a o ia suesueina uiga iloga o lena lauga, na fai mai a ia, o ona lava vaivaiga. Ae o le iloaina na folafola mai le Faaola o i latou o e faamaualaloina i latou lava o le a faapea ona avea mea vaivai ma mea malolosi (tagai i le Eteru 12:27), Sa liliu atu Brother Ivanov ia te Ia, i le sailia o avanoa e tuputupu ae ai.

“Sa ou lagonaina le latalata mai o le Faaola ia te a’u,” o le faamatalaga lea a Brother Ivanov. “Ua ou aoaoina o Ia o le Faiaoga silii, ma ua ou aoaoina auala e mafai ona ou avea atili ai e faapei o Ia. A o ou suesue e uiga i le natura o le avea ma soo, ua ou aoaoina ai e mafai ona tatou maua ni auala fou e avea ai faapei o le Faaola i taimi uma tatou te suesue ai i Lona soifuaga. Ona faaauau lea ona tatou aoao i ai e ala i le mulimuli i Lana faataitaiga. E tatau ona tatou faataitaia mea tatou te aoaoina.”

Fai mai o ia o lona malamalamaaga e uiga i le avea ma soo sa suia i le aluga o le vaiaso. “O le mulimuli i le Faaola e le na o le suesueina o mataupu faavae o le talalelei po o le usitaia o Ana poloaiga,” o lana tala lea. Po o fea lava tatou te i ai po o le a foi le mea o tatou faia, e mafai ona i ai so tatou “manao moni e mulimuli i Lana faataitaiga ma ia i ai le naunau e avea faapei o Ia.”