Sa Foafoaina le Lalolagi mo Fanau a le Tama Faalelagi

“Auola!” o le tala lea a Ana. “Vaai i fetu uma lava.” Sa tau fai tilotilo ae tagata o le aiga o Ana mai le afi o le tolauapiga. Sa foliga mai sa faitau miliona fetu sa i ai i le lagi pogisa.

“Mafaufau i ai,” o le tala lea a Tina, “o na fetu taitasi o foafoaga na a le Tama Faalelagi.”

“Tatou ta’u mai se mea e tasi e sili ona tatou fiafia i ai ua foafoaina e le Tama Faalelagi mo i tatou,” o le fautua mai lea a Tama.

“Ou te iloa,” o le vave oso mai lea a Tanielu. “ou te fiafia i na galu tetele sa tatou vaai i ai i le sami i le tausaga ua tea.”

Sa le iloa e Ana se mea e filifili ai. Sa mafaufau o ia i le la mafanafana, le masina susulu, ma fugalaau manogi mananaia. Ona ia manatua ai lea o lona fiafia tele i soo se ituaiga o meaola vaivai ma taufulufulua. “O meaola!” sa ia fai mai ai.

Sa amata ona tetete ia Ana, o lea sa faapulupulu ai o ia e Tama i se palanikeke. “Ina ua uma ona foafoaina e le Tama Faalelagi ia nei mea matagofie uma mo Lana fanau, sa Ia silasila ifo i ai ua lelei,” o le tala lea a Tama.

Sa lagona e Ana le mafanafana ma le fiafia. Sa ia toso ae le palanikeke e tau i lona auvae ma toe tilotilo ae i luga i fetu. “Faafetai lava, Tama Faalelagi,” o lana musumusu lea.