Sa Faapena Foi le Pisi o Lo’u Faiaoga Seminare

I Filipaina, e i ai aoga maualuluga faasaienisi e malosi lo latou taulai atu i tulaga faaakatemia. O tamaiti i nei aoga e tele atu mataupu latou te aveina, tele atu le taimi latou te faaaluina i totonu o vasega, ma e tele atu a latou meaaoga. O le ituaiga o siosiomaga lea sa ou i ai ao avea au ma tamaitai talavou.

Sa ou lafoaia le tele o gaoioiga ina ua ou ulufale atu i le aoga maualuga ona sa ou iloaina o le a ou faaaluina le tele o le taimi e suesue ai. Sa toetoe lava ina a ou le alu i gaoioiga a le Ekalesia ma sa fai ma misi a’u lotu i Aso Sa ona o meafai a le aoga. Sa ou tauivi foi ma le auai atu i le seminare.

I se tasi Aso Toonai sa tau mai ai e lo matou faiaoga seminare ia lona pisi i aso o aoga. E ui lava i ana fuafuaga faatulagaina, sa mafai lava ona ia faia meaaoga o le seminare ma a’o ana mau tauloto i le potutusi. Sa ou filifili loa e fai lana lui ma a’u foi lui. Sa ou feaveaiina au kata o mau tauloto i taimi uma ma faamanatu pea i taimi ou te avanoa ai. Sa ou tatalo mo le fesoasoani ia faapaleni au suesuega mo le seminare ma le tele o mea e fai i le aoga. Sa ou taulotoina mau ao o ou alu atu i le aoga. Sa ou ave ifo i fafo au kata a o matou talanoa ma a’u uo. I taimi o malologa pupuu ma malologa umi, sa fiafia au uo e fai au suega pupuu i kata o mau tauloto. Ona amata foi lea ona aumai e nisi o i latou a latou tusitusiga paia ma talanoa e uiga i gaoioiga i a latou lotu. Sa ou lagonaina le suia o le siosiomaga na siomia ai a’u, ma sa avea le aoga ma se mea na māmā teisi ma lelei atu.

Sa mulimuli o’u uso laiti i la’u faataitaiga, ma o lenei ua selesele e lo’u aiga ia faamanuiaga o tusitusiga paia i totonu o le matou aiga. O le aoaoina o fuaitau o au mau tauloto sa o se gaoioiga faigofie lava, ae o le mea na sili atu le taua nai lo le taulotoina o upu, sa ou aoaoina ai le eseesega e mafai ona fai e tusitusiga paia ia te a’u ma tagata e siomia au. Ua ou iloa po o a lava luitau po o tofotofoga tatou te feagai, o le a tatou maua i taimi uma le malosi ma le taitaiga i afioga a lo tatou Faaola agaalofa.