Ua Uunaia e le Ekalesia Tagata o le Au Paia i le Lalolagi Atoa ina ia Auauna atu i le Lotoifale

I le tausaga ua tuanai pe a, sa tuu ai e le Matagaluega o le Uelefea a le Ekalesia se faamamafa fou i tagata o le au paia i le salafa o le lalolagi e tuuina atu fesoasoani i o latou lava nuu.

Ua fautuaina e le Tautua Fesoasoani mo Tagata o le LDS.org, “O a manaoga po o luitau tou te vaai pe faalogo i ai? … Afai tou te silafia se manaoga i o outou nuu ae le o mafai ona maua se polokalama faavae e taulima ai lena manaoga, ia taulamua i le sailia o se tali” (i le LDS.org, kiliki i le Resources, Welfare, Humanitarian Service).

O le tali a Lynn Samsel, faatonusili o faalavelave faafuasei mo le Ekalesia, na ia ta’ua ai ni mea e aoga ai le tali atu i fesoasoaniga mo tagata i le tulaga faale-lotoifale: “E vave atu, e laitiiti ni faafitauli i ofisa o tiute, e mafai ai e le Ekalesia ona faatau oloa a le atunuu lava ia ua masani ai tagata, e lagolagoina ai le tamaoaiga i le lotoifale, ma e fesoasoani e atiina ae ai sootaga.”

I le 2011, o fetuatuana’i faaupufai o faiganuu na faitau afe ai tagata i le tele o atunuu Arapi ua leai ni mea e nonofo ai. Nai lo le tuufaatasia i Sate Leki o pusa o vailaau ma mea e faamama ai ma auina atu i Sasae Tutotonu, sa tuuina atu e le Ekalesia ni tupe i au peresitene o eria i le lotoifale. O tagata e 50 o le ekalesia e nonofo i Ioritana, na mafai ona galulue vaavaalua ma isi faalapotopotoga e tuufaatasia ma tufatufa pusa e 40,000 o vailaau ma mea e faamama ai atoa ai ma afifi o meaai, i le na o le lima o aso.

I le lalolagi atoa, e mafai e tagata taitoatasi o le au paia ona amatalia a latou lava galuega faatino auauna atu. I isi tulaga, e mafai e le paranesi, uarota, itu, po o le siteki ona faatulaga ni avanoa mo tagata o le au paia ma isi e auauna atu ai.

O toomaga faale-lotoifale, na faamatala ai e Gustavo Estrada o le Matagaluega a le Uelefea, e tele lava ina sili atu ona foia ai nai lo ni tali e tau mafaufauina i le mamao e fia afe maila.

Ina ua mavae le mafuie ma le galulolo i le aso 11 o Mati, 2011, lea na faatafunaina ai Iapani, sa faanatinati ona tali atu le Ekalesia. Sa latou auina atu tupe i taitai i le lotoifale, o i latou ia na faatauina meaai ma isi mea na manaomia, i totonu o le atunuu. O tagata o le au paia i Iapani e lei afaina i le mafuie, sa latou faapotopotoina mea na faatauina, i ni pusa e tusa ai ma manaoga patino o i latou na aafia i le faalavelave.

“A o o atu tagata o le au paia ma auauna atu i o latou nuu, e mafai ona latou fausia sootaga ma o latou tuaoi ma fiafia ai i le faatuatuaga e atiina ae ai mai le galulue faatasi i se faafitauli ua laugatasia ai,” o le saunoaga lea a Sharon Eubank, faatonusili o le tautua fesoasoani a le Ekalesia.

I le 2012, i se taumafaiga e faaitiitia le saoasaoa o tamaiti e maliliu i atunuu tauatia’e, na auina atu ai e volenitia AAG i Kana ni feau feaveai se 1.5 miliona i o latou tagata Kana, e faailoa atu ai ia i latou se galuega faatino o le faiga o tui puipui mo tagata, e se paaga a le Ekalesia.

“[O lea] a i ai se faafitauli i le lumanai, ua i ai se faavae e toe galulue soosoo tauau ai,” na saunoa ai Sister Eubank. “O le auauna atu faatasi e fausia ai le malamalama ma atiina ae vave ai le usoga moni faa-Kerisiano nai lo se isi lava mea e mafai ona ou mafaufau i ai.”