Ua Taulai atu Aposetolo i le Faatuatua i le Alii o Iesu Keriso i le taimi o Asiasiga i Filipaina

Na asiasia e Elder David A. Bednar ma Elder Quentin L. Cook o le Korama a Aposetolo e Toasefululua, faatasi ai ma isi taitai o le Ekalesia ia le Eria a Filipaina mai le aso 24 o Aokuso seia oo atu i le 2 o Setema, 2012.

I konafesi faaleautaitai perisitua, faigalotu a talavou nofofua matutua, konafesi faalesiteki, ma fonotaga a misiona, na aoao atu ai e le Usoga ia mataupu faavae ma uunaia le Au Paia e faamalolosia lo latou faatuatua ia Iesu Keriso.

I Laguna, na tali ai e Elder Bednar ia fesili a talavou nofofua matutua i le taimi o se fonotaga faapitoa. Na ia faamalamalama atu, “Na faaaoga e le Faaola ia fesili e fai ma se tasi o Ana meafaigaluega autu faafaiaoga. Afai tatou te taumafai e fai ni fesili musuia ma aoga pe a tatou manatunatu loloto ma tatalo, e mafai e i tatou ona gauai atu i se faagasologa e aoao ai, lea e mafai ai ona tatou maua musumusuga ma maua a tatou lava tali mai le Agaga Paia.”

I le Aso Sa i le faletapuai, o faleapitaga, ma isi potu o le Fale Autu o le Siteki a Legazpi, na matua le ofi i tagata o le au paia a o aoao atu Elder Cook, “Aua nei faatagaina lo outou masalosalo e faalavelave i lo outou faatuatua.”

Na ia faamamafaina le taua o tane ma ava o ni paaga tutusa i le faaipoipoga a’o ia aoao atu mai le “O Le Aiga: O Se Folafolaga i le Lalolagi” (Liahona ma le Ensign, Nov. 2010, 129).

Na faafeiloaia e Elder Cook ia tagata o le au paia ina ua maea le sauniga.

E lima itula na malaga ai tagata ma faifeautalai o Iloilo, i le Motu o Panay, i vaa ma pasi ina ia auai i sauniga na tuuina atu ai e Elder Bednar ia aoaoga i le faamalolosia o lo latou faatuatua ia Iesu Keriso ma fesoasoani i isi e o mai ia Keriso.

“Ua matou i ai iinei e aoao atu le talalelei a Iesu Keriso, ae e tatau lava ona tatou manatua o le faiaoga moni o le Agaga Paia,” o le aotelega lea a Sister Manguil, o se faifeautalai faamisiona o loo galue ai i le Misiona a Filipaina Iloilo.

I Cagayan de Oro na ta’u atu ai e Elder Cook i talavou matutua o le lotoifale, “Ua manaomia lava lo outou amiotonu, ma e manaomia foi ia malosi atu lenei atunuu. O le a i ai se aafiaga, o se taunuuga o le malosiaga o le Ekalesia i Filipaina o le a faamanuiaina ai tagata i le Atu Asia.”

Na ia fautuaina tagata o le ekalesia e taulai atu i mea e sili ona taua, ia faatoilalo le masalosalo, faaaoga le faatuatua, ma faaipoipo i le malumalu.

“O le taimi na aumai ai aoaoga o mataupu faavae ma mafaufauga faatusi paia na latou faasoa mai, sa [matua] taua,” o le saunoaga lea a le peresitene o le Siteki a Iligan Filipaina o Carlo V. Crisanto. “E moni lava o mataupu faavae ia matou te manaomia i le taimi nei. … E ui i valaauga uma o i ai, e sili lava ona taua le valaauga i le aiga.”

Na faaiu le asiasiga a Aposetolo i Filipaina i la latou fonotaga ma senate ma latou auai ai i se faafiafiaga faaleaganuu na faatinoina e le autalavou.