Pagpakigbahin sa usa ka Higala

Usa ka adlaw samtang nagtuon ko alang klase sa seminary, adunay nindot ug klaro nga impresyon nga akong nabati. Samtang nagbasa ko sa leksyon para sa sunod adlaw, nakahunahuna ko sa nawong sa usa ka higala sa eskwelahan ug may kusog nga pagbati nga ipakigbahin ang akong pagpamatuod ngadto kaniya.

Bisan pa sa kaklaro sa impresyon, nahadlok ko. Nabalaka ko nga tingali isalikway ko sa akong higala, ilabi na nga dili siya ang matang sa babaye nga mainteresado nga magpamiyembro sa Simbahan.

 Nahinumduman nako ang pakigpulong ni Sister Mary N. Cook sa kinatibuk-ang kapangulohan sa Young Women diin siya mihagit kanato nga magmakugihon ug magmaisugon.¹ Gusto kong mahisama niini, busa gisulatan nako kining bayhana ug mipamatuod sa katinuod sa Simbahan ug sa akong gugma sa Basahon ni Mormon. Pagkaugma gibutangan nako iyang bag og kopya sa Basahon ni Mormon lakip sa akong sulat.

 Sa akong katingala, ang akong higala mahinangpon sa ebanghelyo. Sukad niadtong adlawa, siya maghisgut kanako sa iyang nakat-unan sa pagtuon sa Basahon ni Mormon. Mga pipila ka semana ang milabay, gipaila-ila nako siya sa mga misyonaryo. Halos diha-diha dayon, siya nakadawat og kumpirmasyon gikan sa Espiritu Santo nga ang iyang nakat-unan tinuod. Ang mga misyonaryo ug ako mihilak samtang iyang giistorya ngari namo ang iyang mga pagbati. Sa wala madugay ang akong higala nabunyagan, ug ang iyang mga ginikanan natingala sa iyang mga kausaban.

 Malipayon kaayo ko nga nabuntog nako ang akong mga kahadlok ug nakatabang nga iyang mabatunan ang ebanghelyo.