Kita Kinahanglang Igaanak sa Tubig ug sa Espiritu

Kita nagtuo nga kinahanglang mabunyagan ug modawat sa gasa sa Espiritu Santo (pinaagi sa ordinansa nga gitawag og kumpirmasyon) aron makasulod sa gingharian sa langit. Ang Manluluwas mitudlo, “Gawas kon ang tawo igaanak sa tubig ug sa Espiritu, dili siya makasulod ngadto sa gingharian sa Dios” (Juan 3:5).

Gitudlo usab sa Ginoo nga ang ordinansa sa bunyag—sama sa ubang mga ordinansa sa ebanghelyo—kinahanglang ipahigayon sa usa ka takus nga naghupot sa priesthood: “Ang tawo kinsa gitawag sa Dios ug adunay pagtugot gikan kang Jesukristo sa pagbunyag, mokanaog ngadto sa tubig uban sa tawo. … Unya siya mopaunlod kaniya diha sa tubig, ug mopatunga pag-usab gikan sa tubig” (D&P 20:73–74).

Ang bunyag pinaagi sa pagpaunlod simbolo sa kamatayon ug paglubong sa makasasala ug sa espituhanong pagkatawo pag-usab sa tawo aron magpakabuhi diha sa “kabag-o sa kinabuhi” (Mga Taga-Roma 6:4). Pinaagi sa bunyag atong biyaan ang atong kinabuhi kaniadto ug magbag-o og kinabuhi isip disipulo ni Jesukristo. Kon kita makumpirmahan, kita mamiyembro sa Iyang Simbahan.

Ang bunyag naglakip usab og sagradong pakigsaad, usa ka saad, tali sa Langitnong Amahan ug sa indibidwal nga gibunyagan. Kita misaad nga mosunod sa Iyang mga sugo, moserbisyo Kaniya ug sa Iyang mga anak, ug modala sa ngalan ni Jesukristo. Siya nagsaad nga mopasaylo sa atong mga sala, “mobu-bu sa kabuhong sa iyang Espiritu [ngari kanato]” (Mosiah 18:10), ug motanyag kanato sa kinabuhing dayon.

Ang Manluluwas Mismo misunod sa sugo nga magpabunyag, bisan Siya walay sala (tan-awa sa Mateo 3:13–17). Siya gibunyagan aron magmasulundon, sa pagpakita og ehemplo alang kanato, ug sa “pagtuman sa tanan nga pagkamatarung” (tan-awa sa 2 Nephi 31:5–9). Busa, kadtong mipili nga magpabunyag misunod sa ehemplo sa Manluluwas.

• Kadtong may tinguha nga magpabunyag kinahanglang “magpaubos sa ilang mga kaugalingon sa atubangan sa Dios, … magpamatuod sa atubangan sa simbahan nga sila sa pagkatinuod naghinulsol sa tanan nila nga mga sala, ug [mahimong] andam sa pagdala diha kanila sa ngalan ni Jesukristo” (D&P 20:37).

• “Kami nagtuo [sa] … bunyag pinaagi sa pagpaunlod” (Mga Artikulo sa Hugot nga Pagtuo 1:4).

• Human sa bunyag, kita kumpirmahan isip miyembro sa Ang Simbahan ni Jesukristo sa mga Santos sa Ulahing mga Adlaw ug modawat sa gasa sa Espiritu Santo.

• Ang bunyag ug kumpirmasyon nagtugot sa Pag-ula ni Jesukristo nga espiritwal nga makalimpyo sa atong kinabuhi, lakip ang “kapasayloan sa … mga sala” (D&P 33:11).

• Pinaagi sa bunyag ug kumpirmasyon kita mahimong “mga katagilungsod sa mga balaan” sa “panimalay sa Dios” (Mga Taga-Efeso 2:19).