Pagbaton og Bag-ong Higala

Naglingkod ko uban sa akong mga higala sa dihang akong namatikdan nga usa ka bag-ong lalaki nga ginganlan og Michael mibalhin diha sa among lamesa sa tingpaniudto. Ingon og siya walay kaila apan gusto nga makabaton og bag-ong mga higala. Nakahukom siya nga molingkod uban sa mas magulang nga mga lalaki, kinsa nagpakaaron-ingnon nga iyang mga higala sa makadiyot apan gibugalbugalan hinoon siya. Gisigihan nila siyag sungog hangtud nga siya mihilak. Nakakita ko niini nga nahitabo ug wala ko mahimutang. Dayon akong nahibaloan nga si Michael dunay autism.

Nakahukom kong pangutan-on si Michael kon gusto ba siyang molingkod uban sa akong mga higala ug nako. Miingon siya nga dili, tingali nahadlok na sa mga tawo nga mosungog niya pag-usab. Nakahukom siyang mag-inusara na lang sa paglingkod.

Pagsunod adlaw, giduol ko siya ug gipaila sa akong mga higala. Akong makita nga nalipay siya nga wala ko mohunong, ug nagsugod mi sa pag-istorya. Akong nahibaloan nga siya maayong modula og tic-tac-toe. Hapit dili siya mapilde. Nahibaloan usab nako nga brayt kaayo siya. Nakaila siya sa tanang mga presidente sa U.S. ug makasulti unsa nga tuig sila nagserbisyo. Talagsaon siya, pero gamay rang mga tawo ang andam motan-aw lapas sa iyang kakulangan. Ang ubang mga estudyante mosungog nako nga maglingkod tupad niya, apan wala nako sila panumbalinga. Ganahan kong makig-uban ni Michael.

Kada adlaw samtang magkita mi atol sa paniudto, akong masulti nga si Michael nagkaanam ka malipayon. Naghandom siya sa paniudto kada adlaw, ug mao usab ako. Ang akong gituohan nga usa lang ka yanong buhat sa pagserbisyo mao ang sinugdanan sa talagsaong panaghigalaay.