Pag-focus sa mga MITHI

Ang unang mithi sa Young Women mao ang hugot nga pagtuo. Gani, ang hugot nga pagtuo mao ang unang baruganan sa ebanghelyo. Ang inyong hugot nga pagtuo kinahanglang mag-focus sa atong Langitnong Amahan ug sa Iyang Pinalanggang Anak, si Ginoong Jesukristo. Kinahanglang padayunon usab ninyo sa pagpalig-on sa inyong hugot nga pagtuo sa plano sa Dios sa kaluwasan.

Importante ang pagpalambo og hugot nga pagtuo sa pagtuman sa tanang mga sugo sa Dios, nakahibalo nga kini gihatag aron sa pagpanalangin kaninyo ug paghatag og kalipay. Inyong masugatan ang mga tawo kinsa mopili unsa nga mga sugo ang ilang sundon ug unsa ang ilang ibaliwala. Kini nga pagpili dili molungtad. Mosangpot kini ngadto sa kauyamot. Sa pagpangandam sa paghimamat sa Dios, kinahanglan kamong motuman sa tanan Niyang mga sugo. Nagkinahanglan og hugot nga pagtuo ang pagtuman niini, ug ang pagtuman sa Iyang mga sugo makapalig-on niana nga pagtuo.

Ang ikaduhang mithi sa Young Women mao ang diosnong kinaiya. Dinagko kana nga paagi sa pagsulti, “Ako anak sa Dios.” Aduna kamoy pagkadiosnon. Ang atong Langitnong Amahan milalang kaninyo.

Nakahunahuna ba kamo nga magpasalamat alang sa inyong kasingkasing? Tan-awa unsay mahimo niini. Nagbomba kini og igong likido kada adlaw aron makapuno og railroad tank car, mga 2,000 ka mga galon (7,570 ka litro). Sulod sa kasingkasing mao ang upat ka mga balbola nga moabli ug mosira 100,000 ka higayon sa usa ka adlaw, labaw sa 36 ka milyon ka higayon sa usa ka tuig, ug dili kini maguba. Walay hinimo sa tawo nga—papel, plastic, puthaw, o asero—nga moabli ug mosira niana ka daghan, niana ka sagad, nga dili maguba. Ang kada organ sa lawas maayo kaayo pagkahimo ug talagsaon kaayo ang mahimo niini.

Nakahibalo mo nga kon mosalom mo sa ilawom sa tubig nga dili moginhawa, kadiyot ra kaayo mo sa ilawom. Unsa ang makapaaghat ninyo nga moginhawa? Ang carbon dioxide gisukod sa duha ka gagmayng mga metro diha sa liog, ug kini mopadala og mensahe sa inyong utok nga mag-ingon, “Taas na kaayo ang level sa imong carbon dioxide. Ipagawas kini.” Mao nga mopaingon mo ngadto sa ibabaw ug moginhawa, mopagawas sa carbon dioxide.

Pagkanindot sa mga abilidad nga anaa sa inyong lawas! Atimana ang inyong lawas. Ayaw pagbuhat og bisan unsa nga makahugaw sa natural nga kaanindot niining talagsaon nilalang nga hinatag sa Dios.

Ang sunod nga mithi sa Young Women mao ang tagsa-tagsa nga bili. Ang matinud-anong disipulo ni Jesukristo mahimong mahalaron nga anak sa Dios—mas gustong magmatarung kay sa pagkahakog, mas mopakita og kapuangod kay sa pagdominar, mas mapasaligon ngadto sa kaligdong kay sa pagkainila.

Nasayud kamo sa inyong walay katapusan nga bili. Sa pagkatinuod, ang kada matinud-anong batan-ong babaye sa Simbahan namahayag nga ang tagsa-tagsa nga bili mao ang usa sa iyang labing gimahal nga bili. Siya mipahayag, “Ako adunay walay katapusan nga bili uban sa akong balaan nga misyon nga akong paningkamutan nga matuman” (Personal nga Kauswagan sa Young Women [booklet, 2009], 29). Magamit usab sa batan-ong mga lalaki. Ang kada anak sa Dios adunay walay katapusan nga bili tungod sa iyang balaan nga misyon.

Ang tagsa-tagsa nga bili naglakip usab sa kalamboan sa inyong pagtuo isip indibidwal. Walay laing makapalambo sa inyong pagtuo alang ninyo. Mahimo kang maghandom nga makabaton og pagtuo sama kang Presidente Thomas S. Monson o sa ubang bayani, apan kinahanglan inyong ipalambo kini sa inyong kaugalingon. Kon kamo masayop, isip indibidwal kamo makahinulsol niining miaging mga problema. Sa dihang gibunyagan kamo ug nakadawat sa gasa sa Espiritu Santo, gihimo kini isip indibidwal. Mao nga isip indibidwal, kamo nakigsaad. Kini nga mga ordinansa sa kaluwasan ang tanan anaa ra sa indibidwal.

Ang labing importante nga mga ordinansa ug mga panalangin sa pagkamiyembro sa Simbahan magagikan sa templo. Didto duna kitay mga ordinansa sa endowment ug sa mga pagbugkos ngadto sa mga ginikanan, mga magtiayon, ug mga katigulangan. Ang tanang mga ordinansa sa kahimayaan butang sa pamilya. Nakita ba ninyo ang kalainan? Ang mga ordinansa sa kaluwasan alang sa indibidwal; ang mga ordinansa sa kahimayaan naglakip og labaw sa usa ka tawo.

Ang sunod nga mithi sa Young Women mao ang kahibalo. Sa Simbahan, ang pag-angkon og edukasyon ug pag-angkon og kahibalo mga relihiyoso nga responsibildad. Edukaron nato ang atong mga hunahuna aron moabut ang adlaw nga bililhon ang atong pagserbisyo ngadto sa uban. Ang pagkaedukado mao ang kalainan tali sa paghandom lang nga makabuhat og maayo ug makahimo sa pagbuhat og maayo.

Ang mga tawo kanunay nga mangutana nako kon sama sa unsa ang mahimong usa ka doktor. Mangutana sila, “Unsa ka dugay ka nag-eskwela?” Nan, taas kaayong panahon. Gikan sa panahon nga akong nakab-ot ang medical degree hangtud sa panahon nga akong nadawat ang unang bayad alang sa propesyonal nga mga pagserbisyo mga 12 ½ ka tuig. Taas kadto nga panahon, apan pilay may akong edad paglabay sa 12 ½ ka tuig kon wala ko mohimo niana? Pareho ra. Mao nga maayong maningkamot na lang kamo kutob sa inyong mahimo.

Ang akong medikal nga edukasyon maoy nakapahimo nako sa pag-opera ni Presidente Spencer W. Kimball (1895–1985) niadtong 1972. Mao nga ayaw ibaliwala ang kahibalo. Ang himaya sa Dios sa tinuod mao ang salabutan (tan-awa sa D&P 93:36).

Ang sunod nga mithi sa Young Women mao ang pagpili ug pagkamay-tulubagon. Lain kini nga paagi sa pagsulti sa “moral nga kabubut-on.” Ang moral nga kabubut-on kabahin sa kinabuhi tungod kay gusto sa Langitnong Amahan nga kada usa nato molihok alang sa atong kaugalingon ug mahimo unsay gusto nato nga mahimo.

Ang pagpili ug pagkamay-tulubagon nagsulti ninyo nga sa kada pagpili nga inyong himoon, may tulubagon kamo sa mga sangputanan niana nga pagpili. Mao nga kita kinahanglang mohimo og responsable nga mga desisyon. Dili tingali importante kaayo kon kamo magsul-ob og asul o pula nga kurbata o purple o berde nga sinina, apan ang importante mao nga ang inyong pagpili makapaduol ba ninyo o makapahilayo gikan sa Ginoo ug sa Iyang pamaagi sa kinabuhi. Ug nganong nagtambag ug nangamuyo kami kaninyo sa pagsunod sa pamaagi sa Ginoo? Tungod kay kana mao ang pamaagi sa kalipay.

Ang sunod mao ang mithi sa Young Women sa maayong mga buhat. Kini nga mithi gisunod gikan sa kinabuhi ni Jesukristo, kinsa nahigugma sa katawhan. Sa pagpakita sa Iyang gugma alang sa katawhan, Siya miserbisyo kanila. Kon nahigugma kita sa usa ka tawo, ipakita nato kini pinaagi sa paghimo og maayo. Mao nga pagkat-on sa pagserbisyo: pangita og panginahanglan ug tubaga ang panginahanglan. Surprisaha ang mga tawo og maayong buhat nga wala nila planoha. Kita duna niana nga oportunidad sa balay, sa eskwelahan, ug sa simbahan.

Nakahinumdom ko sa unang higayon nga miadto ko sa Africa isip General Authority. Ang akong kauban sa pagbiyahe mao si Elder Russell C. Taylor. Kada buntag inig mata nako, akong nahibaloan nga gilimpyahan na niya ang akong sapatos. Wala kinahanglana nga iyang limpyahan ang akong sapatos, apan kana ang iyang paagi sa pag-ingon, “Gimahal ko ikaw.”

Ang sunod nga mithi sa Young Women mao ang kaligdong. Ang pulong kaligdong [integrity] nagagikan sa pulong integer, nagpasabut nga “tibuok” o “bug-os.” Sa medisina gihisgutan ang ka bug-os sa kasingkasing. Mao nga kon usahay adunay dili maayo—pananglit, naay samad sa kasingkasing—moingon ta nga nawad-an sa integridad; dili na makahimo sa unsay angay niyang buhaton. Gamiton ngadto sa mga tawo, ang kaligdong nagpasabut nga ikaw masaligan—ikaw mapiyalan.

Sa mga kasulatan mabasa nato nga si Hyrum ang igsoon ni Propeta Joseph Smith gimahal sa Ginoo tungod sa “kaligdong sa iyang kasingkasing” (D&P 124:15). Ang Ginoo wala maghisgot sa anatomy sa kasingkasing; naghisgot Siya sa kaligdong sa espiritu ni Hyrum.

Ang labing bag-o nga mithi sa Young Women mao ang hiyas. Ang Hiyas usa ka talagsaon nga pulong. Unsay buot ipasabut niini kaninyo? Ang Hiyas nagpasabut nga “kaputli.” Apan adunay lain nga kahulugan. Nakahinumdom ba kamo sa Bag-ong Tugon sa dihang ang babaye nga gitalinug-an mihikap sa borlas sa saput sa Manluluwas? Ang Manluluwas miingon, “May mihikap kanako, kay gibati ko nga may gahum nga migula kanako” (Lucas 8:46). Nianang higayuna, ang hiyas adunay lahi nga kahulugan. Sa pinulongan sa Griyego kini ang pulong dunamis, nga maoy ugat diin nato gikuha ang mga pulong nga dynamo ug dinamita. Nagpasabut kini og “gahum.” Gusto namo kana nga duha ka matang sa hiyas alang ninyo bililhong mga batan-ong lalaki ug babaye.

Ang kahibalo makahatag og gahum, ang kaputli makahatag og gahum, ang gugma makahatag og gahum. Gusto namo nga kamo makabaton og gahum sa pagkab-ot sa tanan nga gusto sa Ginoo nga inyong makab-ot. Nagtubo kamo, nagkausab kamo, ug kamo ang may kaakohan sa unsay inyong dangatan.

Wala ko magtuo nga dunay kalainan kon kamo usa ka furniture salesman, doktor, abogado, o architect. Bisan unsang trabaho, bisan unsay moangay ninyo, nindot. Apan unsa ang importante mao ang unsay inyong makab-ot.

Pangutan-a ang inyong kaugalingon niini nga mga pangutana: Aduna ba akoy kaligdong? Adunay ba akoy kaputli? Aduna ba akoy gugma? Aduna ba akoy kapuangod? Kining tanan nga mga hiyas dili masukod. Ug sa inyong paghunahuna ug pagsunod sa mga hiyas sa mga mithi sa Young Women, makatabang kini kaninyo sa pagkab-ot sa tanan nga inyong makab-ot.