Ang Among Panalangin sa Pagtipig og Pagkaon

Ang akong asawa, si Brittney, ug ako misugod sa pagpamalit og pagkaon para itipig sa sayong bahin sa among kaminyoon. Sa bag-o pa ming kasal, kada higayon nga mag-grocery mi mamalit mi og pipila ka mga butang nga mahimong itipig. Sa hinay-hinay, kami nakatigom og magamit nga tinipig nga pagkaon. Wala mi nasayud kon kanus-a kini magamit, apan nasayud mi nga kini importante.

Usa ka tuig human mi naminyo, mibalhin mi og laing lugar para sa graduate school, ug among gidala ang pagkaon nga among gitipigan. Nagkalisud ang among pinansyal nga kahimtang. Among nagamit ang tanan namong tinigom sa pagbayad sa balay, ug si Brittney walay sweldo isip student teacher. Nagsalig kami sa akong assistantship sa graduate school sa pagbayad sa mga balayrunon, apan dili kini paigo.

Misamot ang among pinansyal nga kalisud sa ikaduhang gabii sa among bag-ong balay. Si Brittney nakabangon tungod sa grabeng sakit sa tiyan, ug sa dihang wala kini maayo sulod sa pipila ka oras, nangadto mi sa ospital. Gitang-tang ang iyang appendix pagkasunod adlaw.

Sa dihang naayo na siya, kami nagsabut sa pagbadyet sa among kwarta. Sa dihang among gikwenta ang balayrunon sa sunod nga upat ka bulan—nga naglakip sa emergency surgery—among nadiskobrihan nga makapadayon pa mi bisan dili mangutang. Aron mahimo kini, kinahanglan namong mogasto og dili molapas sa $25 kada bulan sa pagkaon. Kini 25 porsyento lang sa among budget sa una.

Ang pagkaon nga among gitipigan sulod sa milabayng tuig dako kaayo og gamit. Kini paigo sa among nag-unang kinahanglanon sulod sa upat ka bulan, ug among gigasto ang gibadyet nga $25 sa pagpalit og gatas ug uban pang pagkaon nga dili molungtad og dugay. Wala mi nangaon og lamiang pagkaon, apan wala mi gigutom.

Samtang nagpuyo mi nga madaginuton ug miserbisyo sa uban, kami nakadawat og dugang mga panalangin. Usa sa akong kaklase nakatapos na sa iyang degree ug mihangyo kanamo sa pagtabang sa iyang pamilya inigpamalhin. Samtang gitabangan namo sila, nangutana siya kon ganahan ba namong dalhon ang pagkaon nga nabilin sa freezer. Tungod sa iyang kabuotan, aduna nami karon karne nga madugang sa among tinipigang pagkaon.

Ang Ginoo mipanalangin kanamo samtang kami nagtipig og pagkaon, nagbayad sa among ikapulo, ug nagpakita sa kaandam sa pagserbisyo. Kami nakaluhatay niadtong mga bulana nga wala mangutang og kwarta. Human niadto nga semester, ang akong asawa nakakita og full-time nga trabaho, ug kami makapalit na og dugang pagkaon. Nagtipig mi pag-usab og pagkaon, ug kami padayong napanalanginan samtang nagsunod kami sa mga sugo sa Ginoo.