Alang ba Gihapon Kanako ang mga Sumbanan?

Ang pagpili nga magsul-ob og tarung nga sinina kanunay sayon para kanako. Nagdako ko sa usa ka balay diin taas ang mga sumbanan, ug sa dihang nagminyo ko diha sa templo, ang akong garments nagpahinumdon kanako nga magsinina og tarung.

Ang pag-shopping og swimsuit, hinoon, nahimong hagit alang kanako. Kon wala ang mga sumbanan sa pagsul-ob og garments, akong nakaplagan akong kaugalingon nga gustong magsul-ob og swimsuit nga maulaw ko nga makit-an sa akong mga kaila.

Ang akong bana ug ako nagplano nga mag-cruise nga kami lang duha. Naghunahuna ko nga ang cruise mao ang eksaktong panahon sa pagsul-ob sa ingon nga swimsuit. Walay kaila nga makakita nako, ug busa dili ko mobati nga sad-an. Walay mahibalo nga usa ko ka Santos sa Ulahing mga Adlaw, ug ang tanang mga babaye sa barko tingali magsul-ob og susama sa akoa.

Tungod minyo nako, wala nay rason alang kanako nga magsul-ob og tarung nga swimsuit, o maoy akong gihunahuna. Ang mga sumbanan sa tinarung nga sininaan para lang sa tin-edyer, dili ba? Apan adunay naghasol sa akong hunahuna. Naminyo ko sa templo. Nakab-ut nako ang akong tumong nga magpabiling takus ug makakita og takus nga bana. Ug ganahan kong magpadayon sa pagpili sa husto.

Mihukom ko nga basahon ang “Sinina ug Panagway” sa Alang sa Kalig-on sa mga Kabatan-onan. Taud-taud na nga wala nako maribyu ang booklet, busa ang pulong nakatandog pag-ayo kanako: “Pinaagi sa inyong sinina ug panagway, kamo makapakita nga kamo nakahibalo unsa ka bililhon ang inyong lawas. Kamo makapakita nga kamo tinun-an ni Jesukristo ug nga kamo nahigugma Kaniya” ([2011], 6).

Kini nga mga pulong nagbalik-balik sa akong hunahuna. Usa ba ko ka disipulo ni Jesukristo? Andam ba ko nga magmatinud-anon sa tanan nga mga panahon ug diha sa tanang mga dapit (tan-awa sa Mosiah 18:9)?

Sukad niadto nakahukom ko bisan hapit nako mag-30 anyos, nga kinahanglan nakong tumanon ang mga baruganan nga akong nakat-unan sa akong kabatan-onan. Kadtong mga baruganan siguradong ma-apply gihapon nako. Ganahan kong mahimong maayong ehemplo sa akong mga anak. Gusto nakong ipahibalo kanila nga ako usa ka disipulo ni Jesukristo.