Pagkadisipulo sa Tanang Panahon, sa Tanang Butang, sa Tanang Dapit

Si Kara Laszczyk sa Utah, USA, dugay na nga nasabtan nga ang pagkadisipulo usa ka tinguha sa pagsunod ug mahimong sama ni Jesukristo ug isip kaandam sa pagsakripisyo ug pagserbisyo sa pagpakigbahin sa Iyang ebanghelyo. Apan mibati siya nga ingon og napugngan tungod sa iyang pagkamaulawon.

“May kalagmitan kong ganahan nga mag-inusara lang kay dili ko komportable nga makauban ang ubang mga tawo,” mipasabut siya. “Nabalaka ko pag-ayo sa unsay pagtan-aw sa ubang mga tawo nako kaysa unsay pagtan-aw nako ug sa Manluluwas sa akong kaugalingon.”

Apan miingon si Sister Laszczyk nga sa iyang tibuok semana nga pagtuon sa Lucas 7, nga naghisgot sa pagpangalagad sa Manluluws ngadto sa katawhan nakapausab sa iyang mga motibo. Gipangutana niya iyang kaugalingon: “Ang akong mga lihok dinasig ba sa matinuorong tinguha nga mahimong sama sa Manluluwas ug moamuma sa uban, o nagbuhat lang sa mga butang diha sa akong lista sa buluhaton aron nindot akong pamati nga may nahimo? Mas nabalaka ba ko kabahin sa ikaayo sa uban o unsay hunahunaon sa uban mahitungod nako?”

Siya nakaamgo nga lakip sa pagsunod sa Manluluwas—pagbuhat unsay Iyang buhaton sa usa ka sitwasyon—nagpasabut nga mohigugma ug moserbisyo kon kanus-a siya gikinahanglan, dili lang kon komportable ra.

“Ang pagkadisipulo dili mahitabo nga walay paningkamot,” miingon siya. “Dili ni kanunay sayon. Ang panahon, kusog, ug kapanguhaan nga atong gisakripisyo alang sa tim-os nga gugma sa pagserbisyo ngadto sa uban mas makapaduol nato sa Manluluwas.” Ug, siya midugang, nga siya nadasig sa pagkasayud nga ang Ginoo wala misugo nato sa pagdagan sobra sa atong mahimo (tan-awa sa Mosiah 4:27) ni mobuhat sa mga butang nga dili nato mahimo kon walay Iyang panabang.

Ang pagkasayud niadtong mga baruganan nakatabang ni Sister Laszczyk nga moapil sa pagpuasa alang sa pamilya, bisan tuod usa ka hagit alang kaniya ang pagpuasa kaniadto. Kana nga kahibalo nakadasig usab niya nga mausab sa kinatibuk-an.

“Ganahan kong makaserbisyo nga dili kinahanglang sultihan kaysa magpaabut lang nga hangyoon,” siya miingon. “Ganahan kong mahimong mas maayo nga visiting teacher. Ganahan kong mangita og paagi nga makaserbisyo gawas sa Simbahan sa akong komunidad. Ganahan ko nga ang una nakong hunahuna mao ‘Unsay akong mahimo para kanila?’ o ‘Unsay ilang kinahanglan?’ dili ‘May panahon ba ko?’ o ‘Sa unsang paagi kini makaapekto nako?’

“Kita nanginahanglan sa atong Manluluwas,” siya mitapos, “apan ang atong Manluluwas nanginahanglan usab nato. Siya nanginahanglan nato sa pagtabang ug pagbayaw sa uban.”

Si Francisco Samuel Cabrera Perez sa Chihuahua, Mexico, miingon nga wala niya gikonsiderar ang iyang kaugalingon nga maldito; siya nagtinguha sa pagsunod sa mga sugo ug sa pagtuman sa iyang mga katungdanan ngadto sa iyang pamilya ug isigkatawo sukad nabunyagan siya sa 16 anyos pa. Apan ang eksperimento nga naglakip sa pagtuon sa kinabuhi sa Manluluwas nakatabang kaniya nga makasabut sa pagkadisipulo gikan sa teyoriya ngadto sa praktikal.

Sa pagtuon sa Juan 6:27–63, ang wali diin gitawag sa Manluluwas ang Iyang Kaugalingon nga Tinapay sa Kinabuhi, si Brother Cabrera nakaamgo diha kaniya sa kalagmitan nga anaa sa kadaghanan: unahon ang iyang personal nga kahayahay.

“Kanunay kong makakita og usa o daghan pang ‘mga rason’—mga pasumangil—nga dili buhaton ang akong mga katungdanan,” mipasabut siya. Ang mga pulong sama sa “Unya na” o “Inigka-ugma” o “Wala magdali” iyang mahunahunaan, siya miingon, “padayong nagpugong sa kalamboan sa akong pamilya, sa ekonomiya, sa sosyal, ug labaw sa tanan, mahangturong kalamboan.”

Ang pagsunod sa Manluluwas human mabuhat ang atong gusto makahimo natong “hapit nga mga disipulo,” dili tinuoray, miingon siya. Ang pagbasa sa pasalig sa Manluluwas nga hingpit nga motuman sa kabubut-on sa Amahan nakapalambo sa pasalig ni Brother Cabrera, ug siya mas nakasabut sa unsang paagi ang sakrament nakatabang kaniya nga “isalikway ang iyang kinaiyanhon nga pagkatawo” (Mosiah 3:19).

“Monunot ko sa impluwensya sa Espiritu Santo ug tugutan ang gahum sa Pag-ula nga mohimo nakong santos,” mipasabut si Brother Cabrera. “Aron kini mahimo, kinahanglan kong mopalambo og mga kinaiya sama kang Kristo: mahimo nga ingon sa usa ka bata, manunuton, maaghup, mapainubsanon, mapailubon, puno sa gugma, mauyunon sa pagdawat sa kabubut-on sa Ginoo” (tan-awa sa Mosiah 3:19).

Samtang naningkamot pag-ayo si Brother Cabrera sa pagsalikway sa kinaiyanhon nga tawo, iyang nakaplagan ang dugang gugma alang sa Langitnong Amahan ug ni Jesukristo, iyang pamilya, iyang mga lider, ug mga kauban. Iyang nakaplagan nga ang iyang mga nahimo sa trabahoan milambo. Ug labaw sa tanan, iyang nakaplagan nga siya nalipay—wala mag-antus sa—pagtukod sa gingharian sa Dios.

“Samtang gilantaw ko sa una ang pagkadisipulo sa Manluluwas isip usa ka palas-anon, karon akong nakita nga ang Iyang yugo sayon ug Iyang palas-anon gaan” (tan-awa sa Mateo 11:30), miingon si Brother Cabrera. “Mao kini ang dakong plano sa kalipay: Ang pagsunod ni Jesukristo ug sa pagmaya uban Niya karon ug sa kahangturan.”

Si Chioma N., 15 anyos, sa Nigeria, nagtuon sa Juan 7 ug 3 Nephi 14 isip kabahin sa iyang tinguha nga mahimong mas masulundon. Siya miangkon nga lisud sa “pagbuhat sa pipila ka mga butang nga dili ko ganahan —ilabi na ang pagpanlimpyo sa kusina kon gikapoy ko.” Apan siya may tinguha usab nga “higugmaon ang mga tawo sa iyang palibut,” ug ang pagkamasulundon, iyang nahibaloan, mao ang usa ka paagi sa pagpakita niadtong gugma (tan-awa sa Juan 14:15).

Samtang si Chioma nagtuon sa mga pagtulun-an sa Manluluwas kabahin sa pagkamasulundon ug nagbasa kabahin sa Iyang pagtuman sa kabubut-on sa Langitnong Amahan, iyang giila nga tungod ang Langitnong Amahan ug si Jesukristo nasayud nga kita makasala ug mawala, Sila mihatag nato og mga kasugoan sa pagtabang nato nga maanaa sa higpit ug tul-id nga dalan. Nakat-unan usab niya nga kon dili magmasulundon, dili kita makasulod sa gingharian sa Dios.

“Nakat-unan nako nga walay tawo nga hingpit, apan uban sa pagkamasulundon, maningkamot kita padulong sa pagkahingpit,” siya miingon. “Ug akong nakat-unan nga kita kinahanglang magmasulundon aron ang Langitnong Amahan makapanalangin nato.”

Siya nakakita og oportunidad nga ipakita ang pagkamasulundon sa eskwelahan sa dihang siya gisugo sa pagpanilhig sa klasehanan bisan kon dili niya turno.

“Mapainubsanon kong misunod samtang naminaw ko sa Espiritu Santo nga nagsulti kanako nga mosunod ug manilhig sa klasehanan. Nasurprisa ang akong mga klasmeyt, ug among magtutudlo. Tungod niining insidente, ang mga tawo miila nako isip masulundon ug mapainubsanong babaye. Malipayon ko sa tibuok semana kay nagmasulundon ko.”

Si Michelle Kielmann Hansen nagdako sa Greenland ug karon nagpuyo sa Denmark, duha ka mga lugar nga adunay kultura sa “pagpakita og kamabination ug matinabangon,” siya miingon. Sa daghang paagi, siya miingon, nga ang mga lugar diin siya nakapuyo nagtabang niya nga mas sayon nga magpakabuhi og Kristohanong kinabuhi.

Sa ubang mga paagi, hinoon, siya miingon nga lisud sa pagpasabut sa mga tawo nga ang pagkadisipulo ni Jesukristo dili lang kalihokan nga may tagal sa panahon apan usa ka paagi sa pagpakabuhi. Siya miingon nga ang iyang mga kaedad, lakip sa duha ka dili miyembro nga mga kauban sa kwarto, sa kanunay naglisud sa pagsabut sa estilo sa iyang kinabuhi nga naglakip “niadtong tanang oras nga naa sa simbahan,” pag-adto sa templo, pagtuon sa kasulatan, ug binulang pagpuasa. Ang pagpakabuhi sama sa disipulo nahimong mas lisud sa dihang nag-atubang siya og dili angay nga media, binastos nga pinulongan, o negatibong impluwensya sa gawas. “Tungod niining mga impluwensya,” miingon siya, “lisud kaayo sa paghinumdom nga ako sa tinuoray disipulo ni Jesukristo.”

Miangkon si Sister Hansen nga lisud nga mahimong young adult sa kalibutan diin ang moral nagkaanam og kahanaw. Sa pipila ka sitwasyon, ang pagdesisyon tali sa sakto ug sayop klaro. Sa ubang sitwasyon, dili. Apan, miingon siya, bisan tuod ang sitwasyon nga iyang nasinati usahay komplikado, ang mga kasulatan yano lang.

“Mas lisud nga mahimong disipulo ni Jesukristo kon wala ka kaila Kaniya,” miingon si Sister Hansen. “Ang mga kasulatan mao ang himan aron kita makaila Kaniya. Matag higayon nga wala ko masayud unsay buhaton, mosalig ko dayon sa akong gitun-an sa buntag ug sa gabii,” siya miingon. “Ang pagtuon sa kinabuhi ug mga pagtulun-an [sa Manluluwas] nakatabang nako nga mas makasabut nga Iyang gibuhat unsay Iyang gipangbuhat tungod kay nahigugma siya nato.

“Samtang mas nagkat-on ko kabahin Kaniya, akong nasabtan nga ang pagkadisipulo ni Jesukristo nagpasabut nga masayud kon si kinsa Siya. Ug kana nakatabang kanako sa paglihok sumala sa Iyang gitudlo. Ang pagkadisipulo mao ang pagkasayud [ug pagpili] unsay buhaton ni Jesukristo sa bisan unsa nga sitwasyon—busa, importante nga tun-an ang Iyang mga pagtulun-an kanunay.”

Si Stacey White, inahan og upat ka bata sa Indiana, USA, nagtinguha og oportunidad sa pagtabang sa silingan, higala, o gani estranghero sa semana nga siya nagtuon sa Mateo 25:35–40, diin ang Manluluwas nagtudlo nga ang pagserbisyo “sa mga labing gagmay niining akong mga igsoon” sa tinuoray, nagserbisyo Kaniya (bersikulo 40).

“Tungod kay busy ko nga stay-at-home mom sa upat ka bata, usahay mobati ko og kasagmuyo nga wala ko makaserbisyo kutob sa akong ganahan,” mipasabut Sister White. “Busy kaayo ko sa pag-atiman sa mga panginahanglan sa akong pamilya nga wala na koy ekstra nga panahon.”

Si Sister White mipasabut nga samtang siya nagpadayon sa pagtuon, pag-cross-reference, ug pagpamalandong niining mga kasulatan, pag-ampo sa mga oportunidad nga makaserbisyo, “ang semana ingon og mas kapoy kaysa normal nga semana kabahin sa pagkainahan”—siguradong dili mao ang iyang gilauman.

“Mas nagkadaghan ang mga proyekto sa eskwelahan nga tabanganan, mas daghang hugaw nga limpyohan, mas daghang away sa mga bata nga husayon, ug nagtipun-og nga mga labhunon. Ang mga buluhaton ingon og walay kahumanan. Ang akong mga pag-ampo ingon og wala matubag samtang naghandum ko og libreng panahon ug kusog aron moserbisyo sa uban gawas sa akong bana ug mga anak.

Apan tunga-tunga sa semana, si Sister White nakaamgo, tungod lang nga wala siyay oportunidad nga makaserbisyo gawas sa iyang panimalay wala magpasabut nga wala tubaga sa Ginoo ang iyang pag-ampo, ug wala ni nagpasabut nga siya wala makaserbisyo sa makahuluganong paagi.

“Gitubag sa Ginoo ang akong pag-ampo pinaagi sa paghatag nako niadtong mga oportunidad diha mismo sa akong pamilya,” siya miingon. “Usahay mibati ko nga ang pagserbisyo sa akong pamilya walay apil, nga aron matawag nga serbisyo, kinahanglang gawas kini sa panimalay, himoon ngadto sa usa ka tawo nga dili sakop sa pamilya. Apan uban sa akong bag-ong pagsabut, samtang nag-ayo sa mga higdaanan, nanglaba, naghatud sa mga bata, ug nagbuhat sa akong inadlaw nga mga buluhaton isip inahan, mas malipayon ko kining gibuhat. Ang akong buluhaton ingon og dili na kaayo ordinaryo, ug nakaamgo ko nga nakahimo ko og dakong kalainan para sa akong pamilya.”

Para kang Dima Ivanov sa Vladivostok, Russia, ang imbitasyon nga moapil sa “eksperimento sa pagkadisipulo” miabut nga busy kaayo siya. Bag-ohay lang nga miundang si Brother Ivanov sa iyang trabaho aron magnegosyo, ug tungod kay daghan kaayo siyang trabahuonon, siya naghunahuna nga tingali maglisud siya nga unahon sa paghunahuna ang pagkadisipulo.

Gihapon, miuyon siya nga moapil, ug tungod kay ang pagkadisipulo nangahulugan kaniya nga “motuman ug mosunod sa direksyon o tambag sa magtutudlo,” iyang gitun-an pag-ayo ang Wali sa Ibabaw sa Bungtod, makita sa Mateo 5 ug 3 Nephi 12.

Ang nakaplagan ni Brother Ivanov samtang nagtuon siya sa mga kinaiya nga gilatid diha sa wali, siya miingon, mao ang iyang mga kahuyang. Apan nasayud sa saad sa Manluluwas niadtong magmapainubsanon sa ilang kaugalingong kahuyang nga mahimong malig-on (tan-awa sa Ether 12:27), si Brother Ivanov miduol Kaniya, nagtinguha og mga oportunidad nga molambo.

“Mibati ko nga mas duol ang Manluluwas nako,” mi-report si Brother Ivanov. “Akong nakat-unan nga Siya ang labing gamhanang Magtutudlo, ug nakakat-on ko og mga paagi nga mas mahisama Kaniya. Samtang nagtuon ko sa kinaiya sa pagkadisipulo, akong nakat-unan nga kita makakaplag og bag-ong paagi nga mahisama sa Manluluwas matag higayon nga magtuon ta sa Iyang kinabuhi. Ug kita magpadayon sa pagkat-on niini pinaagi sa pagsunod sa Iyang mga ehemplo. Kinahanglan natong buhaton ang atong nakat-unan.”

Siya miingon nga ang iyang pagsabut sa pagkadisipulo nausab sa usa ka semana. “Ang pagsunod sa Manluluwas dili lang pagtuon sa mga baruganan sa ebanghelyo o pagtuman sa Iyang mga sugo,” siya mipasabut. Bisan asa pa ta o bisan unsa atong buhaton, kita makabaton sa “tinuoray nga tinguha sa pagsunod sa Iyang ehemplo ug makabaton sa intensyon nga mahisama Kaniya.”