“Usa sa akong mga higala nakasilo kaayo nako. Nasayud ko nga kinahanglan kong magmapasayloon, apan unsaon man nako nga mawala ang kasakit?”

Tuguti ang Ginoo nga mao ang maghukom sa makadaot nga mga binuhatan sa uban. Hinumdumi nga ang Ginoo miingon: “Ako, ang Ginoo, mopasaylo kinsa Ako mopasaylo, apan kamo gikinahanglan nga mopasaylo sa tanan nga mga tawo” (D&P 64:10). Lisud nga kalimtan ang gibating ka sakit, apan kon ikaw mag-ampo alang sa panabang, imong maamguhan nga ang pagpasaylo makaayo sa grabi nga mga samad ug ang kasilag pulihan sa kalinaw ug gugma nga ang Dios lamang ang makahatag.

Ang mga pag-antus ni Ginoong Jesukristo nakadugo sa matag lungag sa Iyang panit, apan Iyang gibuntog ang kasakit ug adunay kalig-on sa pagpasaylo samtang diha sa krus. Dili tungod nga wala Niya batia ang kasakit apan tungod alang Kaniya, ang bugtong butang nga importante mao ang kabubut-on sa Amahan. Sama usab nato, ang bugtong butang nga importante mao ang kabubut-on sa Dios, ug gusto Niya nga kita mopasaylo sa tanan. Bisan og hinay maayo ang atong mga samad, atong mabuntog ang atong kasakit pinaagi sa pag-ampo ug sinsero nga pagpasaylo niadtong nakabuhat og sayop nato.

Akong nakaplagan nga ang labing maayo nga pag-atubang sa ka sakit mao ang paghigugma sa tawo nga nakasilo kaninyo. Human ang usa ka tawo makasilo nako, akong paningkamutan nga makadayeg nila ug mopakita og dugang nga kabuotan ngadto nila kutob sa mahimo. Pinaagi sa pagbuhat niini, ang kasuko dili mograbe diha ninyo. Hinoon mawala kini sa hingpit. Kamo adunay nalig-on nga relasyon niadtong nakasilo ninyo.

Gibati ni Jesukristo ang inyong kasakit aron mapasaylo kamo sa inyong mga sala ug aron usab kamo makapasaylo sa uban. Kon mag-ampo kamo alang sa abilidad sa pagtan-aw sa usa ka tawo pinaagi sa Iyang mga mata, inyong makaplagan nga mas makasabut kamo nila. Paglabay sa mga semana, inyong mamatikdan nga ang dili maayong mga pagbati mawala.

Pag-ampo ngadto sa atong mahigugmaong Langitnong Amahan nga kamo ug ang inyong higala makabaton og kaisug sa pagpasaylo sa usag usa. Ang pagpasaylo sa usa ka tawo nga nakapasakit ninyo usa ka Kristohanon nga buhat. Ang pagpasaylo makatambal bisan sa labing sakit nga mga pagbati.

Mitudlo si Nephi, “Ang Ginoong Dios naghatag og usa ka sugo nga ang tanan nga mga tawo magbaton og gugma nga putli, kansang gugma nga putli tiunay nga gugma” (2 Nephi 26:30). Alang nako, ang gugma nga putli mao ang labing maayong paagi sa pagbuntog sa ka sakit kon usa sa akong higala ang nakasilo nako. Ang gugmang putli mao ang pagdawat sa mga kahuyang sa usa ka tawo; pagbaton og pailub sa usa ka tawo kinsa mipakyas kanato; o pagpugong sa kalagmitan nga masilo kon adunay tawo nga lahi ra og pamaagi kay sa atong gilauman. Kon kita adunay gugma nga putli ngadto sa atong mga higala, kita mapanalanginan.

Kinahanglang mag-ampo kamo aron makat-on sa paghigugma ug pagpasaylo sa uban. Bisan og ang pagpasaylo usahay lisud kaayo, ang atong Langitnong Amahan andam kanunay sa pagtabang nato. Hinumdumi ang ehemplo nga gipakita sa Manluluwas pinaagi sa pagpasaylo sa tanan. Mga Taga-Colosas 3:13 nag-ingon, “Mag-inantusay ang usa sa usa kaninyo, ug kon aduna may pagmahay sa usa batok sa usa, magpinasayloay ang usa sa usa: maingon nga ang Ginoo nakapasaylo kaninyo, nan kinahanglan kamo usab magapasaylo.” Ang tinuod nga pagpasaylo usa ka proseso, usahay taas kaayo. Apan kon kita tinud-anay nga mopasaylo, bation nato ang dakong kahupayan ug kalipay. Nasayud ako nga uban sa paningkamot makahimo kamo sa pagwagtang sa kasakit sa inyong kaugalingon ug makakaplag og tinuod nga kalipay.

Ang akong kasingkasing napuno sa kalipay sa dihang akong nahinumduman nga ang maulaon nga gahum ni Jesukristo makapawala sa atong kasakit. Kitang tanan adunay masakit nga mga kasinatian matag karon ug unya, apan pinaagi sa pagsunod gayud sa pulong sa Langitnong Amahan, makadawat kita og kusog nga atong gikinahanglan sa paglahutay. Bisan samtang gilansang Siya sa mga sundalo ngadto sa krus, mihangyo si Jesukristo sa Amahan sa pagpasaylo kanila. Ang Iyang kasingkasing puno sa gugma ug kalooy alang sa tanang mga tawo. Nasayud ako nga kon kita moduol ngadto Kaniya ug mangayo sa Iyang panabang, liyokan kita sa Iyang mahangturong gugma.