Mga Sumbanan para sa Tanang Panahon

“Unsa ang akong buhaton nga ako mahimo nga matawo sa Dios, … aron ako mapuno sa hingpit nga kalipay, aron ako dili isalikway sa katapusan nga adlaw? … ako mobiya sa tanan kong mga sala aron makaila [sa Dios]” (Alma 22:15, 18).

Sa dihang ang amahan ni Haring Lamoni nakadungog sa pulong sa Dios, siya determinadong biyaan ang tanan niyang mga sala aron makaila Niya. Sa dihang iyang nakat-unan ang mga sumbanan sa Dios, siya determinado nga sundon kini aron magpabiling duol sa Dios. Kauban sa mga Anti-Nephi-Lehi, siya mihimo ug mihupot sa iyang mga pakigsaad uban sa Langitnong Amahan ug “wala gayud mobiya” (Alma 23:6).

Ang baruganan sa pagkamasulundon magamit usab karon diha sa kinabuhi sa mga young adult. Sama sa gipasabut ni Vijay Patha sa India, “Ang pagkamasulundon mas makapaduol kanato sa Dios. Kini makahatag og kalinaw sa hunahuna, hugot nga pagtuo, kalipay, gugma ug pagkapositibo. Walay laing paagi niini gawas lang pinaagi sa ebanghelyo.

“Kon moabut ang lisud nga mga desisyon,” siya nagpadayon, “ang Espiritu Santo makagiya kanato. Kon walay mga limitasyon, mas grabe ang kakuyaw nga kita mahagbong. Ang pagtuman sa akong mga pakigsaad nagbutang kanako og mga limitasyon. Kini nga mga limitasyon nagpugong kanako sa pagkahulog ngadto sa wala mahibaloing mga dalan ug nakatabang kanako makadaghan sa pagrepresentar ni Kristo ug paglikay sa pagbuhat og mga butang sama sa pagpasipala. Ang paghan-ay og mga limistasyon naghatag og kaklaro.”

“Ako moadto ug mobuhat sa mga butang nga ang Ginoo nagsugo, kay ako nasayud nga ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila” (1 Nephi 3:7).

Usahay ang mga sugo ingon og lisud sundon, apan ang Langitnong Amanah misaad nga Siya kanunay moandam og paagi alang kanato aron makasunod. Sama ni Nephi, ang mga young adult kinsa determinado nga magmatinud-anon makasalig sa Langitnong Amahan aron makakaplag og kalig-on ug abilidad nga magmasulundon. Si Duncan Purser sa England naghisgot kanato sa unsang paagi kini nahitabo kaniya:

“Ang ikapulo usa ka sugo nga may gihan-ay nga mga limitasyon: kita mobayad og 10 porsyento sa atong kinitaan. Apan sa halad sa puasa kita hitagan og dakong pagpahaum sumala sa atong pagkamasulundon.

“Samtang nagtigom ko para sa matrikula sa unibersidad, ang ideya sa paghatag of halad sa puasa usa ka hagit para nako. Nanlimbasug gyud ko matag Dominggo sa puasa, naningkamot sa paghukom kon mobayad ba gyud ko ug kon pila ang ‘ubay-ubay’ nga halad. Mag-ampo ko, ug dili lang madasig ko sa pagbayad sa halad sa puasa apan mobati usab ko og dugang tinguha sa pagbuhat niini.

“Nasayud ko nga ang Ginoo mopanalangin niadtong nagsunod niining sugo, ug samtang nagsunod ko, anaa ra gyud ang akong mga nag-unang kinahanglanon sa kinabuhi. Samtang kita nagtuman sa ebanghelyo, nagsunod sa mga sugo, ug makaamgo nga kita mao ang ehemplo sa tanan nga nagpalibut kanato, ang atong tinguha nga mahimong mas maayo molambo, ug ang Ginoo mopakita nato unsay buhaton.

“Ang Ginoo naghatag kanato og mga sumbanan alang sa atong kaayohan. Kita makapili kon asa kutob nato tumanon kining mga sumbanan ug kon ang atong pagkamasulundon nakausab o wala makausab kanato. Sa akong kasinatian, nakita nako ang mga panalangin nga moabot samtang nagsunod ko sa mga aghat sa Espiritu.”

“Sila mituman ug naninguha sa pagbuhat sa matag pulong sa sugo nga walay pagkasayop niini; oo, ug gani sumala sa ilang hugot nga pagtuo kini nahimo ngadto kanila” (Alma 57:21).

Ang pagpaningkamot sa pagsunod nga walay sayop, sama sa gibuhat sa batan-ong mga mangugubat, makatabang sa mga sumusunod ni Jesukristo nga mahisama Kaniya. Apan ang atong Manluluwas ug Langitnong Amahan nakasabut nga walay tawo nga hingpit. Sa mga panahon nga kita makasala, Sila naghatag kanato og paagi nga kita makahinulsol ug mahimong mas maayo.

“Nawala kanako ang babaye nga akong gimahal tungod kay nakasupak mi sa balaod sa kaputli—gamay lang,” miingon si Tyler (ang panglan giusab). “Apan ang pagsupak sa balaod sa kaputli ‘bisan og gamay lang’ nakasupak gihapon sa balaod sa kaputli. Nawala nako ang talagsaong mga panalangin sa pagkamasulundon; gusto nako ang Espiritu sa akong kinabuhi.

“Dili nako gustong buhaton ang bisan gagmayng mga butang nga gihunahuna sa mga tawo nga OK ‘basta dili lang ta mainterbyu sa bishop.’ Ganahan kong sundon ang balaod 100 porsyento. Apan ang akong desisyon nga magmasulundon ulahi na kaayo sa pagluwas sa among relasyon; ang pagsupak sa balaod sa kaputli nakapahugaw niini.

“Ang balaod sa kaputli anaa alang sa atong proteksyon. Dili kini limitasyon sa atong gugma. Hinoon, kini mao ang labing maayo nga paagi sa pagpahayag sa atong gugma. Pinaagi sa pagtuman niini, kita moingon, ‘Gihigugma ko ikaw pag-ayo nga igong tahuron ka ug magsunod sa mga sugo sa Dios. Gihigugma ko ikaw pag-ayo nga atong isentro kang Kristo ang atong kinabuhi.’

“Isip mga single adult kita usab mosunod sa mga sumbahan diha sa Alang sa Kalig-on sa mga Kabatan-onan. Ang balaod sa kaputli patas nga magamit sa tanan, dili igsapayan ang inyong edad o sitwasyon. Mapasalamaton ko niining bag-ong nakaplagan nga pagpamatuod tungod kay kini mas nakapaduol nako sa Manluluwas ug sa akong mahangturong kapikas kon ako siyang makita.”

“Ug nahinabo nga sa pagkadawat ni Lehonti sa mensahe siya wala mangahas sa paglugsong sa bungtod. … Ug nahinabo nga sa diha nga si Amalickiah nakakita nga siya dili makapalugsong ni Lehonti gikan sa bungtod, siya mitungas ngadto sa bukid” (Alma 47:11–12).

Si Lehonti determinado nga magpabilin sa luwas nga dapit. Apan siya mihukom nga ang pagkanaog og gamay, aron makigkita sa iyang kaaway diha sa tunga, mahimo ra. Bisan tuod sigurado si Lehonti nga siya ang nagkontrolar, si Amalickiah nagsugod sa paghatag og “hilo sa hinay-hinay” (Alma 47:18) hangtud namatay si Lehonti, tingali wala masayud sa kakuyaw hangtud ulahi na.

Si Claudia R. sa Colorado, USA, naghisgut kanato kon giunsa niya pagpabilin sa luwas nga dapit:

“Mibati ko nga ang katilingban nagkaanam og kawalay klaro sa moralidad. Sama pananglit, ang mga tawo mohisgut kabahin sa alkohol, ‘Ang pagtilaw niini dili makamatay nimo.’ Kana nga matang sa pagpangrason nag-ilad lang sa imong paghunahuna. Ug sa niining mga sitwasyon—nga ingon og inosente—nga ang kabubut-on masulayan gayud.

“Busa magkat-on mo sa paghunong, magmalig-on. Pipila sa mga tawo madala nianang walay kaklaro, ug ang walay kaklaro nahimong sayop na gyud. Ug dayon maglisud na kamo sa paglingkawas.

“Nakasulay nako og pipila ka makalingaw nga mga pakig-date sa usa ka tawo, apan kausa kami lang diha sa sakyanan sa ngitngit, ug siya misulay sa paghikap nako. Nasayud ko nga ang iyang gustong buhaton mosantup sa imoral nga mga binuhatan. Dili ko gusto nga mahitabo kini, busa migawas ko sa sakyanan.

“Isip mga single adult, kon adunay usa ka butang nga mosumpaki sa atong mga sumbanan, kinahalanglan tang mobarug. Sa pagpakig-date, siyempre, gusto kang mokupot sa kamot, mogakos, ug mohalok. Apan gusto tang linglahon ni Satanas pinaagi sa paghunahuna nga ang balaod sa kaputli ingon og walay klaro diin ang dili hingpit nga pagsunod niini OK ra.

“Ang atong mga sumbanan kinahanglang lig-on gayud. Kinahanglan kita nga modesisyon sa dili pa moabut ang lisud nga mga desisyon. Kinahanglan tang magmalig-on kon ang mga butang sayop. Nasayud ko nga ang atong kalibutan dili sayon; adunay daghang mga buluhaton. Apan ang mga propeta ug apostoles naghatag kanato og mga sumbanan. Nagdala ko og Alang sa Kalig-on sa mga Kabatan-onan kanang bersyon nga paigo sa pitaka, ug kini nakatabang nako sa lisud nga mga higayon.”

“Kon sila walay gugma nga putli dili igsapayan nganha kanimo, ikaw nagmatinud-anon; busa, ang imong mga saput pagahimoon nga limpyo” (Ether 12:37).

Sa dihang si Moroni nag-ampo alang sa umaabot nga mga Hentil nga mapanalanginan, ang Dios miingon kaniya nga ang pinakaimportante mao nga siya nagpabiling matinud-anon. Ang kalibutan dili mopasayon sa mga matinud-anong mga young adult nga masunod ang ilang mga sumbanan. Apan kon ang uban mopili og laing dalan, posible gihapon nga mopili sa mas taas nga paagi.

Sama sa ubang mga young adult, si Victor Kim sa South Korea nakakaplag sa iyang kaugalingon nga maanaa sa sitwasyon diin ang uban dili niya sama og mga sumbanan.

“Usahay sa trabahoan, ang akong mga kauban ug ako manggawas aron mangaon isip team, ug sila kanunay mag-inom. Lisud gyud kaayo nga moapil nila, ug dili sayon sa pagbalibad sa tanan. Siguradoon nako nga sila nasayud nga dili ko moinom. Bisan pa, kinahanglan gihapon ko nga magmalig-on ug mopakita og pagsalig sa akong mga limitasyon.

“Sa akong kasinatian, kadtong walay klarong limitasyon mahimong kontento na, ug sa katapusan mokombinser sa ilang kaugalingon nga ang gamay nga sala OK ra. Dili na sila mobati sa Espiritu ug dili na makaila kon unsa ang sayop ug ngano.

“Ang pagpamugos sa kaedad, mahimong kusog kaayo. Kadtong dili lig-on kaayo mahimong moapil tungod kay ang giingon sa ilang mga higala ingon og makahuluganon, bisan kini dili mohaum sa atong mga sumbanan. Apan walay tunga-tunga. Sa katapusan mopili gihapon mo.

“Aron magpabiling lig-on, makatabang nga adunay buotang higala aron kamo magkaistoryahanay ug magsaligay sa usag usa. Nianang paagiha magpabilin kamong lig-on sa usag usa. Kon magsunod ko sa akong mga sumbanan, mobati ko nga luwas. Takus ko nga mangayo sa Dios sa pagprotekta kanako. Aduna koy hugot nga pagtuo nga kon nagmasulundon ko, Siya motabang nako.”