O Le Faatoesega a Lo’u Tama

Sa 16 o’u tausaga ma sa tata la’u CD fou rock-and-roll mo le taimi muamua lava. Ae paga lea, a o ou faalogologo, sa ou le fiafia lava ina ua faalogo atu i se upu masoa i le pese mulimuli. Sa ou maasiasi. Sa ou iloaina e le faatagaina e o’u matua—e lei ausia e le CD lea ia tulaga faatonuina a lo matou aiga. Ae sa ou fiafia i le tele o isi pese, o lea o soo se taimi lava sa ou taina ai le CD, ou te kiina ai i lalo le leo a o lei oo i le vaega o i ai le upu masoa lea.

Sa tau e lou tuafafine e lelei, i lo’u tama la’u CD lea. Mulimuli ane, ina ua ma i ai i le potu ai, sa ia faasoa mai lona popolega e uiga i le upu le talafeagai. E ui sa faaali mai lona manatu i se tulaga agalelei, ae sa ou puipuia ma le lotomaaa la’u filifiliga.

Sa ou faaaogaina ia finauga uma na mafai ona ou mafaufau i ai e faatalitonu ai lo’u tama e tatau ona ou taofia pea la’u CD. “Ou te lei iloaina sa i ai lena upu i le CD i le taimi sa ou faatauina ai,” sa ou fai atu ai, “ma pe a ta le pese lena, ou te kiina i lalo.”

Ina ua ia fai mai e tatau ona ou tiaia le CD, sa ou fai atu, “Afai e te manatu i lena mea, e tatau foi la ona ou le toe alu i le aoga! Ou te faalogo i lena upu—ma upu leaga atu i—aso uma i le aoga!”

Sa amata ona ia le fiafia. Sa ia toe faamamafa mai e le tatau lava ona i ai se musika masoa i totonu o lo matou aiga. Sa faateteleina le finauga ina ua ou fai atu e leaga atu nisi agasala e mafai ona ou faia ae ou te lei faaaogaina lava lena upu.

Na ou taumafai e osofai o ia: “Ou te taumafai malosi ia ou lelei, ae o lea ua e taulai i lenei mea faatauvaa e tasi ma ua e manatu o au o se tagata agasala leaga!”

E ui lava i lea, ae sa le faavaivai ai lo’u tama. Sa faapena foi ia te au. Sa ou savali atu i luga i lou potu, ato le faitotoa, ma taoto i lou moega, ma le ita tele. Sa ou mafaufau pea lava pea i le ma finauga, ma faatalitonuina atili ai pea au i au mafuaaga sese ma faatalitonuina au lava ia ou te sa’o.

Sefulu minute mulimuli ane, sa tuitui lemu mai le faitotoa. O lou Tama. Sa suia ona foliga. Sa lei alu atu o ia e finau. “Ou te faamalie atu i lo’u ita,” sa ia fai mai ai. “E mafai ona e faamagaloina au?” Na ia tau mai ia te au le tele o lona alofa ia te au ma lona manatu maualuga ia te au. Na te lei lauga mai. Na te lei tuuina mai ia te au se fautuaga. Ona ia faliu lea ma tuua lemu le potu.

O ni lauga se afe e uiga i le lotomaualalo e le mafai lava ona sili atu se mamana ia te au. Sa ou le toe ita ia te ia, ae sa na o au sa ou ita i ai ona o le lotomaaa ma le faigata. Sa ou tago atu i le CD, gaulua, ma tiai ese. Ou te le iloa pe sa ou tau atua ia Tama le mea sa ou faia, ae e le afaina. O le mea sa taua na ou aoaoina, sa faatauaina e lou tama le ma mafutaga e sili atu nai lo lona faamaualuga, e ui lava sa sao o ia.