E Ao ona Toe Fanauina i Tatou i le Vai ma le Agaga

Tatou te talitonu e tatau ona papatisoina i tatou ma maua le meaalofa o le Agaga Paia (e ala i le sauniga ua ta’ua o le faamauga) ina ia faaolaina ai i le malo o le lagi. Sa aoao mai le Faaola, “Afai e le fanau se tasi i le vai ma le Agaga, e le mafai ona sao o ia i le malo o le Atua” (Ioane 3:5).

Sa aoao mai foi le Alii e faapea o le sauniga o le papatisoga—e pei foi o isi sauniga uma o le talalelei—e tatau ona faatinoina e se tasi o umiaina ma le agavaa le perisitua: “O le tagata ua valaaulia e le Atua ma ua i ai le pule mai ia Iesu Keriso e papatiso atu ai, ia o ifo i lalo i le vai faatasi ma le tagata. … Ona ia faatofu ai lea o ia i le vai, ma toe sau i fafo o le vai” (MF&F 20:73–74).

O le papatisoga e ala i le faatofuina o se faatusa lea o le tanumia o le tagata agasala ma le toefanauina faaleagaga o le tagata e ola ai i le “ola toefuataiina” (Roma 6:4). E ala i le papatisoga tatou te tuua ai i tua o tatou olaga tuai ma amata se olaga fou o ni soo o Iesu Keriso. A faamauina i tatou ua avea i tatou ma tagata o Lana Ekalesia.

E aofia ai foi i le papatisoga se feagaiga paia, se folafolaga, i le va o le Tama Faalelagi ma le tagata ua papatisoina. Tatou te osifeagaiga e tausi Ana poloaiga, auauna atu ia te Ia ma Ana fanau, ma tauave i o tatou luga le suafa o Iesu Keriso. Ua Ia folafola mai e faamagalo a tatou agasala, “liligi atili tele mai e ia lona Agaga i luga o [tatou]” (Mosaea 18:10), ma ofo mai ia i tatou le ola e faavavau.

Sa tausia e le Faaola Lava Ia le poloaiga ina ia papatisoina, e ui lava sa leai Sana agasala (tagai i le Mataio 3:13–17). Sa papatisoina o Ia ina ia usiusitai, ia fai se faataitaiga mo i tatou, ma ia “faataunuu mea tonu uma” (tagai i le 2 Nifae 31:5–9). O lea, o i latou o e filifili ina ia papatisoina o loo mulimuli i le faataitaiga a le Faaola.

• O i latou e mananao ina ia papatisoina e tatau ona “faalotomaualaloina i latou lava i luma o le Atua, … molimau atu i luma o le ekalesia ua latou salamo moni ia latou agasala uma, ma [ia] loto e ave i o latou luga le suafa o Iesu Keriso” (MF&F 20:37).

• “Matou te talitonu [i le] … papatisoga e ala i le faatofuina” (Mataupu Faavae o le Faatuatua 1:4).

• E sosoo ma le paptisoga, e faamauina i tatou o ni tagata o Le Ekalesia a Iesu Keriso o le Au Paia o Aso e Gata Ai ma maua le meaalofa o le Agaga Paia.

• O le papatisoga ma le faamauga e mafai ai e le Togiola a Iesu Keriso ona aumai se faamamaina faaleagaga i o tatou olaga, e aofia ai le “faamagaloga o … agasala” (MF&F 33:11).

• E ala i le papatisoga ma le faamauga e avea ai i tatou ma “nuu faatasi ma le au paia” i le “aiga o le Atua” (Efeso 2:19).