Taliina o Fesili e uiga i le Ata o le Faaolataga

Saunia e Michael R. Morris

Mekasini a le Ekalesia

Ata

question marks and raised hands

O le a se talitonuga o tagata Mamona e uiga i le faaipoipoga?” o le fesili mai lea ia te au o lau faiaoga Sipaniolo o le aoga maualuga.

Sa faliu uma mai tagata o lau vasega mai o latou nofoa, ma faalologo mo sau tali. Sa ou popole ma mafaufau pe na faapefea ona suia le talanoaga a le matou vasega mai ia Don Quixote ma Dulcinea i tafaoga faamasani ma le faaipoipoga.

E leai se isi tagata o le Ekalesia i le vasega. O le a sau upu e tatau ona fai atu? O le a se tele o se faamatalaga e tatau ona ou tuuina atu? Faamata e ulagia au e tagata uma pe a ou talanoa atu e uiga i le faaipoipoga e faavavau?

“Matou te, a … ,” sa ou memumemu atu, ma sa le mautonu lava se upu e fai atu.

I lena lava taimi, na laveai ai au e lau uo o Denise. “E ese le matagofie o manatu o tagata Mamona e uiga i le faaipoipoga,” na ia fai mai ai. “Latou te talitonu o faaipoipoga e faataunuuina i totonu o o latou malumalu e mafai ona tumau e faavavau.”

“Oka se manaia,” o le tali lea a le matou faiaoga. Na oo lava i tamaiti o le vasega na foliga fiafia mai.

Sa faaauauina le vasega ae tuua au ou te mafaufau i ai pe aisea lava na ou afuafu tetele ai i se fesili na matuai faigofie lava ona taliina e sau uo le lotu.

Ao amata ona toatele tagata ua faalogo i le Ekalesia, ua tele atu foi ia avanoa mo le Au Paia o Aso e Gata Ai e tali ai ni fesili e uiga i le talalelei. I le aoga maualuga, sa ou iloa ai e le manaomia lo tatou tuuina atu o ni tali uumi, ma e le tatau ona tatou fefefe. E tautala lava ia aoaoga faavae matagofie ma le faigofie mo i latou lava.

O le isi taimi e fesili atu ai au uo e uiga i mea tatou te iloa e pei “o le ata o le faaolataga,” mafaufau e faaaoga ia tali pupuu nei. Latou te aumaia ni faamatalaga auiliili e fia iloa e le toatele o tagata, ma e te le tau lagonaina ai le manaomia o lou tusiina o se ata atoa o le ata o le faaolataga i se siata.

O Fea Na Tatou O Mai Ai?

O i tatou o ni tagata faavavau. Ae tatou te lei fananau mai, sa tatou nonofo faatasi ma le Atua, le Tama o o tatou agaga. O tagata uma lava o loo i ai i le lalolagi o ni uso ma ni tuafafine ma ni tuagane moni lava mai le Tama o i le Lagi e tasi. I le muai olaga ae tatou te lei o mai i le lalolagi, sa tofu i tatou o ni tagata taitoatasi ma se natura ma se taunuuga paia. Sa tuuina mai e le Atua ia i tatou uma le meaalofa o le faitalia, po o le aia tatau e filifili ai mo i tatou lava, i le muai olaga faapea foi ma iinei i le lalolagi. Ona o Ia o le Tama o o tatou agaga, tatou te valaauina o Ia o lo tatou Tama Faalelagi.

Aisea Ua Tatou I Ai Iinei?

O le olaga faalelalolagi o se vaega o le fuafuaga a le Atua mo lo tatou fiafia e faavavau. E aofia ai i lena fuafuaga se tino faaletino ma le aoao e filifili i le va o le lelei ma le leaga. Sa saunoa mai lo tatou perofeta soifua o, Peresitene Thomas S. Monson, faapea: “E tatau ona tatou maua le lotofaafetai ona ua foafoaina e le Mataisau poto se lalolagi ma tuu i ai i tatou iinei ma se ufimata o le lotogalo i lo tatou olaga sa i ai muamua, ina ia tatou oo i se taimi o tofotofoga, o se avanoa e faamaonia atu ai i tatou lava, ina ia mafai ona tatou agavaa mo mea uma ua saunia e le Atua mo i tatou ia maua” (“O Le Tausinioga o le Olaga,” Liahona, Me 2012, 91).

O Fea Tatou Te O I Ai Pe A mavae vLenei Olaga?

E faaauau pea o tatou olaga pe a tatou feoti, ae peitai o o tatou olaga i le lumanai e fuafua i le ala o atou ola ai i le taimi nei. Afai o tatou ola ai i le talalelei, o le alofa tunoa o le Alii o Iesu Keriso ua mafai ai ona tatou salamo, faamagaloina, ma mama i luma o le Atua.

I le Tusi a Mamona ua tatou iloa ai, “o agaga o tagata uma, o le taimi lava tatou te o ese atu ai mai lenei tino faaletino,…pe sa latou lelei pe sa leaga, e ave atu i fanua i lena Atua na tuuina ia te i latou le ola.

“Ma ona oo lea, o agaga o i latou o e ua amiotonu e talia i se nofoaga o le fiafia, lea ua taua o le parataiso, o se nofoaga e malolo ai, o se nofoaga o le filemu o le a latou malolo ai mai i o latou faalavelave uma ma mai le popole uma, ma le faanoanoa” (Alema 40:11–12).

Afai tatou te faaaogaina le Togiola, po o le taulaga, a Iesu Keriso, salamo i a tatou agasala, ma taumafai e ola e pei ona sa soifua ai o Ia, o le a faamamaina i tatou e Lana Togiola ma faatagaina i tatou e ola faatasi e faavavau ma le Tama Faalelagi.

O i latou o e lei filifili e mulimuli ia Keriso ma talia Lana talalelei o le a le mauaina na faamanuiaga (tagai Alema 40:13–14).

O Le a le Matafaioi a Iesu Keriso?

Na auina mai e lo tatou Tama Faalelagi Lona Alo, o Iesu Keriso, ina ia avea ma o tatou Faaola ma faasino mai ia i tatou le ala e ola ai e tusa ai ma le fuafuaga a le Atua. E mafai e le Togiola a le Faaola ona fufulueseina a tatou agasala ma faaagavaaina i tatou e toe foi atu i le afioaga o le Atua. Ina ua mavae le Faasatauroga o le Faaola, sa taoto Lona tino i totonu o le tuugamau mo aso e tolu seia toe foi mai Lona agaga. O se taunuuga o le manumalo o Iesu i le tuugamau (tagai Mamona 7:5), o le a tatou toetutu ai pe a mavae lo tatou oti ma ola e faavavau ai i ni tino atoatoa.