Vukei Ira na Gone Mera Vakavakarau ki na Papitaiso
Na gauna ni gone sa draki ni sevutaki ni veika rekitaki. Na isevu ni gauna me vodoki na basikeli, gole ki vuli, se vakatovolea e dua na kakana vou ni oqo e vica wale na isausauvou talei e bulia cake na bula ni dua na gone. Sa noda na qase na madigi meda vukei ira yani na gone ena salatu ni kune-ka-vou. Sa noda vakakina na qase ena Lotu, na madigi meda vukei ira mera tubu cake ena kosipeli (raica na V&V 68:25). Na cava e rawa ni da cakava me yaco na nona papitaiso e dua na gone—na isevu ni veiyalayalati e vakayacora e dua na tamata vua na Tamada Vakalomalagi—me ka totoka ka vakaibalebale cake vakalevu?
“Sa inaki taumada ni Lotu oqo me vakavulici ira na itabagone: tekivu e vale ka tarava yani ena lotu,” e vakavulica o Peresitedi Boyd K. Packer.1
Ena ivakaraitaki e tarava, era wasea tiko kina na itubutubu na sala era sa vakarautaki ira tiko kina na luvedra me baleta na nodra cakacakatabu vakalotu kei na veiyalayalati ni papitaiso kei na vakadeitaki.
Eda Tekivu Ni Ra se Gone
“Na gauna sa yabaki vitu kina e dua na gone me sa gauna ni marau,” e kaya o Lori, e va na luvena. O koya kei watina rau dau vakavulici iratou na luvedrau na veika baleta na papitaiso mai na siga ratou se qai sucu kina. Ia, na gauna sa yabaki vitu kina e dua, sa na tekivutaka sara na matavuvale me vakavakarau sara vakamatata. Era na taura na lesoni ni lotu vakamatavuvale ena veivula ena duidui ni ulutaga e sema ki na papitaiso me vakataka na veiyalayalati kei na ivakaraitaki i Jisu.
E kaya o Lori ni lesoni ena vula ni ikawalu ni nodratou siganisucu na gone e dau veivakalomavinakataki. E vakaraitaka na isulu e ratou a dara na gone ena gauna ni vakatoka yaca kei na veivakalougatataki, ka dau talanoataka na siga a vakayacori kina na cakacakatabu vakalotu o ya.
“Sa dua dina na gauna uasivi duadua me raici vakatabakidua kina na veivakalougatataki ni veiyalayalati ni valetabu,” e kaya o Lori. “Keirau dau raica me vakavulici ni digidigi mo papitaiso sa imatai ni kalawa mo vakavakarau ki veivakalougatataki ni valetabu.”
Keitou Dau Vakayacora me sa Cakacaka ni Matavuvale
E vakatura o Monica, e va na luvena, mera vakaitavitaki na gone qase cake mera vukei ira na tacidra gone mera vakavakarau ena kena gauna kece e rawa kina vei ira. “Ena dauveivakaukauwataki dina ni ra rogoca na tacidra se ganedra mera soli ivakadinadina se wasea na veika era sa sotava,” e kaya. E tomana o Lori ni so na gauna era dau kerei ira na gone era vakarau papitaiso tiko mera vakavulica vei ira na tacidra gone na veika era sa vulica rawa.
Keitou Dau Vakayagataka me iYaya ni Cakacaka ni Kaulotu.
Ni sa yabaki walu na luvei Daniela yalewa, sa kila sara ni na vinakata o luvena mena wasea na nona siga ni papitaiso vei ira na nona itokani era sega ni lewe ni Lotu. Sa qai mani veisureti yani na nodratou matavuvale vei ira na itokani e koronivuli kei na itikotiko e kea ki na papitaiso nei Allison. Era a kerei na itokani oqo mera kauta tiko mai na nodra tiki ni iVola Tabu taleitaki ki na papitaiso. Ni sa oti na papitaiso, a toqa sara o Allison na veitikina oqo ki na nona ivolanikalou vou ka vola ena maliwa e loma na yacadra na nona itokani.
“Sa dina sara, keitou a vakaitavi sara ga vakamatavuvale, ena siga o ya. Ia keitou a laivi koya tu vata kei ira na itokani ni oti o ya ka tukuna vei ira na veika a vakila,” a kaya o Daniel. “Sa qai dua dina na gauna vakalomavinaka me keirau raica ni sa ivakaraitaki vinaka o luvei keirau.”
Keirau Vakatovotovotaka na Veivakatarogi nei Bisopi
E nanuma lesu o Kimberly, na marama tinadra na gone era sa yacova tiko yani na yabaki ni papitaiso, na nona gole yani ki na valenivolavola nei bisopi ki na nona veivakatarogi ni papitaiso ena gauna sa yabaki walu kina. “Au sa taqaya sara ga!” E kaya o Kimberly.
Ia oqo sa saga o koya me raica me ratou kakua ni yalo taqaya na luvena. Rau sa qai vosa vakaveiwatini vei iratou na gone baleta na veivakatarogi ni bisopi ka tarogi iratou baleta na papitaiso ena dua na kena ivakatovotovo e tautauvata kaya. Na veivakatarogi oqo e sega walega ni vakatakilai vei iratou na gone na iwalewale ni veivakatarogi—rau a vakayaloqaqataki iratou talega na gone me ratou vakasamataka vakatitobu na ibalebale ni veiyalayalati ni papitaiso ki na nodratou bula.
E Tu Vei Keda e Dua na iSolisoli Vakasakiti
Era maqusa sara na itubutubu oqo mera tukuna ni ra sega ni se cakava e dua na ka uasivi cake me ra vakarautaki na luvedra ki na papitaiso kei na vakadeitaki, ia e vuqa vei ira era vakayagataka na vosa “taucoko” kei na “tudei” me vakamacalataki kina na lesoni era sa vakavulica ena veiyabaki. “Keirau raica sara ga me ratou kila vakavinaka na luvei keirau ni oqo e dua na ikalawa bibi ki na nodratou bula, ka sa ka dina sara,” e kaya o Kimberly. “Keirau dau raica me keirau sara ga e vakarautaki iratou, ka sega ni nuitaka tikoga me ratou veivakavulici tikoga na qasenivuli ni Lalai.”
Sa qai soli mai na noda madigi totoka meda vukei ira na gone eda lomana me ra vakavakarau ki na nodra papitaiso kei na vakadeitaki! Ni da vakayacora ena masumasu, ena tiko vata kei keda na Turaga meda bulia cake na vakayaco veiyalayalati me dua na yavu kaukauwa ni tubu vakayalo ki na veisiga ni mataka.
iTaba mai vei John Luke, Craig Dimond, kei Cody Bell